ହ୍ୟୁଷ୍ଟନ,୧୪ା୯(ପି.ଟି.): ହ୍ୟୁଷ୍ଟନ ସହରରେ ସେପ୍ଟେମ୍ବର ୨୨ରେ ଅନୁଷ୍ଠିତ ହେବାକୁ ଥିବା ମେଗା ପ୍ରବାସୀ ଭାରତୀୟ ସମ୍ମିଳନୀ ‘ହାଓଡି ମୋଦି’ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସ୍ବାଗତ କରିବା ଲାଗି ୬୦ରୁ ଊର୍ଦ୍ଧ୍ୱ ଆମେରିକା କଂଗ୍ରେସ ଓ ସିନେଟ ସଦସ୍ୟ ଉପସ୍ଥିତ ରହିବେ। ସେମାନଙ୍କ ମଧ୍ୟରେ ପ୍ରଥମ ଆମେରିକୀୟ ହିନ୍ଦୁ କଂଗ୍ରେସ ସଦସ୍ୟା ତୁଲ୍ସୀ ଗାବାର୍ଡ ଏବଂ ଭାରତୀୟ ଆମେରିକୀୟ ସଦସ୍ୟ ରାଜା କ୍ରିଷ୍ଣମୂର୍ତ୍ତି ଅଛନ୍ତି। ଏହା ବ୍ୟତୀତ ବିଭିନ୍ନ ରାଜ୍ୟର ଗଭର୍ନର ମଧ୍ୟ ଉପସ୍ଥିତ ରହିବେ। ଏନ୍ଆର୍ଜି ଷ୍ଟାଡିୟମରେ ଭାରତୀୟ ଆମେରିକୀୟ ସମ୍ପ୍ରଦାୟ ପକ୍ଷରୁ ଏହି କାର୍ଯ୍ୟକ୍ରମ ଅନୁଷ୍ଠିତ ହେଉଛି ଯେଉଁଥିରେ ୫୦ ହଜାର ଲୋକ ଯୋଗଦେବେ ବୋଲି ଆଇଟି ସେବା ଏକ୍ସପେଡିଏନ୍ର ସିଇଓ ଜିତେନ୍ ଅଗ୍ରଓ୍ବାଲ ସୂଚନା ଦେଇଛନ୍ତି। ଆମେରିକାରେ ଏହା ସର୍ବବୃହତ୍ କାର୍ଯ୍ୟକ୍ରମ ହେବାକୁ ଯାଉଛି, ଯେଉଁଠି ମୋଦିଙ୍କ ଦୂରଦୃଷ୍ଟି ସମ୍ପର୍କରେ ତାଙ୍କ ମୁହଁରୁ ଶୁଣିବା ପାଇଁ ବହୁ ଶିଳ୍ପପତି, ବିଜ୍ନେସ୍ ଲିଡର, ଆଇନ ପ୍ରଣେତା ଉପସ୍ଥିତ ରହିବେ ବୋଲି ଜିତେନ୍ କହିଛନ୍ତି।
