ନୂଆଦିଲ୍ଲୀ/ବେଙ୍ଗାଲୁରୁ,୧୧ା୭(ପି.ଟି): କର୍ନାଟକରେ ଚାଲିଥିବା ରାଜନୈତିକ ନାଟକରେ ନୂଆମୋଡ଼ ଆସିଛି। ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ଶୁକ୍ରବାର ସନ୍ଧ୍ୟା ୬ଟାରେ ୧୦ ବିଦ୍ରୋହୀ ବିଧାୟକ ବାଚସ୍ପତି କେ.ଆର୍. ରମେଶଙ୍କୁ ବିଧାନସଭାସ୍ଥିତ ତାଙ୍କ ଚାମ୍ବରରେ ଭେଟିଛନ୍ତି। ମୁମ୍ବାଇରୁ ଫେରିବା ପରେ ସେମାନେ ବାଚସ୍ପତିଙ୍କୁ ବ୍ୟକ୍ତିଗତ ଭାବେ ଲିଖିତ ଆକାରରେ ଇସ୍ତଫାପତ୍ର ପ୍ରଦାନ କରିଛନ୍ତି। ବାଚସ୍ପତି ଗୁରୁବାର ଏନେଇ ସୁପ୍ରିମକୋର୍ଟରେ ରିପୋର୍ଟ ଦାଖଲ କରିବେ। ପରେ ବିଧାୟକଙ୍କ ମାମଲା ସହ ବାଚସ୍ପତିଙ୍କ ପକ୍ଷରୁ ଦାଏର ପିଟିଶନର ମଧ୍ୟ ଶୁଣାଣି କରାଯିବ ବୋଲି ସୁପ୍ରିମକୋର୍ଟ ଧାର୍ଯ୍ୟ କରିଛନ୍ତି।
ସୁପ୍ରିମକୋର୍ଟ ନିର୍ଦ୍ଦେଶ ଦେବାର କିଛି ଘଣ୍ଟା ପରେ ମୁମ୍ବାଇର ହୋଟେଲ ରେନେସାଁରେ ଥିବା ୧୦ ବିଦ୍ରୋହୀ ବିଧାୟକ ଦୁଇଟି ସ୍ବତନ୍ତ୍ର ବିମାନରେ ବେଙ୍ଗାଲୁରୁସ୍ଥିତ ଏଚ୍ଏଏଲ୍ ବିମାନବନ୍ଦରରେ ପହଞ୍ଚତ୍ଥିଲେ। ପରେ କଡ଼ା ସୁରକ୍ଷା ବଳୟ ମଧ୍ୟରେ ସେମାନେ ବାଚସ୍ପତିଙ୍କ ଚାମ୍ବରରେ ହାଜର ହୋଇ ନିଜ ନିଜ ଇସ୍ତଫାପତ୍ର ପ୍ରଦାନ କରିଥିଲେ। ଅଦ୍ୟାବଧି ମୋଟ ୧୬ ବିଧାୟକ ଇସ୍ତଫା ଦେଇଥିବାବେଳେ ୧୧ ବିଧାୟକ ବାଚସ୍ପତିଙ୍କ ନିକଟରେ ପହଞ୍ଚତ୍ ନୂଆକରି ଇସ୍ତଫାପତ୍ର ପ୍ରଦାନ କରିଛନ୍ତି। ବାଚସ୍ପତି ସନ୍ଧ୍ୟା ୭ଟାରେ ଏକ ଖବରଦାତା ସମ୍ମିଳନୀରେ କହିଛନ୍ତି, ଶାସକ ମେଣ୍ଟର ବିଧାୟକମାନଙ୍କ ଇସ୍ତଫା ସ୍ବେଚ୍ଛାକୃତ ଓ ଠିକ୍ କି ନୁହେଁ ତାହା ଯାଞ୍ଚ କରାଯିବ। ନିୟମାନୁସାରେ ଇସ୍ତଫାପତ୍ର ସମ୍ପୂର୍ଣ୍ଣ ଫର୍ମାଟରେ ହେବା ଉଚିତ। ଦୁର୍ଭାଗ୍ୟବଶତଃ ଗତ ସପ୍ତାହରେ ଚାମ୍ବରରେ ପହଞ୍ଚତ୍ଥିବା ୧୩ ଇସ୍ତଫାପତ୍ର ମଧ୍ୟରୁ ୮ଟି ଉପଯୁକ୍ତ ଫର୍ମାଟରେ ନ ଥିଲା। କର୍ନାଟକ ଆସେମ୍ଲି ରୁଲ୍ସ ଆଣ୍ଡ ପ୍ରୋସିଡ୍ୟୁରର ନିୟମ ୨୦୧ ଅନୁସାରେ ଯାଞ୍ଚ ପରେ ଏହା ଜଣାପଡ଼ିଥିଲା। ଏବେ ନୂଆ ଇସ୍ତଫା ଯାଞ୍ଚ କରି ସୁପ୍ରିମକୋର୍ଟଙ୍କୁ ଅବଗତ କରାଯିବ। ସମ୍ବିଧାନର ନିୟମାନୁସାରେ ସବୁକିଛି ହେବ। ତରବରିଆ ଭାବେ କି ବିଜୁଳି ବେଗରେ କିଛି କରାଯିବ ନାହିଁ ବୋଲି ବାଚସ୍ପତି କେ.ଆର. ରମେଶ ସୂଚନା ଦେଇଛନ୍ତି।
