ନୂଆଦିଲ୍ଲୀ,୧୩ା୫: ସାରା ବିଶ୍ୱରେ ପ୍ରାୟ ୨ ଲକ୍ଷ ୯୦ ହଜାର ଲୋକଙ୍କ ଜୀବନ ନେଇଥିବା ଏବଂ ୪୩ ଲକ୍ଷରୁ ଊର୍ଦ୍ଧ୍ୱ ଲୋକଙ୍କୁ ସଂକ୍ରମିତ କରିଥିବା ମହାମାରୀ କରୋନା(କୋଭିଡ୍-୧୯) କବଳରୁ ମୁକ୍ତି ପାଇଁ ସବୁ ଦେଶ ଚାହୁଁଛନ୍ତି। ଏଥିପାଇଁ ସମସ୍ତେ ସଂଗ୍ରାମ ଚଳାଇଛନ୍ତି। ହେଲେ ବିନା ଟିକାରେ ଏହି ଲଢ଼େଇ ଦୁର୍ବଳ ହୋଇପଡ଼ିଛି। କିନ୍ତୁ ଏକ ଖୁସି ଖବର ଯେ, ଅନୁମାନ କରାଯାଉଥିବା ସମୟ ପୂର୍ବରୁ ପ୍ରସ୍ତୁତ ହୋଇଯିବ କରୋନା ନିରୋଧୀ ଟିକା। ଏଥିପାଇଁ ଦ୍ରୁତଗତିରେ କାର୍ଯ୍ୟ ଚାଲିଛି ବୋଲି ବିଶ୍ୱ ସ୍ବାସ୍ଥ୍ୟ ସଂଗଠନ(ଡବ୍ଲ୍ୟୁଏଚ୍ଓ) ମହାନିର୍ଦ୍ଦେଶକ ଟେଡ୍ରୋସ୍ ଆଡାନୋମ୍ ଗେବ୍ରେଏସ୍ କହିଛନ୍ତି। ୭ରୁ ୮ଟି ଟିମ୍ କୋଭିଡ୍-୧୯ ଟିକା ପ୍ରସ୍ତୁତ କରିବାରେ ଅତି ନିକଟତର ହୋଇଛନ୍ତି ବୋଲି ଟେଡ୍ରୋସ୍ କହିଛନ୍ତି।
ଜାତିସଂଘର ଅର୍ଥନୈତିକ ଓ ସାମାଜିକ ପରିଷଦକୁ ସୂଚନା ଦେଇ ଟେଡ୍ରୋସ୍ କହିଛନ୍ତି ଯେ, ଟିକା ପ୍ରସ୍ତୁତି ପାଇଁ ୧୨ରୁ ୧୮ମାସ ସମୟ ଲାଗିପାରେ ବୋଲି ୨ ମାସ ପୂର୍ବେ ଅନୁମାନ କରାଯାଇଥିଲା। ହେଲେ ଅନୁସନ୍ଧାନ, ଚିକିତ୍ସା ଏବଂ ପରୀକ୍ଷଣ ପାଇଁ ୪୦ ଦେଶର ନେତା, ସଂଗଠନ ଓ ବ୍ୟାଙ୍କ ପକ୍ଷରୁ ଏକ ସପ୍ତାହ ପୂର୍ବରୁ ମିଳିଥିବା ୭.୪ ବିଲିୟନ ୟୁରୋ (୮ ବିଲିୟନ ଡଲାର) ସାହାଯ୍ୟର ପ୍ରତିଶ୍ରୁତି ଯୋଗୁ ଟିକା ପ୍ରସ୍ତୁତି ପାଇଁ ତ୍ୱରିତ ପ୍ରୟାସ ଚାଲିଛି। କିନ୍ତୁ ୮ ବିଲିୟନ ଡଲାର ପର୍ଯ୍ୟାପ୍ତ ହେବ ନାହିଁ। ଟିକା ପ୍ରସ୍ତୁତି କାର୍ଯ୍ୟକୁ ତ୍ୱରାନ୍ବିତ କରିବା ଲାଗି ଅତିରିକ୍ତ ପାଣ୍ଠି ଆବଶ୍ୟକ ହେବ। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ପର୍ଯ୍ୟାପ୍ତ ପରିମାଣର ଟିକା ପ୍ରସ୍ତୁତି ଜରୁରୀ। ଫଳରେ ସମସ୍ତଙ୍କ ନିକଟରେ ଟିକା ପହଞ୍ଚିବା ନିଶ୍ଚିତ ହୋଇପାରିବ ଏବଂ କେହି ସେଥିରୁ ବଞ୍ଚତ୍ତ ହେବେ ନାହିଁ। ଟେଡ୍ରୋସ କହିଛନ୍ତି, ଟିକା ପ୍ରସ୍ତୁତି ପାଇଁ ୧୦୦ରୁ ଊର୍ଦ୍ଧ୍ୱ ଟିମ୍ କାର୍ଯ୍ୟ କରୁଛନ୍ତି। ସେଥିମଧ୍ୟରୁ ୭/୮ଟି ଶୀର୍ଷରେ ରହିଛନ୍ତି। ଆମେ କେତେକ ଟିମ୍ ଉପରେ ଧ୍ୟାନ ଦେଉଛି, ଯେଉଁମାନେ କି ଉତ୍ତମ ଫଳାଫଳ ଆଣିପାରନ୍ତି। କିନ୍ତୁ ଏଯାଏ ଟିକା ପ୍ରସ୍ତୁତକାରୀ ଶ୍ରେଷ୍ଠ ଟିମ୍ ଚିହ୍ନଟ ହୋଇନାହିଁ ବୋଲି ଟେଡ୍ରୋସ କହିଛନ୍ତି।
ଟେଡ୍ରୋସ୍ କହିଛନ୍ତି ଯେ, ଗତ ଜାନୁୟାରୀରୁ ଆମେ ବିଶ୍ୱର ହଜାର ହଜାର ଅନୁସନ୍ଧାନକାରୀଙ୍କ ସହ କାର୍ଯ୍ୟ କରୁଛୁ। ପ୍ରାଣୀ ଉପରେ ଅଧିକାଂଶ ଟିକାର ପ୍ରୟୋଗ କରାଯାଇଥିବାବେଳେ କେତେକର ମାନବ ପରୀକ୍ଷା ଆରମ୍ଭ ହୋଇଛି। ପ୍ରାୟ ୪୦୦ ବୈଜ୍ଞାନିକଙ୍କ ଏକ ଟିମ୍ ଏହି ସମଗ୍ର କାର୍ଯ୍ୟ ଉପରେ ନଜର ରଖିଛିି। କରୋନା ସଂକ୍ରମଣ ଅତ୍ୟନ୍ତ ବିପଜ୍ଜନକ। ପଶ୍ଚିମ ୟୁରୋପରେ ନୂଆ ମାମଲା ହ୍ରାସ ପାଉଥିବାବେଳେ ପୂର୍ବ ୟୁରୋପ, ଆଫ୍ରିକା, ଦକ୍ଷିଣ ପୂର୍ବ ଏସିଆ, ପୂର୍ବ ଭୂମଧ୍ୟସାଗର ଏବଂ ଅନ୍ୟାନ୍ୟ ଅଞ୍ଚଳରେ ଏହା ବୃଦ୍ଧିପାଉଛି। ଏହି ମହାମାରୀ ଆମକୁ ଅନେକ ଯନ୍ତ୍ରଣାଦାୟକ ଶିକ୍ଷା ଦେଉଛି। ବିଶେଷକରି ସୁଦୃଢ଼ ଜାତୀୟ ଓ ଆଞ୍ଚଳିକ ସ୍ବାସ୍ଥ୍ୟସେବା ବ୍ୟବସ୍ଥାର ବହୁ ଗୁରୁତ୍ୱ ରହିଛି। ବର୍ତ୍ତମାନର ସ୍ଥିତିକୁ ଦେଖିଲେ ୨୦୩୦ ସୁଦ୍ଧା ୫ ବିଲିୟନରୁ ଅଧିକ ଲୋକ ଅତ୍ୟାବଶ୍ୟକ ସେବା ପାଇପାରିବେ ନାହିଁ। କରୋନାର ପ୍ରକୋପ ଜାରି ରହିଥିବାବେଳେ ଦେଶଗୁଡ଼ିକ ଏକ ସୁସ୍ଥ, ନିରାପଦ ବିଶ୍ୱ ପାଇଁ ମୂଳଦୁଆ ପକାଇବାକୁ ପଡ଼ିବ। ସାରା ପୃଥିବୀରେ ପ୍ରତିବର୍ଷ ସ୍ବାସ୍ଥ୍ୟସେବା ପାଇଁ ପ୍ରାୟ ୭.୫ ଟ୍ରିଲିୟନ୍ ଡଲାର ଖର୍ଚ୍ଚ ହୁଏ, ଯାହା ବିଶ୍ୱ ଜିଡିପିର ପ୍ରାୟ ୧୦ ପ୍ରତିଶତ। କିନ୍ତୁ ଉତ୍ତମ ସ୍ବାସ୍ଥ୍ୟ ପାଇଁ ପ୍ରୋତ୍ସାହନ ଓ ପ୍ରାଥମିକ ସ୍ବାସ୍ଥ୍ୟସେବା ସ୍ତରରେ ରୋଗ ପ୍ରତିରୋଧ ନିମନ୍ତେ ଅର୍ଥ ବିନିଯୋଗ କରିବା ହେଉଛି ସର୍ବୋତ୍ତମ। କାରଣ ଏହାଦ୍ୱାରା ଜୀବନ ରକ୍ଷା ଏବଂ ଅର୍ଥ ସଞ୍ଚୟ ହୋଇପାରିବ ବୋଲି ଟେଡ୍ରୋସ୍ କହିଛନ୍ତି।
