ନୂଆଦିଲ୍ଲୀ,୨ା୪: କରୋନାକୁ ନେଇ ବିଶ୍ୱବାସୀ ଏବେ ଚିନ୍ତାରେ। ୧୯୯ରୁ ଊର୍ଦ୍ଧ୍ୱ ରାଷ୍ଟ୍ର ଏହି କରୋନା କବଳରେ ରୁନ୍ଧି ହୋଇ ଲଢ଼େଇ ଜାରି ରଖିଛନ୍ତି। ତେବେ ୯ଟି ଦେଶ ଆଶ୍ଚର୍ଯ୍ୟଜନକ ଭାବେ ଏଥିରୁ ବାଦ୍ ପଡିଛନ୍ତି। ଜନ୍ ହପ୍କିନ୍ସ ବିଶ୍ୱବିଦ୍ୟାଳୟ କରୋନା ସମ୍ପର୍କରେ ଏକ ଡାଟା ପ୍ରସ୍ତୁତ କରିଛି। ଏହାର ଲାଇଭ୍ ଟ୍ରାକ୍ ମଧ୍ୟ ଚାଲୁଛି। ଯେଉଁଠି ପ୍ରତ୍ୟେକ ଦେଶର ସଂକ୍ରମିତ ଓ ମୃତ୍ୟୁସଂଖ୍ୟା ନେଇ ଅପଡେଟ୍ କରାଯାଉଛି। ଜନ୍ ହପ୍କିନ୍ସ ବିଶ୍ୱବିଦ୍ୟାଳୟ ଅନୁଯାୟୀ ୯ଟି ଦେଶ ଏହି କରୋନା କବଳରୁ ବର୍ତ୍ତି ରହିଛନ୍ତି। ଏହା ପାଖ ଦେଶରେ କରୋନା କାୟାବିସ୍ତାର କରିଥିଲେ ମଧ୍ୟ ଏହି ଦେଶରେ ଏଯାବତ୍ ଜଣେ ହେଲେ ସଂକ୍ରମିତ ହୋଇନାହାନ୍ତି।
ସେହି ଦେଶଗୁଡ଼ିକ ମଧ୍ୟରେ ରହିଛି ଏସିଆର ତୁର୍କମେନିସ୍ତାନ। ଏଠାରେ ମାସ୍କ ଲଗାଇ ବୁଲିବା ଓ କରୋନା ନେଇ ଆଲୋଚନା କଲେ ପୋଲିସ ଗିରଫ କରି ଜେଲ୍ ପଠାଉଛି। ଅନ୍ୟଏକ ଦେଶ ହେଲା ତାଜିକ୍ସ୍ତାନ। ଏହି ଦେଶ ବିଶ୍ୱରେ ବଡ଼ ପାହାଡ଼ ପାଇଁ ବେଶ୍ ପରିଚିତ। ଏହି ଦେଶକୁ ବହୁ ପର୍ବତାରୋହୀ ଆସିଥାନ୍ତି। ମାତ୍ର ମାର୍ଚ୍ଚ ପ୍ରଥମରୁ ୩୫ ଦେଶର ନାଗରିକଙ୍କ ପ୍ରବେଶ ଉପରେ କଟକଣା ଜାରି କରିଛି ତାଜିକ୍ସ୍ତାନ। ବିଶ୍ୱରେ ସ୍ଥିତି ସ୍ବାଭାବିକ ନ ହେବା ଯାଏ ବାହାରେ ଥିବା ନିଜ ଦେଶର ନାଗରିକଙ୍କୁ ମଧ୍ୟ ଘରକୁ ଫେରିବା ନେଇ କଟକଣା ଜାରି ହୋଇଛି। ଚାଇନା ପଡ଼ୋଶୀ ଦେଶ ଉତ୍ତରକୋରିଆରେ ମଧ୍ୟ କରୋନା କବଳରୁ ମୁକ୍ତ ରହିଛି। ଚାଇନାରେ କରୋନା ଭୂତାଣୁ କାୟାବିସ୍ତାର କରିବା ପରେ ଉତ୍ତରକୋରିଆ ସମସ୍ତ ସୀମାକୁ ସିଲ୍ କରିବା ସହ ବିଦେଶୀ ନାଗରିକଙ୍କ ପ୍ରବେଶ ନେଇ କଟକଣା ଜାରି କରାଯାଇଛି। ଉତ୍ତରଆଫ୍ରିକାର ୧.୧୧ କୋଟି ଜନସଂଖ୍ୟା ବିଶିଷ୍ଟ ଦକ୍ଷିଣ ସୁଦାନ ମଧ୍ୟ କରୋନା ପାଇଁ ସୀମା ସିଲ୍ କରିଦେଇଛି। ୟେମେନ, ଦକ୍ଷିଣ ଆଫ୍ରିକୀୟ ଦେଶ ବୁରୁଣ୍ଡି, ପୂର୍ବ ଆଫ୍ରିକୀୟ ଦେଶ ମାଲାବୀ, ଆଫ୍ରିକାର ଲିସୋଥୋ, କୋମରେସ୍ ଆଦି ଦେଶରେ କରୋନା (କୋଭିଡ୍-୧୯) ଭୂତାଣୁରେ କେହି ସଂକ୍ରମଣ ହୋଇ ନ ଥିବା ଜନ୍ ହପ୍କିନ୍ସ ବିଶ୍ୱବିଦ୍ୟାଳୟ ପକ୍ଷରୁ ପ୍ରକାଶ ପାଇଥିବା ରିପୋର୍ଟରେ ଦର୍ଶାଯାଇଛି।
