କର୍ଲାମୁଣ୍ଡା,୨୬।୭(ଡି.ଏନ.ଏ.): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ କାର୍ଯ୍ୟାଳୟ ପରିସରରେ ଶୁକ୍ରବାର ଭୀମଭୋଇ ସାମର୍ଥ୍ୟ ଶିବିର ଅନୁଷ୍ଠିତ ହୋଇଯାଇଛି। ବ୍ଲକ ପ୍ରଶାସନର ଅବହେଳା ଯୋଗୁ ୫୦ରୁ ଊର୍ଦ୍ଧ୍ୱ ଭିନ୍ନକ୍ଷମ ବ୍ୟକ୍ତି ଅନ୍ଲାଇନ ପଞ୍ଜୀକୃତ କରି ନ ପାରି ହଇରାଣ ହୋଇଥିବା ଦେଖିବାକୁ ମିଳିଛି। ସୂଚନାମତେ ବ୍ଲକରେ ହୋଇଥିବା ଭୀମଭୋଇ ସାମର୍ଥ୍ୟ ଶିବିରରେ ୨୨୫ ଜଣ ବ୍ୟକ୍ତି ପଞ୍ଜୀକୃତ ହୋଇଥିଲେ । କଳାହାଣ୍ଡି ମୁଖ୍ୟ ଚିକିତ୍ସାଧିକାରୀ ବନଲତା ଦେବୀ, ଏଡିଏମଓ (ଏଫ.ଡବ୍ଲ୍ୟୁ) ଅଶୋକ କୁମାର ଦାସ, ମାନସିକ ରୋଗୀ ବିଶେଷଜ୍ଞ ପ୍ରତାପ କୁମାର ପଟନାୟକ, ଆଖି ବିଶେଷଜ୍ଞ ପ୍ରିୟଙ୍କା ସିନ୍ଧେ, ଅସ୍ତି ବିଶେଷଜ୍ଞ ସୁନୀଲ କୁମାର ପାଢୀ, ଇଏନଟି ସ୍ପେଶାଲିଷ୍ଟ ପି.କେ. ପାଣ୍ଡେ ପ୍ରମୁଖ ଯୋଗଦେଇ ଅନ୍ଲାଇନ ହୋଇଥିବା ବ୍ୟକ୍ତିମାନଙ୍କୁ ଭିନ୍ନକ୍ଷମ ପ୍ରମାଣପତ୍ର ପ୍ରଦାନ କରିଥିଲେ। ଅନ୍ୟପଟେ ଭିନ୍ନକ୍ଷମ ପ୍ରମାଣପତ୍ର ପାଇବା ପାଇଁ ଅନ୍ଲାଇନ ପଞ୍ଜୀକୃତ କରାଯିବା ବ୍ୟବସ୍ଥା ରହିଥିଲେ । ହେଲେ ପର୍ଯ୍ୟାପ୍ତ ପରିମାଣରେ ଅନଲାଇନ ପଞ୍ଜୀକରଣ ପାଇଁ ବ୍ଲକ ପକ୍ଷରୁ ବ୍ୟବସ୍ଥା କରାଯାଇ ନ ଥିବାରୁ ଅନେକ ବ୍ୟକ୍ତି ପଞ୍ଜୀକୃତ କରି ନ ପାରି ନିରାଶରେ ଫେରିଛନ୍ତି। ଏ ନେଇ ବିଏସଏସଓଙ୍କ ଅନୁପସ୍ଥିତିରେ କାର୍ଯ୍ୟକ୍ରମ ଆୟୋଜନର ଦାୟିତ୍ୱରେ ରହିଥିବା ପ୍ରଗତି ସହାୟକ ପୁରୁଷୋତ୍ତମ ଧରୁଆଙ୍କୁ ପଚାରିବାରୁ ଯେଉଁମାନେ ଶୁକ୍ରବାର ଅନ୍ଲାଇନ ପଞ୍ଜୀକୃତ କରିପାରି ନାହାନ୍ତି, ସେମାନଙ୍କ ପାଇଁ ୧ ତାରିଖରେ ବ୍ଲକ ପକ୍ଷରୁ ଅନ୍ଲାଇନ ବ୍ୟବସ୍ଥା କରାଯିବ ବୋଲି ସୂଚନା ଦେଇଛନ୍ତି। ଅନ୍ୟମାନଙ୍କ ମଧ୍ୟରେ ବ୍ଲକ ପକ୍ଷରୁ ପିଇଓ ଶଙ୍କର ପଧାନ, କ୍ଷୀରସାଗର ରଣା, ପାର୍ଥ ରଣା, ପ୍ରଦୀପ ସାହୁ, ଜଗଦୀଶ ଜାନୀ ଓ ଗ୍ରାମରୋଜଗାର ସେବକ ଶିବ କୁମାର ଭୋଇ, କ୍ଷମାସାଗର ସାହୁ, ସୀତାରାମ ପାତ୍ର, ଶିଶିର ଗହୀର, ଉମେଶ ସୁନା, ଛାୟାକାନ୍ତ ସାହୁ ବିପିସି ରୁଦ୍ରପ୍ରସାଦ ସାହୁ, ନରେଗା ସହାୟକ ବିରଞ୍ଚତ୍ ଗହୀର, ଏସିପି ସତ୍ୟନାରାୟଣ ପଧାନ, ଡିଇଓ ନରହରି ସାହୁ ପ୍ରମୁଖ ସହଯୋଗ କରିଥିଲେ।
