ନୂଆଦିଲ୍ଲୀ, ୧୪ା୩: ଆମେରିକା, ୟୁରୋପୀୟ ଦେଶ ସମେତ ଅନ୍ୟ ଦେଶଗୁଡ଼ିକ ରୁଷିଆ ଉପରେ କଟକଣା ଲଗାଇବା ଫଳରେ ମସ୍କୋର ଅର୍ଥନୀତିରେ ଉପରେ ଏହାର ବ୍ୟାପକ ପ୍ରଭାବ ପଡ଼ିଛି। ବାଣିଜ୍ୟ କାରବାର ଘୋର ପ୍ରଭାବିତ ହେବା ସହ ରୁଷିଆ ମୁଦ୍ରା ରୁବଲ ମୂଲ୍ୟ ହ୍ରାସ ପାଇବାରେ ଲାଗିଛି। ଏଥିଯୋଗୁ ଦେଶରେ ମୂଦ୍ରାସ୍ଫୀତି ମଧ୍ୟ ବୃଦ୍ଧି ପାଇଛି। ଏପରି ସ୍ଥିତିରେ ନିଜ ଅର୍ଥନୀତି ବଞ୍ଚାଇବା ନିମନ୍ତେ ରୁଷିଆ ଅଶୌଧିତ ତୈଳ ଏବଂ ଗ୍ୟାସ୍କୁ ଭାରତକୁ କମ୍ ମୂଲ୍ୟରେ ବିକ୍ରି ନିମନ୍ତେ ପ୍ରସ୍ତାବ ଦେଇଛି। ପେଟ୍ରୋଲ ଡିଜେଲ ଦର ଏବଂ ମୁଦ୍ରାସ୍ଫୀତି ବୃଦ୍ଧିରେ ନିୟନ୍ତ୍ରଣ ରଖିବା ପାଇଁ କେନ୍ଦ୍ରର ଭାଜପା ସରକାର ରୁଷିଆଠାରୁ କମ୍ ମୂଲ୍ୟରେ ତୈଳ କିଣିବାକୁ ଚିନ୍ତା କରୁଥିବା ଜଣାପଡ଼ିଛି।
ଆବଶ୍ୟକ କରୁଥିବା ତୈଳର ୮୦ ପ୍ରତିଶତ ବାହାରୁ ଆମଦାନୀ କରିଥାଏ। ସେଥିରୁ ୨ର ୩% ରୁଷିଆରୁ ଆସିଥାଏ। ଚଳିତ ବର୍ଷ ତୈଳ ଦରରେ ୪୦% ବୃଦ୍ଧି କାରଣରୁ ସରକାର ଏବେ କମ୍ ମୂଲ୍ୟରେ ରୁଷିଆରୁ ତେଲ କିଣିବା ନିମନ୍ତେ ଚିନ୍ତା କରୁଥିବା ସରକାରୀ ସୂତ୍ରରୁ ଜଣାଯାଇଛି। ମସ୍କୋରୁ ତେଲ ଆଣିବା ଦିଗରେ ଯଥେଷ୍ଟ ଟ୍ୟାଙ୍କର, ଇନ୍ସ୍ୟୁରାନ୍ସ କଭର୍, ଅଏଲ୍ ବ୍ଲେଣ୍ଡ ଆଦିରେ ଅସୁବିଧା ରହିଛି। ଏହା ସମାଧାନ ହେବା ପରେ ରୁଷିଆ ଅଫର୍କୁ ଗ୍ରହଣ କରାଯିବ ବୋଲି କେନ୍ଦ୍ରର ଜଣେ ଅଧିକାରୀ କହିଛନ୍ତି।
