ରାୟଗଡା ଅଫିସ,୨୦।୧୦: ରାୟଗଡ଼ା ରେଳ ଷ୍ଟେଶନର ୧ ନମ୍ବର ପ୍ଲାଟଫର୍ମରେ ସନ୍ଦେହଜନକ ଅବସ୍ଥାରେ ବୁଲୁଥିବା ୨ଯୁବକଙ୍କୁ ରେଳବାଇ ସୁରକ୍ଷା ବଳ ପୋଲିସ ଗିରଫ କରି ସେମାନଙ୍କଠାରୁ ୩ ପ୍ୟାକେଟ ଗଞ୍ଜେଇ ଜବତ କରିଛି। ସେମାନେ ହେଲେ ଧୀରେନ୍ଦ୍ର ଏହିରୱାଲ (୩୦) ଓ ଶିବାରାମ ପ୍ରଧାନ (୩୩)।
ସୂଚନାଯୋଗ୍ୟ, ରେଳବାଇ ସୁରକ୍ଷା ବଳ ଏସ୍ଆଇ ସରୋଜ କୁମାର ବାରିକ ଓ ଆଇଆଇସି ଡି.ଏନ୍. ତ୍ରିଲୋକଙ୍କ ନେତୃତ୍ୱରେ ଚାଲଥିବା ଯାଞ୍ଚ ସମୟରେ ଧୀରେନ୍ଦ୍ର, ଶିବାରାମ ଗତିବିଧି ଉପରେ ସନ୍ଦେହ ହେବାରୁ ସେମାନଙ୍କୁ ପଚରାଉଚରା କରିଥିଲେ। ସେମାନଙ୍କ ଠାରୁ କୌଣସି ସନ୍ତୋଷଜନକ ଉତ୍ତର ନ ମିଳିବାରୁ ପୋଲିସ ଏହି ଦୁଇ ଯୁବକଙ୍କୁ ଥାନାକୁ ନେଇ ଅଧିକ ତଦନ୍ତ କରିବା ସମୟରେ ସେମାନଙ୍କ ପାଖରେ ଗଞ୍ଜେଇ ଥିବା ଜଣାପଡିଥିଲା। ଏହି ଗଞ୍ଜେଇ କୋରାପୁଟ ଓ ଶିମିଳିଗୁଡ଼ା ଅଞ୍ଚଳରୁ ଅଣାଯାଇ ରାଉରକେଲାକୁ ଚାଲାଣ କରୁଥିବା ଆର୍ପିଏଫ୍ ପୋଲିସ ସୂଚନା ଦେଇଛି। ଜବତ ଗଞ୍ଜେଇର ଆନୁମାନିକ ମୂଲ୍ୟ ୧ ଲକ୍ଷ ୧୦ ହଜାର ଟଙ୍କା ହେବ ବୋଲି ପୋଲିସ ପ୍ରକାଶ କରିଛି। ରେଳବାଇ ପୋଲିସ ଏହି ୨ଜଣଙ୍କର ବିରୋଧରେ ଏକ ମାମଲା ରୁଜୁ କରିଛି। ଉଭୟଙ୍କୁ ସୋମବାର କୋର୍ଟ ଚାଲାଣ କରାଯିବ ବୋଲି ରେଳବାଇ ସୁରକ୍ଷା ବଳର ଥାନା ଭାରପ୍ରାପ୍ତ ଅଧିକାରୀ ଡି.ଏନ୍. ତ୍ରିଲୋକ ଖବରଦାତା ସମ୍ମିଳନୀରେ ସୂଚନା ଦେଇଛନ୍ତି।
