ମୁମ୍ବାଇ: ଦେଶରେ କରୋନା ଭାଇରସ୍ର ସଂକ୍ରମଣ ମହାରାଷ୍ଟ୍ରରେ ସର୍ବାଧିକ ରହିଛି। ସବୁଆଡ଼େ ଏହି ମହାମାରୀ କାୟା ବିସ୍ତାର କରି ଚାଲିଥିବା ବେଳେ ଦେଶରୁ ମାସ୍କ ଏବଂ ସାନିଟାଇଜର୍ କମିବାରେ ଲାଗିଛି। ବଜାରରେ ଏହା ପର୍ଯ୍ୟାପ୍ତ ପରିମାଣର ଉପଲବ୍ଧ ହୋଇପାରୁ ନାହିଁ। ସେଥିଲାଗି ବଲିଉଡ୍ ଅଭିନେତ୍ରୀ ବିଦ୍ୟା ବାଲନ୍ ଏହି ସମସ୍ୟାର ସମାଧାନ ତାଙ୍କ ଫ୍ୟାନ୍ମାନଙ୍କୁ କହିଛନ୍ତି। ଏଥିଲାଗି ଘରୁ ନ ବାହାରି ମଧ୍ୟ ମାସ୍କ ପ୍ରସ୍ତୁତ କରାଯାଇପାରିବ। ଏହା ବହୁତ ସହଜ ବୋଲି ବିଦ୍ୟା ପ୍ରକାଶ କରିିଛନ୍ତି। ଏହାକୁ ବନେଇବାକୁ ସିଲେଇର ଦରକାର ପଡ଼ିବ ନାହିଁ। ସେ ଏହି ମାସ୍କ ପ୍ରସ୍ତୁତିର ଭିଡିଓ ସୋସିଆଲ ମିଡିଆରେ ଶେୟାର କରିଛନ୍ତି। ଏହି ଭିଡିଓଟି ବିଦ୍ୟା ତାଙ୍କ ଇନ୍ଷ୍ଟାଗ୍ରାମ ଆକାଉଣ୍ଟ୍ରେ ଶେୟାର କରିଛନ୍ତି। ବିଦ୍ୟା ଏଥିରେ ଏକ ବ୍ଲାଉଜ୍ ପିସ୍ ଏବଂ ଦୁଇଟି ହେୟାର ବ୍ୟାଣ୍ଡ୍ ମାଧ୍ୟମରେ ସିଲେଇ ନ କରି ସୁନ୍ଦର ମାସ୍କ ବନେଇ ଦେଉଛନ୍ତି। ସେ ଏହାକୁ ଶେୟାର କରି କହିଛନ୍ତି ଯେ, କରୋନାରୁ ସୁରକ୍ଷିତ ରହିବାକୁ ହେଲେ ମାସ୍କ ପିନ୍ଧିବା ନିତାନ୍ତ ଜରୁରି। ଏବେ ସବୁଆଡ଼େ ମାସ୍କର ଅଭାବ ଦେଖାଦେଇଛି। ବିଦ୍ୟା ବ୍ଲାଉଜ୍ ପିସ୍ରେ ମାସ୍କ ପ୍ରସ୍ତୁତ କରି ଲେଖିଛନ୍ତି ଯେ, ‘ଆମ ଦେଶ, ଆମର ମାସ୍କ’। ଏକ ପୁରୁଣା ଶାଢ଼ିରେ ଆମେ ବହୁତ ସାରା ମାସ୍କ ତିଆରି କରିପାରିବା। ବିଦ୍ୟାଙ୍କ ଏହି ଉପାୟକୁ ବଲିଉଡ୍ ଇଣ୍ଡଷ୍ଟ୍ରିର ବହୁ ଅଭିନେତା ଅଭିନେତ୍ରୀ ପ୍ରଶଂସା କରିଛନ୍ତି।
