ଲକ୍ଡାଉନ୍ ସମୟରେ ରିକ୍ସା ଚାଳକମାନେ ସେମାନଙ୍କ ଦୈନନ୍ଦିନ ରୋଜଗାର ହରାଇ ବସିଥିବାବେଳେ ମହାରାଷ୍ଟ୍ରର ଜଣେ ଅଟୋଚାଳକଙ୍କ ବଦାନ୍ୟତା ଏବେ ସାମ୍ନାକୁ ଆସିଛି। ନଭି ମୁମ୍ବାଇର ଆୟାଜ ଫାକୁହି ଅସହାୟମାନଙ୍କୁ ମାଗଣାରେ ଖାଦ୍ୟ ଯୋଗାଇ ଦେଉଛନ୍ତି। କେବଳ ଏତିକି ନୁହେଁ, ସେ ଗରିବ ଲୋକମାନଙ୍କୁ ବି ମାଗଣାରେ ହସ୍ପିଟାଲକୁ ନେଉଛନ୍ତି। ଆୟାଜ ତାଙ୍କ ଅଟୋର ନାମ ରଖିଛନ୍ତି ‘ଖିଦମତ’ ଅର୍ଥାତ ନିଃସ୍ବାର୍ଥପର ସେବା। ସେ କର୍ତ୍ତୃପକ୍ଷଙ୍କଠାରୁ ଅନୁମତି ନେଇ ନଭି ମୁମ୍ବାଇରେ ଗରିବ ରୋଗୀ ଓ ତାଙ୍କ ପରିବାରକୁ ମାଗଣାରେ ସେବା ଯୋଗାଇ ଦେଉଛନ୍ତି। ତାଙ୍କ ଘର ପାଖରେ ଛୋଟବଡ଼ ୫ଟି ହସ୍ପିଟାଲ ରହିଥିବାରୁ ଲକଡାଉନରେ ଗରିବମାନଙ୍କ ଦୁର୍ଦ୍ଦଶା ଦେଖି ଏହି କାର୍ଯ୍ୟ ଆରମ୍ଭ କରିଥିଲେ ବୋଲି କୁହନ୍ତି ୫୫ ବର୍ଷୀୟ ଆୟାଜ। ସେ ସ୍ବାସ୍ଥ୍ୟକର୍ମୀମାନଙ୍କୁ ବି ମାଗଣାରେ ହସ୍ପିଟାଲକୁ ନେଉଛନ୍ତି। ଆୟାଜ ତାଙ୍କ ଅଟୋ ସାମ୍ନାରେ ‘ଏମର୍ଜେନ୍ସି ଫ୍ରି ରାଇଡ୍’ ବ୍ୟାନର୍ ବି ଲଗାଇଛନ୍ତି ଓ ସେଥିରେ ତାଙ୍କ ଫୋନ୍ ନମ୍ବର ମଧ୍ୟ ଉଲ୍ଲେଖ କରିଛନ୍ତି। ସେ ପ୍ରଥମେ ହସ୍ପିଟାଲ୍ ସାମ୍ନାରୁ ଲୋକମାନଙ୍କୁ ନେଉଥିଲେ। ପରେ ନଭି ମୁମ୍ବାଇର ବିଭିନ୍ନ ସ୍ଥାନ ଓ ଗାଁମାନଙ୍କରୁ ତାଙ୍କ ପାଖକୁ କଲ୍ ଆସିବାରେ ଲାଗିଛି। ଏବେ ସେ ଦିନରାତି ସେବା ଯୋଗାଇ ଦେବା ପାଇଁ ପ୍ରସ୍ତୁତ ରହୁଛନ୍ତି। ବର୍ତ୍ତମାନ ସୁଦ୍ଧା ସେ ୩୦୦ରୁ ଊର୍ଦ୍ଧ୍ୱ ଗରିବ ଲୋକଙ୍କୁ ମାଗଣାରେ ଅଟୋରେ ନେଇ ସାରିଲେଣି। ନଭି ମୁମ୍ବାଇରେ ଲୋକମାନଙ୍କୁ ଖାଦ୍ୟ ଯୋଗାଉଥିବା ଏନ୍ଜିଓଗୁଡ଼ିକୁ ଖାଦ୍ୟ ନେବା ଆଣିବାରେ ମଧ୍ୟ ସାହାଯ୍ୟ କରୁଛନ୍ତି। ଗରିବଙ୍କୁ ଲକ୍ଡାଉନରେ ସେବା ଯୋଗାଇ ଦେଉଥିବାର ସୁଯୋଗ ପାଇଥିବାରୁ ବହୁତ ଖୁସି ବୋଲି କହନ୍ତି ଆୟାଜ।
