ଭଞ୍ଜନଗର/ବୁଗୁଡା/ଆସିକା,୨୯।୨(ଡି.ଏନ୍.ଏ.) – କୃଷ୍ଣସାର ମୃଗ ଗଞ୍ଜାମ ଜିଲାର ଦକ୍ଷିଣ ଘୁମୁସର ବନଖଣ୍ଡରେ ପ୍ରାୟ ଦେଖାଦିଏ। ବ୍ରହ୍ମପୁର ଓ ଭଞ୍ଜନଗର ଉତ୍ତର ଘୁମୁସର ବନଖଣ୍ଡରେ କମ୍ ଦେଖାଦିଅନ୍ତି। ପ୍ରତି ଦୁଇବର୍ଷକୁ ଥରେ ରାଜ୍ୟରେ କୃଷ୍ଣସାର ମୃଗ ଗଣନା ହୁଏ। ଶୁକ୍ରବାର ଗଞ୍ଜାମ ଜିଲାର ୩ ବନଖଣ୍ଡରେ ମୃଗ ଗଣନା ହୋଇଛି। ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ଓ ଦକ୍ଷିଣ ଘୁମୁସର ବନଖଣ୍ଡରେ ପୂର୍ବ ଗଣନା ଅପେକ୍ଷା ମୃଗ ସଂଖ୍ୟା ବହୁତ ବୃଦ୍ଧି ପାଇଥିବା ଜଣାପଡିଛି। ଦୁଇବର୍ଷ ପୂର୍ବେ ପ୍ରଥମ ଥର ପାଇଁ ଉତ୍ତର ଘୁମୁସର ବନଖଣ୍ଡରେ କୃଷ୍ଣସାର ମୃଗ ଗଣନା ହୋଇଥିଲା। ଏଥିରେ ୨୨୪ ମୃଗ ଥିବା ଜଣାପଡିଛି। ଚଳିତ ବର୍ଷ ଏମାନଙ୍କ ସଂଖ୍ୟା ବୃଦ୍ଧି ପାଇଥିବା ଥିବା ଜଣାପଡିଛି। ଡିଏଫଓ ଅଭୟ କୁମାର ଦଳେଇଙ୍କ ନେତୃତରେ ୩୦ଟି ଟିମ୍ ଗଠନ ହୋଇ ମୃଗ ଗଣନା କରିଥିଲେ।
ସେହିଭଳି ଦକ୍ଷିଣ ଘୁମୁସର ବନଖଣ୍ଡରେ ଦୁଇବର୍ଷ ପୂର୍ବେ ହୋଇଥିବା ଗଣନା ସମୟରେ ପ୍ରାୟ ୨୮ଶହ ମୃଗ ଥିଲେ। ଶୁକ୍ରବାର ଗଣନା ସମୟରେ ତା’ଠାରୁ ଅଧିକ ମୃଗ ଥିବା ବିଭାଗ ପକ୍ଷରୁ ଅନୁମାନ କରାଯାଉଛି। ଦକ୍ଷିଣ ଘୁମୁସର ବନଖଣ୍ଡର ବୁଗୁଡା, ପୋଲସରା, ଆସିକା ପ୍ରମୁଖ ରେଞ୍ଜରେ ପ୍ରାୟ କୃଷ୍ଣସାର ମୃଗ ଦେଖାଦିଅନ୍ତି। ଦକ୍ଷିଣ ଘୁମୁସର ବନଖଣ୍ଡ ଅଧିକାରୀ ସତ୍ୟନାରାୟଣ ବେଉରାଙ୍କ ନେତୃତରେ ୬୩ଟି ଟିମ୍ ଗଠନ ହୋଇଥିଲା ମୃଗ ଗଣନା ପାଇଁ। କର୍ମଚାରୀମାନେ ସକାଳ ୬ଟାରୁ ଦିବା ୧୨ ଟା ପର୍ଯ୍ୟନ୍ତ ଗଣନା କରିଥିଲେ। ବିଭାଗୀୟ ଉଚ୍ଚ ପଦାଧିକାରୀ ଏବଂ ବିଶେଷଜ୍ଞମାନେ ଯାଞ୍ଚ କରିବା ପରେ ଚୂଡାନ୍ତ ରିପୋର୍ଟ ପ୍ରକାଶିତ ହେବ।
