ଭୁବନେଶ୍ୱର,୨୬।୫(ବ୍ୟୁରୋ): ମହାମାରୀ କରୋନା ସହ ଲଢ଼େଇ ଲମ୍ବା ଲଢ଼େଇ। ଓଡ଼ିଶାକୁ ଏହି ରୋଗ ପ୍ରବେଶ କରିବାର ପ୍ରାୟ ଦୁଇମାସ ହୋଇଗଲାଣି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଙ୍ଗଳବାର ସମୀକ୍ଷା ବୈଠକରେ ଏହାକୁ ଅଜଣା ଶତ୍ରୁ ବୋଲି କହିଛନ୍ତି। ହେଲେ ବିଗତ ଦୁଇ ମାସ ମଧ୍ୟରେ ରାଜ୍ୟ ସରକାର ଅନେକ ଶିକ୍ଷା ଲାଭ କରିଛନ୍ତି। ବିଭିନ୍ନ ଗାଇଡଲାଇନ୍ ଦେଖିଛୁ, ରିସର୍ଚ୍ଚ ଇନ୍ଷ୍ଟିଚ୍ୟୁଟ୍ ସହ ଯୋଗାଯୋଗ କରାଯାଇଛି। ଏହାଦ୍ୱାରା ଯେଉଁ ସଫଳତା ମିଳିଛି, ତାକୁ ସମସ୍ତେ ପ୍ରଶଂସା କରିଛନ୍ତି। ହେଲେ ଏବେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ୧୫ ଦିନ ସ୍ବତନ୍ତ୍ର ପଦକ୍ଷେପ ନିଆଯିବ। ବୟସ୍କ ଏବଂ ସମ୍ବେଦନଶୀଳ ଲୋକଙ୍କ ବିଷୟରେ ତଥ୍ୟ ନିଆଯିବ। ଓଡ଼ିଶାରେ ଟେଷ୍ଟିଂ ହାର ଜାତୀୟ ହାରଠାରୁ ଅଧିକ। କରୋନା ମୁକାବିଲାକୁ ନେଇ ରାଜ୍ୟ ସରକାରଙ୍କ ପଦକ୍ଷେପ ବିଷୟରେ ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ ମଙ୍ଗଳବାର ଆୟୋଜିତ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
ସେ କହିଛନ୍ତି, ଓଡ଼ିଶାର ଜନସଂଖ୍ୟା ୪ କୋଟି ୬୦ ଲକ୍ଷ। ରାଜ୍ୟରେ ଏବେ ଦିନକୁ ପାଖାପାଖୀ ୩ହଜାର ଟେଷ୍ଟ କରାଯାଉଥିବା ବେଳେ ସାରା ଭାରତରେ ଏହା ୨୩୬୦ ରହିଛି। ସେହିଭଳି ୨.୮୬% ଜାତୀୟ ହାର ଥିବା ବେଳେ ଓଡ଼ିଶାରେ ମୃତ୍ୟୁ ସଂଖ୍ୟା ୦.୪୬% ରହିଛି। ମଙ୍ଗଳବାର ସୁଦ୍ଧା ଦେଶରେ ମୋଟ ୩୧,୩୬,୧୧୯ ନମୂନା ପରୀକ୍ଷଣ ହୋଇଥିବା ବେଳେ ରାଜ୍ୟରେ ୧,୩୧,୫୯୫ ଟେଷ୍ଟ ହୋଇଛି ବୋଲି ସେ ସୂଚନା ଦେଇଛନ୍ତି।
