ନୟାଗଡ଼ ଅଫିସ, ୮ା୭: ନୟାଗଡ଼ ଜିଲା ଦଶପଲ୍ଲା ଥାନା ଅନ୍ତର୍ଗତ ଆଡ଼କଟା କାଳିଆପଡ଼ାଠାରେ ସୋମବାର ସକାଳେ ୨ଟି ବରଯାତ୍ରୀ କାର୍ ସହ ଅନ୍ୟ ଏକ କାର୍ ମୁହାଁମୁହିଁ ଧକ୍କା ହେବାରୁ ୧୨ଜଣ ଆହତ ହୋଇଛନ୍ତି। ସେମାନଙ୍କ ମଧ୍ୟରୁ ୭ଜଣଙ୍କ ଅବସ୍ଥା ଗୁରତର ରହିଛି। ସେମାନେ ହେଲେ ଦଶପଲ୍ଲା ହାଟସାହିର ପାଣ୍ଡବ ସ୍ବାଇଁ, ନବ କିଶୋର ପ୍ରଧାନ, ବାଣପୁରର ପ୍ରଶାନ୍ତ ସ୍ବାଇଁ, ଉଲା ବାରିକ, ଚିଲିକାର ରମେଶ ପ୍ରଧାନ, ଭାରତୀ ପ୍ରଧାନ, ଅନ୍ୟ ଜଣଙ୍କ ପରିଚୟ ମିଳିପାରି ନାହିଁ।
ପ୍ରକାଶ ଯେ, ଦଶପଲ୍ଲା ହାଟସାହିରେ ଏକ ବିବାହ କାର୍ଯ୍ୟକ୍ରମ ରହିଥିଲା। ବରଙ୍କ ସମ୍ପର୍କୀୟମାନେ ଦୁଇଟି କାର୍ ଯୋଗେ କଣ୍ଟିଲୋ ବିଜିପୁରକୁ ବରଯାତ୍ରୀ ଭାବେ ଯାଇଥିଲେ। ସେଠାରୁ ସେମାନେ ଦଶପଲ୍ଲାକୁ ଫେରୁଥିବା ବେଳେ କାଳିଆପଡ଼ାଠାରେ ଗଣିଆପଟୁ ଆସୁଥିବା ଏକ କାର୍ ସେମାନଙ୍କୁ ସମ୍ମୁଖରୁ ଧକ୍କା ଦେଇଥିଲା। ପ୍ରଥମ ବରଯାତ୍ରୀ କାର୍କୁ ଧକ୍କା ଦେବାପରେ ପଛରେ ଆସୁଥିବା ଆଉ ଏକ କାର୍କୁ ମଧ୍ୟ ଧକ୍କା ହୋଇଥିଲା। ଫଳରେ ୩ଟି ଗାଡ଼ିରେ ଥିବା ୧୨ଜଣ ଆହତ ହୋଇଥିଲେ। ପ୍ରଥମେ ସେମାନଙ୍କୁ ଦଶପଲ୍ଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରାଯାଇଥିଲା। ୭ ଜଣଙ୍କ ଅବସ୍ଥା ଗୁରୁତର ହେବାରୁ ସେମାନଙ୍କୁ ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ଦଶପଲ୍ଲା ପୋଲିସ ଦୁର୍ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି।
