ମୁମ୍ବାଇ, ୧୪।୧- ସ୍ଥାନୀୟ ଓ୍ବାଙ୍ଖେଡେ ଷ୍ଟାଡିୟମରେ ମଙ୍ଗଳବାର ଅନୁଷ୍ଠିତ ଦିନିକିଆ କ୍ରିକେଟ ମ୍ୟାଚରେ ଭାରତ ବିପକ୍ଷରେ ଦମ୍ଦାର ବିଜୟ ହାସଲ କରିଛି ଅଷ୍ଟ୍ରେଲିଆ। ଓପନର ଡେଭିଡ ଓ୍ବାର୍ନର ଓ ଅଧିନାୟକ ଆରନ ଫିଞ୍ଚ୍ଙ୍କ ଅପରାଜିତ ଶତକ ବଳରେ ଅଷ୍ଟ୍ରେଲିଆ ୧୦ ଉଇକେଟରେ ଭାରତକୁ ପରାସ୍ତ କରିଛି। ନିକଟ ଅତୀତରେ ଭାରତର ଏହା ସବୁଠାରୁ ନିକୃଷ୍ଟ ବୋଲିଂ ପ୍ରଦର୍ଶନ ଏବଂ ବୃହତ୍ ପରାଜୟ। ଭାରତ ପକ୍ଷରୁ ଧାର୍ଯ୍ୟ ୨୫୬ ରନର ବିଜୟ ଲକ୍ଷ୍ୟର ପିଛା କରି ଅଷ୍ଟ୍ରେଲିଆ କୌଣସି ଉଇକେଟ ନ ହରାଇ ମାତ୍ର ୩୭.୪ ଓଭରରେ ୨୫୮ ରନ ସଂଗ୍ରହ କରି ନେଇଥିଲା। ବିସ୍ଫୋରକ ଓପନର ଓ୍ବାର୍ନର ୧୧୨ ବଲ୍ରୁ ୧୭ ଚୌକା ଓ ୩ ଛକା ସହାୟତାରେ ୧୨୮ ଓ ଫିଞ୍ଚ୍ ୧୧୪ ବଲ୍ରୁ ୧୩ ଚୌକା ଓ ୨ ଛକା ସହ ୧୧୦ ରନରେ ଅପରାଜିତ ରହିଥିଲେ। ଏହି ଦୁଇ ବ୍ୟାଟ୍ସମ୍ୟାନଙ୍କ ନିକଟରେ ଭାରତୀୟ ବୋଲିଂ ଅତ୍ୟନ୍ତ ମାମୁଲି ସାବ୍ୟସ୍ତ ହୋଇଥିଲା। ୫ ଜଣ ଯାକ ବୋଲର ମହଙ୍ଗା ସାବ୍ୟସ୍ତ ହୋଇଥିଲେ। ଏହି ବିଜୟ ସହ ୩ ମ୍ୟାଚ ବିଶିଷ୍ଟ ସିରିଜରେ ଅଷ୍ଟ୍ରେଲିଆ ୧-୦ରେ ଅଗ୍ରଣୀଲାଭ କରିଛି।
