ଚମ୍ପୁଆ, ୮।୫(ଡି.ଏନ.ଏ.)- କରୋନା ମହାମାରୀ ପାଇଁ ସରକାରଙ୍କ ନିର୍ଦ୍ଦେଶ ପରେ ଉପାନ୍ତ ଅଞ୍ଚଳର ସୀମା ସିଲ୍ କରାଯାଇଛି। ଏଠାରେ ବ୍ୟାପକ ତନଖି ସହିତ ଅନୁପ୍ରବେଶ ରୋକିବା ଏବଂ ରାଜ୍ୟ ବାହାରେ କାମ କରୁଥିବା ପ୍ରବାସୀ ଶ୍ରମିକମାନେ ଓଡିଶା ମଧ୍ୟକୁ ପ୍ରବେଶ ସମୟରେ ତାଙ୍କର ସ୍ବାସ୍ଥ୍ୟ ପରୀକ୍ଷା କରାଯିବା ସହିତ ସଙ୍ଗରୋଧ ଗୃହରେ ରଖା ଯିବା ପାଇଁ ପୋଲିସ ଓ ପ୍ରଶାସନ ପକ୍ଷରୁ ମିଳିତ ଉଦ୍ୟମ ଜାରି ରହିଛି। ଏନେଇ ଚମ୍ପୁଆ ଓ ଜୟନ୍ତିଗଡ ମଝିରେ ଚେକପୋଷ୍ଟ କରାଯାଇ ୨୪ ଘଣ୍ଟିଆ ଡ୍ୟୁଟି ବ୍ୟବସ୍ଥା କରାଯାଉଛି। ମାତ୍ର ଶ୍ରମିକମାନେ ଏହି ଚେକିଂକୁ ଚକମା ଦେଖାଇ ଏକ ଟ୍ରେଲର ଡାଲାରେ ବସି ଖସି ଯିବାକୁ ଚେଷ୍ଟା କରୁଥିବା ବେଳେ ଧରାପଡ଼ିଛନ୍ତି। ସୂଚନା ଅନଯାୟୀ, ବୁଧବାର ରାତି ପ୍ରାୟ ୮ଟା ସମୟରେ ରାଜସ୍ଥାନ ନମ୍ବର ଥିବା ଏକ ମାଲବାହି ଟ୍ରେଲର ସୀମାନ୍ତ ଅତିକ୍ରମ କରୁଥିବା ବେଳେ ପୋଲିସ କର୍ମଚାରୀ ଯାଞ୍ଚ କରିଥିଲେ। କାଗଜ ପତ୍ରରୁ ଟ୍ରେଲରଟି ଖାଲି ଗାଡ଼ି ବୋଲି ଜଣାପଡିଥିଲେ ହେଁ ଗାଡି ଉପରେ ଘୋଡାଯାଇଥିବା ପାଲକୁ ପୋଲିସ ସନ୍ଦେହରେ ଖୋଲିବାରୁ ଡାଲା ମଧ୍ୟରେ ୪୭ ଜଣ ଶ୍ରମିକ ଥିବା ଜଣାପଡ଼ିଥିଲା। ଉକ୍ତ ୪୭ ଜଣଙ୍କ ସ୍ବାସ୍ଥ୍ୟ ପରୀକ୍ଷା କରାଯାଇ ଗୁରୁବାର ସନ୍ଧ୍ୟାରେ ସେମାନଙ୍କୁ କୋଟା ପଠାଯାଇଥିବା ପୋଲିସ ଅଧିକାରୀ ସୂଚନା ଦେଇଛନ୍ତି।
