ଢେଙ୍କାନାଳ ଅଫିସ,୨୧ା୫
ଢେଙ୍କାନାଳ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଖବରଦାତାଙ୍କୁ ଦୁର୍ବ୍ୟବହାର କରିଥିବା ଅଭିଯୋଗରେ ସୋମବାର ଜିଲାର ଶତାଧିକ ଖବରଦାତା ସୂଚନା ଓ ଲୋକ ସମ୍ପର୍କ ଅଧିକାରୀଙ୍କ କାର୍ଯ୍ୟାଳୟ(ଡିଆଇପିଆର୍ଓ) ଘେରାଉ କରିଥିଲେ। ଏହାକୁ ନେଇ ସେଠାରେ ଉତ୍ତେଜନା ଦେଖାଦେଇଥିଲା।
ଅଭିଯୋଗ ମୁତାବକ, ବିଭିନ୍ନ ସରକାରୀ କାର୍ଯ୍ୟକ୍ରମ ବାବଦରେ ଠିକ୍ ସମୟରେ ସୂଚନା ପ୍ରଦାନ କରିବାରେ କାର୍ଯ୍ୟାଳୟ ପକ୍ଷରୁ ଅବହେଳା କରାଯାଉଛି। ଗୋପବନ୍ଧୁ ସ୍ବାସ୍ଥ୍ୟ ବୀମା ଯୋଜନାରେ ନବୀକରଣ ପାଇଁ ଅନାବଶ୍ୟକ କାଗଜାଦି ଓ ନ୍ୟୁଜ୍ କ୍ଲିପିଙ୍ଗ୍ ବାଧ୍ୟତାମୂଳକ ଭାବେ ପ୍ରଦାନ କରିବା ପାଇଁ ଜିଲା, ଉପଖଣ୍ଡ, ବ୍ଲକ ଓ ଗ୍ରାମାଞ୍ଚଳର ଖବରଦାତାଙ୍କ ଉପରେ ଚାପ ପ୍ରୟୋଗ କରାଯାଉଥିବାରୁ ଖବରଦାତାମାନେ ତୀବ୍ର ଅସନ୍ତୋଷ ପ୍ରକାଶ କରିଥିଲେ। ୫ ଦିନ ତଳେ ଜିଲା କାର୍ଯ୍ୟାଳୟର ସଦ୍ଭାବନା ଗୃହରେ ଏକ ସରକାରୀ ବୈଠକରେ ସ୍ବାସ୍ଥ୍ୟବୀମା ନବୀକରଣ ପାଇଁ ଖବରଦାତାମାନଙ୍କୁ କୌଣସି କାଗଜପତ୍ର ପ୍ରଦାନ କରିବାକୁ ପଡିବ ନାହିଁ ବୋଲି ଜିଲାପାଳ ନିଖିଳ ପଓ୍ବନ କଲ୍ୟାଣ ସମସ୍ତଙ୍କ ଉପସ୍ଥିତିରେ ସୂଚନା ଦେଇଥିଲେ। ହେଲେ ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଏହାକୁ ଖାତିର ନ କରି ପୁନର୍ବାର ବୀମା ନବୀକରଣ ପାଇଁ କାଗଜପତ୍ର ଦାଖଲ କରିବା ନିମନ୍ତେ ଖବରଦାତାମାନଙ୍କୁ ବାଧ୍ୟ କରାଇଥିବା ଖବରଦାତାମାନେ ଅଭିଯୋଗ କରିଛନ୍ତି। ପ୍ରତିବାଦରେ ଜିଲାର ଶତାଧିକ ଖବରଦାତା ଏକ ଶୋଭାଯାତ୍ରାରେ ବାହାରି ଜିଲା ସୂଚନା ଓ ଲୋକ ସମ୍ପର୍କ କାର୍ଯ୍ୟାଳୟକୁ ଘେରାଉ କରିଥିଲେ। ଖବରପାଇ ଅତିରିକ୍ତ ଜିଲାପାଳ ପୂର୍ଣ୍ଣଚନ୍ଦ୍ର ମିଶ୍ର, ଜିଲା ଗ୍ରାମ୍ୟ ଉନ୍ନୟନ ସଂସ୍ଥା ପ୍ରକଳ୍ପ ନିର୍ଦ୍ଦେଶକ ନରୋତ୍ତମ ବେହେରା, ସଦର ଏସ୍ଡିପିଓ ଶ୍ରୀହର୍ଷ ମିଶ୍ର, ଟାଉନ ଥାନା ଅଧିକାରୀ ଅଭିନବ ଡାଳୁଆ ପ୍ରମୁଖ ପହଞ୍ଚି ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ହେମନ୍ତ କୁମାର ନାୟକଙ୍କ ଉପସ୍ଥିତିରେ ଖବରଦାତାଙ୍କ ସହ ଆଲୋଚନା କରିଥିଲେ। ଏହାପରେ ଜିଲା ସୂଚନା ଓ ଲୋକ ସମ୍ପର୍କ କାର୍ଯ୍ୟାଳୟରେ ହେଉଥିବା ଅନିୟମିତତାର ତଦନ୍ତ, ଡିଆଇପିଆରଓଙ୍କୁ ବହିଷ୍କାର, ସ୍ବାସ୍ଥ୍ୟବୀମା ପ୍ରଦାନ କ୍ଷେତ୍ରରେ ଅଯଥାରେ ଖବରଦାତାମାନଙ୍କୁ ହଇରାଣ କରା ନ ଯିବା ଆଦି ଦାବିରେ ଏକ ଦାବିପତ୍ର ଜିଲାପାଳଙ୍କ ଉଦ୍ଦେଶ୍ୟରେ ଅତିରିକ୍ତ ଜିଲାପାଳଙ୍କୁ ପ୍ରଦାନ କରାଯାଇଥିଲା। ସେହିପରି ରାଜ୍ୟ ସୂଚନା ଓ ଲୋକ ସମ୍ପର୍କ ବିଭାଗର ସଚିବ, ନିର୍ଦ୍ଦେଶକ ଏବଂ ଅତିରିକ୍ତ ନିର୍ଦ୍ଦେଶକଙ୍କୁ ମଧ୍ୟ ଏ ସଂକ୍ରାନ୍ତରେ ଲିଖିତ ଭାବେ ଅବଗତ କରାଯାଇଛି। ଏ ନେଇ ଅତିରିକ୍ତ ଜିଲାପାଳ ପୂର୍ଣ୍ଣଚନ୍ଦ୍ର ମିଶ୍ର କୁହନ୍ତି, ଖବରପାଇ ଆମେ ଆସି ସମସ୍ତ ବିଷୟ ଜାଣିବା ପରେ ବୁଝାଶୁଝା କରିଥିଲୁ। ଖବରଦାତାମାନେ ପ୍ରଦାନ କରିଥିବା ଦାବିପତ୍ରକୁ ଗ୍ରହଣ କରି ଜିଲାପାଳଙ୍କୁ ପ୍ରଦାନ କରିବୁ। ଏ ସମ୍ପର୍କରେ ଜିଲାପାଳଙ୍କ ସହ ଆଲୋଚନା ପରେ ପଦକ୍ଷେପ ନିଆଯିବ।
