ଲୋଇସିଂହା,୨୧।୧ (ଡି.ଏନ୍.ଏ)-ବଲାଙ୍ଗୀର ଜିଲା ଲୋଇସିଂହା ବ୍ଲକ ଘୁଷୁରାମୁଣ୍ଡା ଗଁାର ବଜରୁ ସୁନା(୬୫)। ବଏସ୍ ଅଧ୍କା ହେବାର ଲାଗି ସେ କାମ୍ବୁତା କରି ନାଇଁପାରବାର। ଭୋଟର କାର୍ଡରେ ଭୁଲ୍ଭଟ୍କା ଲାଗି ସେ ଭତାରୁ ବଁଚିତ୍ ଥିବାର ଅଭିଯୋଗ କରିଛନ୍। ଏନ୍ତାଥି ସେ ଭିଖ୍ମାଗି ନିଜର କୁଟୁମ୍ ପୁଷୁଛନ୍।
ସୂଚନା ହିସାବେ ବୁଢ଼ୀପଦର ପଁଚେତ୍ ଅଧୀନ ଘୁଷୁରାମୁଣ୍ଡା ଗଁାର ହରିଜନ ପଡ଼ାର ବଜରୁ ସୁନା(୬୫)। ପରିବାର କହେଲେ ମାଏକିନା ଘଏସାନ(୬୧) ଆର ୫ ଝି’କୁ ନେଇ ସଁସାର। ପରିବାରଟା ନିହାତି ଗରିବ୍, ଜମିବାଡ଼ି ବଲି କିଛି ନାଇଁ। ବଜରୁ ଦୁଖ୍ସୁଖ୍ କରି ୫ ଝି’କୁ ବିହାଚୁରା କରି ସାରିଛନ୍। ଏହେଦେ ଘରେ ଅସାହା ଅବସ୍ତାରେ ବୁରୁଧ୍ ଦମ୍ପତି ରହୁଛନ୍। ଆଏଜ୍କେ ୪ ବଛର ହେଲା ବଜରୁ ବଏସ୍ ଅଧ୍କା ଲାଗି କାମ୍ବୁତା କରି ନାଇଁପାରବାର। ଏନ୍ତାଥି ବୁରୁଧ୍ ଦମ୍ପତି ସରକାରକଁର ଭତା ଆର ଆବାସ ଯୋଜନାରୁ ବଁଚିତ୍ ଥିବାର ଅଭିଯୋଗ କରିଛନ୍। ସରକାରୀ ସାହାଯ୍ କହେଲେ ଦମ୍ପତି ମାସିକ ପାଉଥିବାର ୨୫ କେ.ଜି. ଚାଉଲ ନ ସାହାଭରସା। ହେଲେ ଇ ଚାଉଲରେ ମାସେ ଚଲବାରଟା ବୁରୁଧ୍ ଦମ୍ପତିକର ପକ୍ଷେ ସମ୍ଭବ ନାଇଁ ହେବାର। ତେଲ୍ନୁନ୍, କପଡ଼ାଲତା, ଉଷୋକଷା ଲାଗି ବୁରୁଧ୍ ଦମ୍ପତି ଉପେ ଶୂଇନ୍ ହେଇ ଆସର ପାସର ଗଁାମାନ୍କେ ଭିଖ୍ ମାଗୁଛନ୍। ବଜରୁକଁର କହେବାର ହେଲା ସେ ଅନେକଥର ଭତାର ଲାଗି ପଁଚେତ୍ରୁ ବ୍ଳକ ତକ୍ କାଗଜପତର ଦେଇଛନ୍। ହେଲେ ଭୋଟର କାର୍ଡରେ ତାକର ବଏସ୍ ବହୁତ୍ କମ୍ ଲେଖା ହେଇଛେ। ଯେନ୍ଥିରଲାଗି ସେ ଭତାରୁ ବଁଚିତ୍ ଥିବାର କହିଛନ୍। ସେନ୍ତା ଅନେକ ବଛର ତଲେ ୧୪ ହଜାର ଟଁକା ଥିଲାବେଲେ ସେ ଗୁଟେ ଇନ୍ଦିରା କଲୋନୀ ଘର ପାଇଥିଲେ। ହେଲେ ସେଟା ଏହେଦେ ଭଂଗା ଦଦ୍ରା ହେଇଗଲାନ ବଲି କହିଛନ୍। ଇ ଦିଗେ ବ୍ଲକ ଆର ଜିଲା ପରଶାସନ ଦୁରୁଷ୍ଟି ଦେଇ ବୁରୁଧ୍ ଦମ୍ପତିକୁଁ ଭତା ଆର ଆବାସ ଯୋଜନାରେ ଘରଖଁଡ଼େ ଯୁଗେଇ ଦେବାକେ ଗଁାବାସୀ ଦାବି କରିଛନ୍।
