ଭୁବନେଶ୍ୱର,୫ା୬(ବ୍ୟୁରୋ): ମୁର୍ଦ୍ଦାର ପରି ପଡ଼ି ରହିଛି କଟା ଗଣ୍ଡି। ଚାରିଆଡେ ଦେଖିବାକୁ ମିଳୁଛି ଭଙ୍ଗା ଗଛ। ଆକାଶକୁ ଚାହିଁ ରହିଛି ବଞ୍ଚତ୍ୟାଇଥିବା ଗଛର ଖେଣ୍ଟା ଡାଳ। ବାତ୍ୟା ‘ଫନୀ’ ସବୁଜିମାକୁ ଉଜାଡ଼ିଦେବା ପରେ ଏବେ ଥୁଣ୍ଟା ପାଲଟିଯାଇଛି ପୂରା ରାଜଧାନୀ। ମାସକ ପରେ ଥୁଣ୍ଟା ଡାଳକୁ କଅଁଳୁଛି ପତ୍ର। ହେଲେ ସ୍ବପ୍ନ ପାଲଟିଯାଇଛି ଛାଇ। ଛାଇ ଟିକେ ପାଇଁ ବାଟୋଇଙ୍କଠାରୁ ଅସହାୟ ମଣିଷ, ପଶୁପକ୍ଷୀ ସମସ୍ତେ ବ୍ୟାକୁଳ। ବୁଧବାର ବିଶ୍ୱ ପରିବେଶ ଦିବସ ସବୁଜିମାଭରା ପରିବେଶ ପାଇଁ ଆଣିଛି ବଡ଼ ଆହ୍ବାନ।
୧୯୭୩ରୁ ଜୁନ ୫କୁ ବିଶ୍ୱ ପରିବେଶ ଦିବସ ଭାବେ ପାଳନ କରାଯାଉଛି। ପ୍ରତିବର୍ଷ ଭୁବନେଶ୍ୱରରେ ମହାଆଡ଼ମ୍ବରରେ ପାଳନ କରାଯାଉଥିବାବେଳେ ଚଳିତବର୍ଷ ପ୍ରଳୟଙ୍କାରୀ ବାତ୍ୟା ‘ଫନୀ’ ଭୁବନେଶ୍ୱରର ସବୁଜିମା ପରିବେଶକୁ ସମ୍ପୂର୍ଣ୍ଣ ଧୋଇ ନେଇଛି। ନା ଗଛ ଅଛି ନାହିଁ ଟିକିଏ ଛାଇ ମିଳିପାରୁଛି। ରାସ୍ତା କଡ଼ ହେଉ କି ପାର୍କ, ଜଙ୍ଗଲ ହେଉକି କଲୋନୀର ବାରିବଗିଚା ସବୁଠି ବ୍ୟାପକ ଭାବେ ବୃକ୍ଷସମ୍ପଦର କ୍ଷୟକ୍ଷତି ଘଟିଛି। ଆବଶ୍ୟକ ପରିମାଣର ଗଛ ନ ଥିବାରୁ ସୂର୍ଯ୍ୟଙ୍କର ପ୍ରଚଣ୍ଡ ରୌଦ୍ରତାପ ସିଧାସଳଖ ମାଟିକୁ ଛୁଉଁଛି। ଫଳରେ ଭୁବନେଶ୍ୱରରେ ଅସହ୍ୟ ଗୁଳୁଗୁଳି ଓ ତାତି ଅନୁଭବ ହେଉଛି। ତେଣୁ ଜଙ୍ଗଲ ବିଭାଗ, ଭୁବନେଶ୍ୱର ଉନ୍ନୟନ କର୍ତ୍ତୃପକ୍ଷ(ବିଡିଏ) ଓ ଭୁବନେଶ୍ୱର ମହାନଗର ନିଗମ(ବିଏମ୍ସି) ସହ ବହୁ ସାମାଜିକ ଅନୁଷ୍ଠାନ ଭୁବନେଶ୍ୱରର ସବୁଜ ପରିବେଶକୁ ଫେରାଇ ଆଣିବାକୁ କସରତ ଆରମ୍ଭ କରିଦେଇଛନ୍ତି। ଜଙ୍ଗଲ ବିଭାଗ ପକ୍ଷରୁ ସାମାନ୍ୟ କ୍ଷତିଗ୍ରସ୍ତ ଗଛଗୁଡ଼ିକର ପୁନରୁଦ୍ଧାର କରାଯାଉଛି। ଗୋଟିଏ ନୂଆ ଗଛକୁ ରୋପଣ କରି ୮ରୁ ୧୦ବର୍ଷ ରକ୍ଷଣାବେକ୍ଷଣ କରିବା ଅପେକ୍ଷା ଯେତେ ସମ୍ଭବ ଅଧା ଉପୁଡ଼ିଥିବା ଗଛଗୁଡ଼ିକୁ ପୁନଃସ୍ଥାପିତ କରିବାରେ ବିଭାଗୀୟ କର୍ମଚାରୀ ଲାଗି ପଡ଼ିଛନ୍ତି।
ପାଣି ନ ପାଇ ଶୁଖିଲାଣି ସୌନ୍ଦର୍ଯ୍ୟକରଣ ଗଛ
ହକି ବିଶ୍ୱକପ୍ ସମୟରେ ସହରର ସୌନ୍ଦର୍ଯ୍ୟକରଣ ଲାଗି ବିଭିନ୍ନ ସ୍ଥାନରେ ଫୁଲ ଓ ଅନ୍ୟ ଗଛ ଲଗାଯାଇଥିଲା। ବିଡିଓ ଓ ଭୁବନେଶ୍ୱର ସ୍ମାର୍ଟସିଟି ଲିମିଟେଡ୍ (ବିଏସସିଏଲ)କୁ ଏହାର ରକ୍ଷଣବେକ୍ଷଣ ଦାୟିତ୍ୱ ଦିଆଯାଇଥିଲା। ହେଲେ ବିଶ୍ୱକପ୍ ପରେ ସବୁଦାୟିତ୍ୱ ଭୁଲିଗଲେ ଅଧିକାରୀ। ବାତ୍ୟାରେ ଅଧିକାଂଶ କ୍ଷତିଗ୍ରସ୍ତ ହେଲା। ରହିଯାଇଥିବା ଛୋଟ ଗଛ ଓ ଘାସ ଏବେ ପାଣି ନ ପାଇ ଶୁଖିଯାଇଛି। ଏନେଇ ବିଏସ୍ସିଏଲର ଜଣେ ବରିଷ୍ଠ ଅଧିକାରୀ କହିଛନ୍ତି, ଫନୀ ପରେ ଜଳସମସ୍ୟା ଦେଖାଯିବାରୁଏପରି ହୋଇଛି। ସେଗୁଡ଼ିକ ଗୁଳ୍ମ ଜାତିର ହୋଇଥିବାରୁ ଅସହ୍ୟ ଖରା ସହିପାରିଲେନି। ତେବେ ପାଣି ଦେବା ଓ ସଂରକ୍ଷଣ ଦାୟିତ୍ୱ ବିଏମ୍ସିକୁ ହସ୍ତାନ୍ତର କରାଯାଇଥିବା କହି ଏଏସ୍ସିଏଲ୍ ଅଧିକାରୀ ଦୋଷକୁ ଏଡ଼ାଇଛନ୍ତି।
ସ୍ଥିତପ୍ରଜ୍ଞ ମିଶ୍ର
