ନୂଆଦିଲ୍ଲୀ, ୬ା୬ (ପି.ଟି.)-ଦୀର୍ଘ ଦିନ ଧରି ଚାଲିଥିବା ଡୋପ୍ ମାମଲାର ଚୂଡ଼ାନ୍ତ ରାୟ ପ୍ରକାଶ ପାଇବାରେ ବିଳମ୍ବ ଘଟିଥିବାରୁ ଦୁଇଥର ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ବିଜେତା କେ. ସଞ୍ଜିତା ଚାନୁ ମାନସିକ ଯନ୍ତ୍ରଣାର ଶିକାର ହୋଇଛନ୍ତି। ଏଥିପାଇଁ ଅନ୍ତର୍ଜାତୀୟ ଭାରୋତ୍ତୋଳନ ମହାସଂଘ (ଆଇଡବ୍ଲ୍ୟୁଏଫ୍)ଠାରୁ ସେ କ୍ଷତିପୂରଣ ଚାହିଁଛନ୍ତି। ୨୦୧୭ ନଭେମ୍ବରରେ ଆନାବୋଲିକ୍ ଷ୍ଟେରଏଡ୍ ଟେଷ୍ଟୋଷ୍ଟେରନ ଦ୍ରବ୍ୟ ପାଇଁ ଡୋପ୍ ଟେଷ୍ଟରେ ଧରାପଡ଼ିଥିଲେ। ଶୁଣାଣି ବେଳେ ଉପସ୍ଥିତ ଥିବା ଚାନୁଙ୍କ ଭାଇ ବିଜେନ କୁମାର ଖୁମୁକ୍ଚାମ୍ କହିଛନ୍ତି, ଆଇଡବ୍ଲ୍ୟୁଏଫ୍ ପ୍ରତିଯୋଗିତାରେ ଭାଗ ନେବା ଲାଗି ଅନୁମତି ଦେଇଥିବାରୁ ମାମଲାର ଅନ୍ତ ଘଟିଛି ବୋଲି ଆମ ମନରେ ଧାରଣା ସୃଷ୍ଟି ହୋଇଥିଲା। କିନ୍ତୁ ନିକଟରେ ଆମେ ଅର୍ଜୁନ ପୁରସ୍କାର ପାଇଁ ଆବେଦନ କରିବାରୁ ଡୋପ୍ ମାମଲା ତୁଟି ନ ଥିବାରୁ ନାମ ସୁପାରିସ କରାଯାଇପାରିବ ନାହିଁ ବୋଲି ଭାରତୀୟ ମହାସଂଘ କହିିଥିଲା। ତେଣୁ ଆମେ କ୍ଷତିପୂରଣ ଦାବି କରିବାକୁ ନିଷ୍ପତ୍ତି ନେଇଛି। ବହୁଦିନ ଧରି ଏହି ମାମଲା ଚାଲିଥିବାରୁ କେବଳ ଆର୍ଥିକ ନୁହେଁ ମାନସିକ ଯନ୍ତ୍ରଣାର ସାମ୍ନା କରିବାକୁ ପଡ଼ୁଛି। ଡୋପ୍ ଟେଷ୍ଟରେ ଧରାପଡ଼ିବା ପରେ ସଞ୍ଜିତାଙ୍କୁ ୨୦୧୮ ମେ’ରୁ ୨୦୧୯ ଜାନୁୟାରୀ ୨୨ ପର୍ଯ୍ୟନ୍ତ ୯ମାସ ସାମୟିକ ସସ୍ପେଣ୍ଡ କରାଯାଇଥିଲା। ମାତ୍ର ପରେ ଟୁର୍ନାମେଣ୍ଟରେ ଭାଗ ନେବାଲାଗି ଅନୁମତି ମିଳିଥିଲା। ହେଲେ ଆଇଡବ୍ଲ୍ୟୁଏଫ୍ ପ୍ୟାନେଲ ଏପର୍ଯ୍ୟନ୍ତ ବିଧିବଦ୍ଧ ଭାବେ ରାୟ ପ୍ରକାଶ କରିନାହିଁ। ଅର୍ଜୁନ ପୁରସ୍କାର ପାଇଁ ଆବେଦନ କରିବା ଲାଗି ଅଯୋଗ୍ୟ ବୋଲି ଯେତେବେଳେ ୨୦୧୪ ଏବଂ ୨୦୧୮ରେ ରାଜ୍ୟଗୋଷ୍ଠୀ କ୍ରୀଡ଼ା ସ୍ବର୍ଣ୍ଣ ଜିତିଥିବା ସଞ୍ଜିତା ଜାଣିବାକୁ ପାଇଲେ ସେ କ୍ଷତିପୂରଣ ଦାବି କରିବାକୁ ସ୍ଥିର କରିଥିଲେ।
