ନୂଆଦିଲ୍ଲୀ,୧୨ା୯ (ପି.ଟି./ଆଇଏଏନ୍ଏସ୍): ଉନ୍ନାଓ ପୀଡ଼ିତା ଚିକିତ୍ସିତ ହେଉଥିବା ନୂଆଦିଲ୍ଲୀର ଏମ୍ସରେ ବୁଧବାର ‘ଇନ୍ କ୍ୟାମେରା’ ପ୍ରୋସିଡିଂ ଆରମ୍ଭ ହୋଇଛି। ବଳାତ୍କାର ପୀଡ଼ିତାଙ୍କ ବୟାନ ରେକର୍ଡ ପାଇଁ ସେଠାରେ ଏକ ଅସ୍ଥାୟୀ କୋର୍ଟ ପ୍ରତିଷ୍ଠା କରାଯାଇଛି। ଏମ୍ସର ଆପେକ୍ସ ଟ୍ରମା ସେଣ୍ଟରରେ ଜିଲା ଜଜ୍ ଧର୍ମେଶ ଶର୍ମା ତାଙ୍କର ବୟାନ ରେକର୍ଡ କରିଛନ୍ତି। ଭାଜପାରୁ ନିଲମ୍ବିତ ବିଧାୟକ କୁଳଦୀପ ସିଂ ସେନଗାର ଓ ସହଅଭିଯୁକ୍ତ ଶଶୀ ସିଂଙ୍କୁ ମଧ୍ୟ ଅସ୍ଥାୟୀ ଅଦାଲତକୁ ନିଆଯାଇଛି। ‘ଇନ୍ କ୍ୟାମେରା’ ପ୍ରୋସିଡିଂ ବେଳେ ସର୍ବସାଧାରଣ ଓ ଗଣମାଧ୍ୟମକୁ ଉପସ୍ଥିତ ରହିବାକୁ ଅନୁମତି ଦିଆଯାଇନାହିଁ। ପ୍ରକାଶ ଯେ, ୨୦୧୭ରେ ଗଣବଳାତ୍କାରର ଶିକାର ହୋଇଥିବା ପୀଡ଼ିତା ତାଙ୍କର ସମ୍ପର୍କୀୟଙ୍କ ସହ ଗତ ଜୁଲାଇ ୨୮ରେ କାର୍ରେ ଯାଉଥିବାବେଳେ ଏକ ଟ୍ରକ୍ ଧକ୍କା ଦେଇଥିଲା। ଏଥିରେ ତାଙ୍କର ଦୁଇଜଣ ଖୁଡୀ ପ୍ରାଣ ହରାଇଥିବାବେଳେ ପୀଡ଼ିତା ଗୁରୁତର ହୋଇଥିଲେ। ଏମ୍ସରେ ପୀଡ଼ିତାଙ୍କ ବୟାନ ରେକର୍ଡ ପାଇଁ ଶୁକ୍ରବାର ଦିଲ୍ଲୀ ହାଇକୋର୍ଟ ଅନୁମତି ଦେଇଥିଲେ। ଏହାପୂର୍ବରୁ ସୁପ୍ରିମକୋର୍ଟଙ୍କ ନିର୍ଦ୍ଦେଶକ୍ରମେ ପୀଡ଼ିତାଙ୍କୁ ଲକ୍ଷ୍ନୌର ଏକ ହସ୍ପିଟାଲରୁ ଉନ୍ନତ ଚିକିତ୍ସା ପାଇଁ ବିମାନରେ ଦିଲ୍ଲୀ ଅଣାଯାଇଥିଲା। ଏ ସମ୍ପର୍କିତ ସମସ୍ତ ମାମଲା ଉତ୍ତରପ୍ରଦେଶରୁ ଦିଲ୍ଲୀକୁ ସ୍ଥାନାନ୍ତର କରାଯାଇଛି।
