ଦିଗପହଣ୍ଡି,୧୩ା୬(ଡି.ଏନ.ଏ.)-ଦିଗପହଣ୍ଡି ପୁଞ୍ଜିକୟାଁ ଛକ ନିକଟରୁ ବୁଧବାର ସକାଳେ ଗଞ୍ଜେଇ ଚୋରାଚାଲାଣ ଅଭିଯୋଗରେ ୨ ଅଣଓଡ଼ିଆ ଯୁବକଙ୍କୁ ଗିରଫ କରାଯାଇଛି। ସେମାନେ ହେଲେ ବିହାର ପ୍ରଦେଶ ବୈଶାଳୀ ଜିଲା ରଘୁପୁରା ଥାନା ରାମପୁର ଶ୍ୟାମଚାନ୍ଦ ଗାଁର ସୁରଜ କୁମାର ଓ ପପୁ ଦାସ । ତାଙ୍କଠାରୁ ଅବକାରୀ ବିଭାଗ ୧୩ କେଜି ୬ ଶହ ଗଞ୍ଜେଇ ଜବତ କରିଛି। ଦିଗପହଣ୍ଡି ଅବକାରୀ କାର୍ଯ୍ୟାଳୟ ମାମଲା ନଂ. ୧୫/୧୯-୨୦ ଅନୁଯାୟୀ ଅଭିଯୁକ୍ତ ଦ୍ୱୟଙ୍କୁ ଅପରାହ୍ନରେ ବ୍ରହ୍ମପୁର ଜିଲା ଦୌରାଜଜ୍ ସ୍ବତନ୍ତ୍ର କୋର୍ଟକୁ ଚାଲାଣ କରାଯାଇଥିଲା। ଜାମିନ ନାମଞ୍ଜୁର ହେବାରୁ ଉଭୟଙ୍କୁ ବ୍ରହ୍ମପୁର ଜେଲ ହାଜତକୁ ପଠାଇ ଦିଆଯାଇଛି। ପ୍ରକାଶ ଯେ, ଅଭିଯୁକ୍ତ ଦ୍ୱୟ ୨ଟି ଏୟାରବ୍ୟାଗରେ ଗଞ୍ଜେଇ ନେଇ ମୋହନାରୁ ବ୍ରହ୍ମପୁର ଅଭିମୁଖେ ଏକ ଯାତ୍ରୀବାହୀ ବସ୍ରେ ଯାଉଥିଲେ। ଜଳଖିଆ ଖାଇବା ପାଇଁ ଦିଗପହଣ୍ଡି ପୁଞ୍ଜିକୟାଁ ଛକରେ ଓହ୍ଲାଇଥିଲେ। ସନ୍ଦେହ ହେବାରୁ ସାଦା ପୋଷାକରେ ଥିବା ଅବକାରୀ ଏଏସ୍ଆଇ ରବୀନ୍ଦ୍ର ନାଥ ପାଢ଼ୀ ସଦଳବଳ ଯୁବକ ଦ୍ୱୟଙ୍କ ବ୍ୟାଗ ଯାଞ୍ଚ କରିଥିଲେ। ସେଥିରେ ଗଞ୍ଜେଇ ଥିବା ଜାଣି ଅବକାରୀ ଏସ୍ଆଇଙ୍କୁ ଖବର ଦିଆଯାଇଥିଲା। ସେ ପହଞ୍ଚତ୍ ସୁରଜ ଓ ପପୁଙ୍କୁ ଗିରଫ କରିବା ସହ ଗଞ୍ଜେଇ ଭର୍ତ୍ତି ବ୍ୟାଗ ଜବତ କରିଥିଲେ। ଗଞ୍ଜେଇର ବଜାର ମୂଲ୍ୟ ପ୍ରାୟ ୯୦ ହଜାର ଟଙ୍କା ହେବ ବୋଲି ଅବକାରୀ ବିଭାଗ ପକ୍ଷରୁ ଆକଳନ କରାଯାଇଛି।
