ସୋନପୁର,୨୯।୩(ନି.ପ୍ର.) କରୋନା ସଂକ୍ରମଣକୁ ଆଖି ଆଗରେ ରଖି ସୁବର୍ଣ୍ଣପୁର ଜିଲା ପ୍ରଶାସନ ପକ୍ଷରୁ ଜୋରଦାର ପ୍ରସ୍ତୁତି କରାଯାଉଛି। କରୋନା ସନ୍ଦିଗ୍ଧଙ୍କୁ ରଖିବା ପାଇଁ ଜିଲାର ୬ଟି ବ୍ଲକର ବିଭିନ୍ନ ପଞ୍ଚାୟତ ଓ ୩ଟି ସହରରେ ମୋଟ ୧୬୧ଟି ଅସ୍ଥାୟୀ ଚିକିତ୍ସା କେନ୍ଦ୍ର ଖୋଲାଯିବ। ଏଥିରେ ମୋଟ ୧୦୯୫୦ଶଯ୍ୟା ରହିବ। ଜିଲାପାଳ ମୋନିଷା ବାନାର୍ଜୀଙ୍କ ନିର୍ଦ୍ଦେଶକ୍ରମେ ଏହି କେନ୍ଦ୍ରଗୁଡିକୁ ଯୁଦ୍ଧକାଳୀନ ଭିତ୍ତିରେ ପ୍ରସ୍ତୁତ କରାଯାଉଛି। ଶନିବାର ସୁଦ୍ଧା ୧୩୫ଟି କେନ୍ଦ୍ର ପ୍ରସ୍ତୁତ ହୋଇ ସାରିଥିବା ବେଳେ ଅପ୍ରେଲ ୩ ତାରିଖ ସୁଦ୍ଧା ବାକି କେନ୍ଦ୍ରଗୁଡିକ ସମ୍ପୂର୍ଣ୍ଣ କରିବାକୁ ଲକ୍ଷ୍ୟ ରହିଛି । ସୋନପୁର ବ୍ଲକରେ ୧୪୦୦ଶଯ୍ୟା ବିଶିଷ୍ଟ ୨୦ଟି କେନ୍ଦ୍ର, ବିନିକାରେ ୧୦୧୦ଶଯ୍ୟା ବିଶିଷ୍ଟ ୧୭ଟି, ବୀରମହାରାଜପୁରରେ ୧୫୦୦ଶଯ୍ୟା ବିଶିଷ୍ଟ ୧୭ଟି, ଡୁଙ୍ଗୁରିପାଲିରେ ୨୬୦୦ଶଯ୍ୟା ବିଶିଷ୍ଟ ୨୬ଟି, ତରଭାରେ ୨୧୦୦ଶଯ୍ୟା ବିଶିଷ୍ଟ ୪୭ଟି ଓ ଉଲୁଣ୍ଡାରେ ୧୭୦୦ଶଯ୍ୟା ବିଶିଷ୍ଟ ୨୩ଟି କେନ୍ଦ୍ର ଖୋଲାଯିବ। ସେହିପରି ସୁବର୍ଣ୍ଣପୁର ସହରରେ ୪୦୭ଶଯ୍ୟା ବିଶିଷ୍ଟ ୫ଟି, ତରଭା ସହରରେ ୮୦ଶଯ୍ୟା ବିଶିଷ୍ଟ ୨ଟି ଓ ବିନିକା ସହରରେ ୧୫୭ଶଯ୍ୟା ବିଶିଷ୍ଟ ୪ଟି କେନ୍ଦ୍ର ଖୋଲାଯିବାର ଯୋଜନା ରହିଛି। ସମସ୍ତ କେନ୍ଦ୍ର ଓ ବ୍ଲକ ପାଇଁ ନୋଡାଲ ଅଫିସର ନିଯୁକ୍ତ କରାଯାଇଛି। ଦାଦନ ଶ୍ରମିକ ଭାବେ ଅନ୍ୟ ରାଜ୍ୟକୁ କାମ କରିବାକୁ ଯାଇଥିବା ହଜାର ହଜାର ଶ୍ରମିକ ଏବେ ଘରକୁ ଫେରିଛନ୍ତି। ତେଣୁ କରୋନା ସଂକ୍ରମଣ ରୋକିବାକୁ ସାମୟିକ ଚିକିତ୍ସା କେନ୍ଦ୍ରର ଯଥେଷ୍ଟ ଗୁରୁତ୍ୱ ରହିଛି। ଶନିବାର ଜିଲାପାଳ ବାନାର୍ଜୀ, ଅତିରିକ୍ତ ଜିଲାପାଳ ଶରତ ଚନ୍ଦ୍ର ପଣ୍ଡା, ମ୍ୟୁନିସିପାଲିଟି ନିର୍ବାହୀ ଅଧିକାରୀ ସୂର୍ଯ୍ୟାଂଶୁ ରୁଟ୍ ସୁବର୍ଣ୍ଣପୁର ସହରର ହାତୀଶାଳ ସ୍ଥିତ ମ୍ୟୁନିସିପାଲିଟି କଲ୍ୟାଣ ମଣ୍ଡପ, ସଂସ୍କୃତି ଭବନ, ଇନ୍ଡୋର ଷ୍ଟାଡିୟମ, ଗାନ୍ଧୀ ଷ୍ଟାଡିୟମ ଗ୍ୟାଲେରୀ ଓ ଟାଉନ ହଲ ବୁଲି ସ୍ଥିତି ଅନୁଧ୍ୟାନ କରିଥିଲେ। ଏହି ସବୁ ସ୍ଥାନରେ ଅସ୍ଥାୟୀ ସ୍ବାସ୍ଥ୍ୟକେନ୍ଦ୍ର ଖାଲାଯିବ।
