ନୂଆଦିଲ୍ଲୀ, ୨୮।୧: ଭାରତୀୟ ସୁରକ୍ଷା ବ୍ୟବସ୍ଥାରେ ଡଗ୍ ସ୍କ୍ବାଡ୍କୁ ନିୟୋଜିତ କରାଯାଇଥାଏ। ତେବେ ଏବେ ଏହି ସ୍କ୍ବାଡ୍ର ପ୍ରତି କୁକୁରଙ୍କ ବେଲ୍ଟରେ କ୍ୟାମେରା ଲଗାଯାଇ ସେମାନଙ୍କୁ କାର୍ଯ୍ୟ ଲଗାଯିବ। ଯେଉଁ ସ୍ଥାନକୁ ସୁରକ୍ଷାକର୍ମୀ ଯାଇପାରିବେ ନାହିଁ ସେଠାକୁ କ୍ୟାମେରା ଲାଗିଥିବା କୁକୁର ସହଜରେ ଯାଇ ଗୁରୁତ୍ୱପୂର୍ଣ୍ଣ ତଥ୍ୟ ସଂଗ୍ରହ କରିପାରିବ। ଜାନୁୟାରୀ ୨୬ଠାରୁ ବିଶାଖାପଟ୍ଟନମ୍ ଆର୍ପିଏଫ୍ ଏହି ସ୍କ୍ବାଡ୍କୁ ମୁତୟନ କରାଯାଇଛି। ପରୀକ୍ଷାମୂଳକ ଭାବେ ୪ଟି କୁକୁରଙ୍କ ବେଲ୍ଟରେ କ୍ୟାମେରା ଲଗାଯାଇଛି। ପରବର୍ତ୍ତୀ ସମୟରେ ଏହା ଦେଶର ଅନ୍ୟ ରେଳ ଷ୍ଟେଶନରେ କାର୍ଯ୍ୟକାରୀ ହେବ ବୋଲି ରେଲଓ୍ବେ ବୋର୍ଡର କାର୍ଯ୍ୟକାରୀ ନିର୍ଦ୍ଦେଶକ ରାଜେଶ ଦତ୍ତ ସୂଚନା ଦେଇଛନ୍ତି। ଏହି କ୍ୟାମେରା ଦ୍ୱାରା ସନ୍ଦିଗ୍ଧ ବସ୍ତୁର ପାଖକୁ ନ ଯାଇ ଡଗ୍ ସ୍କ୍ବାଡ୍ ୧୦ ମିଟର ଦୂରରୁ କାର୍ଯ୍ୟ କରି ପାରିବ। କ୍ୟାମେରାର ଦାମ ୧୭ ହଜାର ଟଙ୍କା ଥିବାବେଳେ ଏହାକୁ ରେଳ ବିଭାଗରେ କାର୍ଯ୍ୟ କରୁଥିବା ୨୯୮ କୁକୁରଙ୍କ ବେଲ୍ଟରେ ଲଗାଯିବାର ଯୋଜନା ରହିଛି।
