ପୁରୁଷୋତ୍ତମପୁର, ୨୦ା୧୨ (ଡି.ଏନ.ଏ.)- ପୁରୁଷୋତ୍ତମପୁର ବ୍ଲକ ଅଧ୍ୟକ୍ଷ ପଦବୀକୁ ନେଇ ଲାଗି ରହିଥିବା ଅଶାନ୍ତି ଥମିବାର ନାଁ ନେଉନାହିଁ। ଅଧ୍ୟକ୍ଷ ସୂର୍ଯ୍ୟ ନାରାୟଣ ପଣ୍ଡାଙ୍କ କାର୍ଯ୍ୟକଳାପରେ ଅସନ୍ତୁଷ୍ଟ ହୋଇ ତାଙ୍କୁ ପଦବୀରୁ ହଟାଇବା ଲାଗି ଅଧିକାଂଶ ସରପଞ୍ଚ, ସମିତିସଭ୍ୟ ଲାଗି ପଡିଛନ୍ତି। ଅଧ୍ୟକ୍ଷଙ୍କ ବିରୋଧରେ ଅନାସ୍ଥା ଆଗତ କରିବାକୁ ୨୫ ଦିନ ତଳେ ବିଡିଓଙ୍କୁ ଲିଖିତ ଭାବେ ଜଣାଇ ଦିଆଯାଇଥିଲା। ତେବେ ଏ ଯାଏ ଅନାସ୍ଥା ବୈଠକ ଡକାଯାଇ ନ ଥିବାରୁ ଗୁରବାର ଜନ ପ୍ରତିନିଧିମାନେ ବ୍ଲକ କାର୍ଯ୍ୟାଳୟକୁ ଆସି ବିଡିଓଙ୍କୁ ଘେରିଥିଲେ। ଅଧ୍ୟକ୍ଷଙ୍କୁ ଘୋଡାଇ ରଖାଯାଉଥିବାରୁ ପଞ୍ଚାୟତଗୁଡିକର ଉନ୍ନୟନମୂଳକ କାର୍ଯ୍ୟରେ ବାଧା ସୃଷ୍ଟି ହେଉଥିବା ଦର୍ଶାଇ ହୋହଲ୍ଲା କରିଥିଲେ। ଏହି ସମୟରେ ଜନପ୍ରତିନିଧିଙ୍କ ସାଙ୍ଗରେ ଆସିଥିବା କେତେଜଣ କୁଜିନେତା ବିଡିଓଙ୍କୁ ଅସଦ ବ୍ୟବହାର ପ୍ରଦର୍ଶନ କରିବାକୁ ମଧ୍ୟ ପଛାଇ ନ ଥିଲେ। ଏ ନେଇ ବିଡିଓ ସୀମାଞ୍ଚଳ ମହାନ୍ତିଙ୍କ ସହ ଯୋଗାଯୋଗ କରିବାରୁ ସେ କହିଛନ୍ତି ଯେ, ଅନାସ୍ଥା ପ୍ରସ୍ତାବ ଉପରେ ଉପଜିଲାପାଳ ପଦକ୍ଷେପ ନେବେ। ଅନାସ୍ଥା ପ୍ରସ୍ତାବ ଆଣିଥିବା ସରପଞ୍ଚ ସମିତିସଭ୍ୟଙ୍କ ଦସ୍ତଖତ ଯାଞ୍ଚ ଓ ଠିକଣା ଜଣାଇବାକୁ ଉପଜିଲାପାଳଙ୍କଠାରୁ ନିର୍ଦ୍ଦେଶ ଆସିଥିଲା। ସେସବୁ କାର୍ଯ୍ୟ ସାରି ସୋମବାର ଉପ ଜିଲାପାଳଙ୍କ ନିକଟକୁ ପଠାଇ ଦିଆଯାଇଛି। ସୂଚନାଯୋଗ୍ୟ, ଗତ ଅକ୍ଟୋବର ୨୫ତାରିଖରେ ବ୍ଲକ ଅଧ୍ୟକ୍ଷ ପଣ୍ଡା ବ୍ୟକ୍ତିଗତ ସମସ୍ୟା ଦର୍ଶାଇ ଜିଲାପାଳଙ୍କ ସମେତ ଛତ୍ରପୁର ଉପଜିଲାପାଳ ଓ ବିଡିଓଙ୍କୁ ଇସ୍ତଫାପତ୍ର ପ୍ରଦାନ କରିଥିଲେ। ପରେ ଗତ ନଭେମ୍ବର ୨୦ ତାରିଖରେ ତାଙ୍କ ପୁଅ ସୋସିଆଲ ମିଡ଼ିଆରେ ବାପାଙ୍କୁ ଅପହରଣ କରି ନିଆଯାଇଥିବା ଅଭିଯୋଗ କରି ତାଙ୍କୁ ଉଦ୍ଧାର କରିବା ଲାଗି ପ୍ରଶାସନକୁ ନିବେଦନ କରିଥିଲେ। ଉକ୍ତ ସନ୍ଧ୍ୟାରେ ସୂର୍ଯ୍ୟନାରାୟଣ ପୁରୁଷୋତ୍ତମପୁର ଥାନାକୁ ଆସି ପୁଅ କରିଥିବା ଅଭିଯୋଗ ଭିତ୍ତିହୀନ ବୋଲି ପାଲଟା ଅଭିଯୋଗ କରିଥିଲେ। ପରେଜତ ୨୫ ତାରିଖରେ ସୂର୍ଯ୍ୟନାରାୟଣ ବିଡିଓଙ୍କୁ ଭେଟି ତାଙ୍କ ଇସ୍ତଫାପତ୍ର ପ୍ରତ୍ୟାହୃତ କରିନେବେ ବୋଲି ଅନୁରୋଧ କରି ପୂର୍ବଭଳି କାର୍ଯ୍ୟାଳୟକୁ ଆସି ଫାଇଲପତ୍ର ଦସ୍ତଖତ କରି କାର୍ଯ୍ୟ କରିଥିଲେ। ଏହାପରେ ସଂଖ୍ୟାଧିକ ସରପଞ୍ଚ ସମିତିସଭ୍ୟ ନଭେମ୍ବର ୨୬ ତାରିଖରେ ଅଧ୍ୟକ୍ଷଙ୍କ ବିରୋଧରେ ଅନାସ୍ଥା ପ୍ରସ୍ତାବ ଲାଗି ଜିଲାପାଳଙ୍କଠାରେ ଲିଖିତ ଅଭିଯୋଗ କରିଥିଲେ।
