ନୂଆଦିଲ୍ଲୀ,୧୯-୧: ଗୁଗଲର ମୂଳ କମ୍ପାନୀ ଆଲ୍ଫାବେଟର ବଜାର ପୁଞ୍ଜୀକରଣ ପ୍ରଥମଥର ଲାଗି ୧ ଟ୍ରିଲିୟନ ଡଲାର(୭୧ ଲକ୍ଷ କୋଟି ଟଙ୍କା) ଟପିଛି। ପ୍ରବାସୀ ଭାରତୀୟ ସୁନ୍ଦର ପିଚାଇ କମ୍ପାନୀର ସିଇଓ ହେବାର ଦେଢ ମାସ ପରେ ଆଲ୍ଫାବେଟର ବଜାର ପୁଞ୍ଜୀକରଣ ୧୨% ବଢିଥିବା ଦେଖାଯାଇଛି। ପିଚାଇ ୪ ଡିସେମ୍ବରରେ ଏହି କମ୍ପାନୀର ସିଇଓ ପଦବୀରେ ଅବସ୍ଥାପିତ ହୋଇଥିଲେ। ସେହି ସମୟରେ କମ୍ପାନୀର ବଜାର ପୁଞ୍ଜୀକରଣ ୬୪ ଲକ୍ଷ କୋଟି ଟଙ୍କା ରହିଥିଲା। ଆଲ୍ଫାବେଟର ସିଇଓ ହେବା ପରେ ପିଚାଇଙ୍କୁ ଆଗାମୀ ୩ ବର୍ଷରେ ପ୍ରାୟ ୧୭୬୨ କୋଟି ଟଙ୍କାର ପ୍ୟାକେଜ ମିଳିବ। କୌଣସି ସର୍ଚ୍ଚ ଇଞ୍ଜିନ କମ୍ପାନୀର ଉଚ୍ଚ ଅଧିକାରୀଙ୍କ ବର୍ଗରେ ଏହା ସବୁଠାରୁ ବଡ ହାରର ବେତନ ବୋଲି କୁହାଯାଉଛି।
