ଲଣ୍ଡନ, ୧୪।୬(ପି.ଟି.): ଆସନ୍ତା ଜୁଲାଇରେ ଇଂଲଣ୍ଡ ଓ ଓ୍ବେଷ୍ଟଇଣ୍ଡିଜ ମଧ୍ୟରେ ଟେଷ୍ଟ ସିରିଜ ଆରମ୍ଭ ହେବ। କରୋନା ଭାଇରସ ସଂକ୍ରମଣ ଜନିତ ଲକ୍ଡାଉନ୍ ପରେ ଇଂଲଣ୍ଡରେ ଏହା ହେବ ପ୍ରଥମ କ୍ରିକେଟ ସିରିଜ। ଇଂଲଣ୍ଡର ନିୟମିତ ଅଧିନାୟକ ଜୋ ରୁଟ୍ଙ୍କ ଅନୁପସ୍ଥିତିରେ ବେନ୍ ଷ୍ଟୋକ୍ସ ଦଳର ନେତୃତ୍ୱ ନେବା ଏକ ପ୍ରକାର ନିଶ୍ଚିତ ହୋଇଛି। ନିଜ ଦ୍ୱିତୀୟ ସନ୍ତାନ ଜନ୍ମ ସମୟରେ ପରିବାର ସହିତ ରହିବେ। ତେଣୁ ଏହାପରେ ତାଙ୍କୁ ୭ ଦିନ ବ୍ୟକ୍ତିଗତ ଆଇସୋଲେଶନରେ ରହିବାକୁ ପଡ଼ିବ। ଫଳରେ ପ୍ରଥମ ଟେଷ୍ଟରେ ସେ ଦଳର ନେତୃତ୍ୱ ନେବାନେଇ ସନ୍ଦେହ ଦୃଢ଼ୀଭୂତ ହୋଇଛି। ଜୁଲାଇ ୮ରେ ଏଜେସ ବାଉଲଠାରେ ପ୍ରଥମ ଟେଷ୍ଟ ଆରମ୍ଭ ହେବ। ରୁଟ୍ଙ୍କ ସ୍ତ୍ରୀ ପାଖାପାଖି ସେହି ସମୟରେ ଦ୍ୱିତୀୟ ସନ୍ତାନର ଜନନୀ ହେବା ସମ୍ଭାବନା ରହିଛି। ”ଅଧିନାୟକ ରୁଟ୍ ଆସନ୍ତା ଗ୍ରୀଷ୍ମ ସିଜନରେ ଗୋଟିଏ ଟେଷ୍ଟ ନ ଖେଳିବା ଏକପ୍ରକାର ନିଶ୍ଚିତ। କାରଣ ସେ ସେହି ସମୟରେ ନିଜ ସ୍ତ୍ରୀଙ୍କ ନିକଟରେ ରହିବେ। ତେଣୁ ଉପ-ଅଧିନାୟକଭାବେ ମୋତେ ଇଂଲଣ୍ଡ ଦଳର ନେତୃତ୍ୱ ନେବାକୁ ହେବ“ ବୋଲି ଷ୍ଟୋକ୍ସ ଏକ ସ୍ତମ୍ଭରେ ଉଲ୍ଲେଖ କରିଛନ୍ତି। ଏହି ଅବସରରେ ଷ୍ଟୋକ୍ସ ବାସ୍କେଟବଲ ଲିଜେଣ୍ଡ ମାଇକେଲ ଜୋର୍ଡାନ ତାଙ୍କ ଚିକାଗୋ ବୁଲ୍ସ ଟିମ୍ମେଟ୍ ସ୍କଟି ପିପେନଙ୍କ ନାମ ନେଇଛନ୍ତି। ରୁଟ୍ ଜୋର୍ଡାନ ହେଲେ ମୁଁ ପିପେନ। ଏହା ହେଉଛି ରୁଟ୍ଙ୍କ ଦଳ ବୋଲି କହିଛନ୍ତି ଷ୍ଟୋକ୍ସ। ପ୍ରକାଶଯୋଗ୍ୟ ଯେ, ଷ୍ଟୋକ୍ସ ଜଣେ ବିଚକ୍ଷଣ ଅଧିନାୟକ ବୋଲି କିଛିଦିନ ପୂର୍ବରୁ ରୁଟ୍ କହିବା ସହିତ ନେତୃତ୍ୱ ନେବାର ଦକ୍ଷତା ତାଙ୍କର ରହିଛି ବୋଲି ପ୍ରକାଶ କରିଥିଲେ।
