ନୂଆଦିଲ୍ଲୀ, ୨୧।୫: ଦେଶର ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କ ୨୮ତମ ପୁଣ୍ୟତିଥି ମଙ୍ଗଳବାର ସାରା ଦେଶରେ ପାଳନ କରାଯାଉଛି। ଦିଲ୍ଲୀର ବୀରଭୂମିରେ ଥିବା ତାଙ୍କ ସମାଧିପୀଠରେ ଅନେକ ଗଣମାନ୍ୟ ବ୍ୟକ୍ତି ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି। ରାଜୀବ ଏବଂ ସ୍ତ୍ରୀ ସୋନିଆ ଗାନ୍ଧୀଙ୍କ ବିବାହକୁ ନେଇ ଅନେକ ସମୟରେ ଚର୍ଚ୍ଚା ବିଷୟବସ୍ତୁ ପାଲଟିଛି। ଜଣେ ବିଦେଶିନୀଙ୍କୁ ବିବାହ କରିବା ପରେ ଏହାକୁ ନେଇ ଦେଶରେ ତାଙ୍କୁ ସମାଲୋଚନାର ଶିକର ହେବାକୁ ପଡିଥିଲା। କିନ୍ତୁ ଇଟାଲୀ ଝିଅ ସୋନିଆଙ୍କ ପ୍ରେମରେ କେମିତି ପଡିଥିଲେ ରାଜୀବ ତାକୁ ନେଇ ଏକ ରୋଚକ ତଥ୍ୟ ସାମ୍ନାକୁ ଆସିଛି। ରାଜୀବ ପାଠ ପଢିବା ପାଇଁ ଇଂଲଣର କେମ୍ଭ୍ରିଜ ବିଶ୍ୱବିଦ୍ୟାଳୟ ଯାଇଥିଲେ। ସେଠାରେ ତାଙ୍କ ଭେଟ ହୋଇଥିଲା ଏମ୍ବ୍ଲିନା ମାଇନୋ ଓରଫ୍ ସୋନିଆ ଗାନ୍ଧୀଙ୍କ ସହ ତାଙ୍କ ଭେଟ ହୋଇଥିଲା। ଇଟାଲୀର ମଧ୍ୟବିତ୍ତ ପରିବାରରୁ ଆସିଥିବା ସୋନିଆ ଅର୍ଥାଭାବରୁ ଏକ ରେଷ୍ଟୁରାଣ୍ଟରେ ପାର୍ଟ ଟାଇମ୍ ଚାକିରି କରୁଥିଲେ। ଏହିସମୟରେ ଉଭୟ ରାଜୀବ ଏବଂ ସୋନିଆଙ୍କ ପ୍ରେମ ସମ୍ପର୍କ ଆରମ୍ଭ ହୋଇଥିଲା। ପାଠପଢା ଶେଷ ପରେ ଉଭୟ ଏହି ସମ୍ପର୍କକୁ ବିବାହର ରୂପ ଦେବା ପାଇଁ ଚାହିଁଥିଲେ କିନ୍ତୁ ରାଜୀବଙ୍କ ମା’ ତଥା ଭାରତର ପ୍ରଥମ ମହିଳା ପ୍ରଧାନମନ୍ତ୍ରୀ ଇନ୍ଦିରା ଗାନ୍ଧୀ ଏଥିଲେ ଅରାଜି ଥିଲେ। ଇନ୍ଦିରା ପୁଅର ବିବାହ ସୋନିଆଙ୍କ ସହସହ ନୁହେଁ, ଆଉ ଜଣଙ୍କ ସହ କରିବାକୁ ଚାହୁଁଥିଲେ। ସେ ଆଉ କେହି ନୁହଁନ୍ତି , ସେ ହେଉଛନ୍ତି ଲୋକପ୍ରିୟ ଅଭିନେତା ରାଜ କପୁରଙ୍କ ଝିଅ ଋତୁ ନନ୍ଦା। ବରିଷ୍ଠ ପତ୍ରକାର ରସିଦ କିଦବଇ ନିଜ ପୁସ୍ତକ ନେତା ଅଭିନେତା: ବଲିଉଡ ଷ୍ଟାର୍ ପାୱର୍ ଇନ ଇଣ୍ଡିଆନ ପଲିଟିକ୍ସ ରେ ଏହି କଥା ଉଲ୍ଲେଖ କରିଛନ୍ତି । ରସିଦ ଲେଖିଛନ୍ତି, ଦେଶର ପ୍ରଧାନମନ୍ତ୍ରୀ ଜବାହରଲାଲ ନେହରୁ ଏବଂ ବର୍ଷିୟାନ ଅଭିନେତା ପୃଥ୍ବୀରାଜ କପୁରଙ୍କ ପରିବାର ସହ ଖୁବ ଗଭୀର ବନ୍ଧୁତ୍ୱ ଥିଲା। ଆଉ ଇନ୍ଦିରା ଗାନ୍ଧୀ ଏହି ବନ୍ଧୁତାକୁ ସମ୍ପର୍କରେ ପରିଣତ କରିବାକୁ ଚାହୁଁଥିଲେ। ଏହି କାରଣରୁ ରାଜ କପୁରଙ୍କ ଝିଅ ଋତୁ ନନ୍ଦାଙ୍କୁ ନିଜ ଘରର ବୋହୂ କରିବାକୁ ଇଛା ରଖିଥିଲେ ଇନ୍ଦିରା ଗାନ୍ଧୀ। କିନ୍ତୁ ପୁଅର ଜିଦ୍ ଆଗରେ ହାର୍ ମାନିଥିଲେ ଇନ୍ଦିିରା। ଶେଷରେ ୨୫ ଫେବ୍ରୁଆରୀ ୧୯୬୮ରେ ରାଜୀବ ଏବଂ ସୋନିଆଙ୍କ ବିବାହ ହୋଇଥିଲା।
