କେନ୍ଦୁଝର, ୧୮ା୮ (ସ୍ବ.ପ୍ର.) କୃଷିର ବିକାଶ ପାଇଁ ଜଳସେଚନର ବିକାଶ କରାଯାଉଛି ା ତେବେ ଜଳସେଚନ ପାଇଁ ବହୁ ଟଙ୍କା ବ୍ୟୟରେ ବିଭିନ୍ନ ନାଳ ଓ ନଦୀରେ କ୍ରସ ବନ୍ଧ ନିର୍ମାଣ କରାଯାଉଥିଲେ ହେଁ ସେସବୁ କାମରେ ଲାଗୁ ନ ଥିବାରୁ ସରକାରୀ ଅର୍ଥ ପାଣିରେ ପଡୁଛି। ଏଭଳି ଅଭିଯୋଗ ହରିଚନ୍ଦନପୁର ଗ୍ରାମର ଜଂଘିରା, ତଅଁଳାହୋତା, କଣ୍ଟାପଦା ଆଦି ଗ୍ରାମର ଚାଷୀମାନେ ଅଭିଯୋଗ କରୁଛନ୍ତି। ଉକ୍ତ ଅଞ୍ଚଳରେ ବୋହିଯାଉଥିବା ବାଉଟିଆ ନାଳ, ସାନକାଇଁଝରୀ ନାଳ ସମେତ ଅନ୍ୟାନ୍ୟ ନାଳରେ ପାଖାପାଖି ୧୦ଟି କ୍ରସ ବନ୍ଧ ନିର୍ମାଣ କରାଯାଇଥିଲେ ହେଁ ଚାଷ କାର୍ଯ୍ୟରେ ଲାଗୁ ନ ଥିବାରୁ ଅସନ୍ତୋଷ ବ୍ୟକ୍ତ କରୁଛନ୍ତି। ଲକ୍ଷାଧିକ ଟଙ୍କାରେ ନିର୍ମାଣ କରାଯାଉଥିବା ଏହି ବନ୍ଧ ଗୁଡିକର ନିର୍ମାଣ ବେଳେ ତଦାରଖ ଠିକ ଭାବରେ କରାଯାଉ ନ ଥିବାରୁ ବ୍ୟାପକ ଅର୍ଥ ବାଟମାରଣା ହେଉଥିବା ଅଭିଯୋଗ ହେଉଛି ା ସେହିପରି ଏହି ବନ୍ଧ ଉପରେ ଜମି ସବୁ ରହୁଥିବାରୁ ଚାଷ ଜମିକୁ ପାଣି ମାଡୁନାହିଁ ା ଫଳରେ ଠିକାଦାର ପୋଷିବା ପାଇଁ ଏଭଳି ବହୁ ସଂଖ୍ୟାରେ ବନ୍ଧ ନିର୍ମାଣ କରାଯାଉଥିବା ଚାଷୀମାନେ ଅଭିଯୋଗ କରିଛନ୍ତି।
ଏହି ଅଞ୍ଚଳର ଲୋକମାନଙ୍କ ଜୀବନଜୀବିକା ହେଉଛି ଚାଷ ା ଗରିବ ଶ୍ରେଣୀର ହୋଇଥିବାରୁ ଚାଷ କଲେ ଘର ଚଳେ ଓ ବଳକା ବିକି ତେଲ ଲୁଣ କିଣି ଚଳନ୍ତି। ଚିରସ୍ରୋତା ନାଳ ଏବଂ ବନ୍ଧ ନିର୍ମାଣ ହୋଇଥିଲେ ହେଁ ପାଣି ଜମିକୁ ମାଡୁ ନ ଥିବାରୁ ଧାନ ଚାଷ ବ୍ୟତୀତ ଆଗ୍ରହ ଥିଲେ ହେଁ ଅନ୍ୟ ଚାଷ କରିପାରୁନାହାନ୍ତି ବୋଲି କହିଛନ୍ତି ଚାଷୀ ପୂର୍ଣ୍ଣଚନ୍ଦ୍ର ପରିଡା ା ଧାନ ଚାଷ ପାଇଁ ବର୍ଷା ଉପରେ ନିର୍ଭର କରିବାକୁ ବାଧ୍ୟ ହୋଇଥାନ୍ତି। ଚଳିତ ବର୍ଷ ବିଳମ୍ବରେ ବର୍ଷା ହେବା ଓ କମ ବର୍ଷା ହୋଇଥିବାରୁ ଚାଷ କ୍ଷତିଗ୍ରସ୍ତ ହୋଇଛି। ବନ୍ଧରୁ ଜଳ ଯୋଗାଣ ପାଇଁ ବ୍ୟବସ୍ଥା କରାଯାଇଥିଲେ ଖୁସିରେ ଚାଷ କରିପାରିଥାନ୍ତେ ବୋଲି ଚାଷୀ ପ୍ରକାଶ ନାୟକ ପ୍ରକାଶ କରିଛନ୍ତି। ଚାଷୀଙ୍କ ଆବଶ୍ୟକତାକୁ ଦୃଷ୍ଟିରେ ରଖି ବନ୍ଧ ନିର୍ମାଣ କରାଯାଉ ନ ଥିବାରୁ ଲକ୍ଷ ଲକ୍ଷ ଟଙ୍କା ବ୍ୟୟରେ ନିର୍ମିତ ସେସବୁ ବନ୍ଧ କାମରେ ଲାଗୁନାହିଁ ା ସେହିପରି ଠିକ ଭାବରେ ବନ୍ଧ ନିର୍ମାଣ କରାଯାଉ ନ ଥିବାରୁ ଅଧିକ ପାଣି ରହୁନାହିଁ ା ଅନେକ ସମୟରେ ଚାଷୀମାନେ ଖର୍ଚ୍ଚାନ୍ତହୋଇ ପମ୍ପ ବସାଇ ପାଣି ମଡାଇଥାନ୍ତି। ଗରିବ ଲୋକ ହୋଇଥିବାରୁ ସମସ୍ତେ ଖର୍ଚ୍ଚ କରି ପମ୍ପ ବ୍ୟବହାର କରିପାରୁ ନ ଥିବା କହିଛନ୍ତି। ଏଣୁ ଏ ନେଇ ପଦକ୍ଷେପ ନେବା ସହ ଜମିକୁ ପାଣି ମଡାଇବା ପାଇଁ ବ୍ୟବସ୍ଥା କରିବାକୁ ନିବେଦନ କରିଛନ୍ତି।
