ବରପାଲି, ୭।୧ (ଡି.ଏନ.ଏ)-
ବରଗଡ଼ ଜିଲା ବରପାଲିରେ ୧୯୬୨ରୁ ୧୯୬୬ ସାଲ ଭିତରେ ସେବେଲର ମୁଖ୍ୟମନ୍ତ୍ରୀ ବିଜୁ ପଟ୍ଟନାୟକକଁର ଚେଷ୍ଟାରେ ଇଠାନେ ବହୁତ୍ କଲକାରଖାନା ତିଆର ହେଇଥିଲା। ସେ ଭିତରେ ତେଲକଲ୍, ଚିନିକଲ୍, ଲୁହା କାରଖାନା, ବାଲ୍ଟି କାରଖାନା ଆର ଶୀତଲଭଣ୍ଡାର ରହିଥିଲା। ହେଲେ ଜିଲା ଗଠନ ହେବାର ୨୮ ବଛର ଉତାରୁ ପୁରନା କଲ୍କାରଖାନା ନୂତନ ଜୀବନ୍ ପାଏବାର ଜାଗାରେ ଗୁଟ୍ଗୁଟ୍ କରି ନିଜର ସତା ହରେଇଛନ୍। ସେ ଭିତ୍ରୁ କେତ ଜବରଦଖଲରେ ଘରୋଇ ସ୍କୁଲ ଖୁଲିଛେ। ଇ ସବୁ ସରକାରକଁର ନଜରରେ ଥିଲେ ବି କିଛି ପଦକ୍ଷେପ ନାଇଁ ନିଆଯାଇ। ସେନ୍ତା ଆରକେତେ କଲ୍କାରଖାନାକେ ଲୋକ୍ ଜବରଦଖଲ କରି ଭଡ଼ା ଲଗେଇଛନ୍। ଯେନ୍ଠାନେ ଲୋକ୍ କୁଟୁମବସିଆ ରହୁଛନ୍। ଇଠାନେ ଥିବାର ୫ଶହ ଟନ୍ କ୍ଷମତାର ଶୀତଲଭଣ୍ଡାର ତାର ଶେଷ୍ ନିଶାସ୍ ଗନୁଥିଲାବେଲେ ବାହାରେ ବଢ଼େ ତାଲା ଝୁଲୁଛେ। ଇତାର ଆଗ୍ରୁ ରାଏଜ୍ ସରକାର ୧୯୮୦ରୁ ୧୯୮୫ ଭିତ୍ରେ ହଜାରେ ଦିନେ ହଜାରେ କୋଟି ଟଁକାରେ ହଜାରେ କଲ୍କାରଖାନା ଗଢ଼ି ଉଠ୍ବା ବଲି କହିଥିଲେ। ହେଲେ ସେଟା ଲୁକ୍କୁ ଭକୁଆ ଥାବ୍ କରବାର ଲାଗି ସୁଦ୍ ମିଛ୍ ଥିଲା। ଲୋକ୍ ବଢ଼େ ଆଶ୍ କରିଥିଲେ ବେମାରିଆ କଲ୍କାରଖାନା ଫେନ୍ଘାଏ ଜୀବନ୍ ପାଏବେ। ହେଲେ ଲୁକ୍କର ଇ ସବୁ ଆଶ୍ ମହଲି ଯାଇଥିଲା। ଏହେଦେ ନବୀନ ପଟ୍ଟନାୟକ ସରକାରକଁର ୨୦ ବଛର ଶାସନରେ ବି କଲ୍କାରଖାନା କାଯ୍କ୍ଷମ ହେବାର କିଛି ସୂଚନା କି ଆଭାସ ନାଇଁ ମିଲ୍ବାର। ଶୀତଲଭଣ୍ଡାର ଅଭାବୁ ଅଂଚଲର ଚାଷୀ ଅମଲ କରିଥିବାର ଆଲୁ, ଉଲି, ପନିପରିବା ରଖ୍ବାର ଲାଗି ବଡ଼ା ଜହଗଁଜ୍ ହେଉଛନ୍। ଚାଷୀ ସବୁବେଲେ ଅଭାବୀ ବିକ୍ରିର ଶିକାର ହେଉଛନ୍ ଆର ନୁକ୍ସାନ ସହୁଛନ୍। ଇ ଦିଗେ ରାଏଜ୍ ସରକାର, ଥାନୀଅ ନେତା ଆର ଜିଲା ପରଶାସନ ଦୁରୁଷ୍ଟି ଦେଇ ପଦକ୍ଷେପ ନେବାକେ ଅଂଚଲର ଚାଷୀ ସମାଜ ଦାବି କରିଛେ। ସେନ୍ତା ଇ ବାବ୍ଦେ ଜିଲା ଶିଳ୍ପ କେନ୍ଦ୍ର ମ୍ୟାନେଜର ଲକ୍ଷ୍ମୀଧର ସୋରେନ୍କୁଁ ପଚ୍ରାଲାରୁ ଶୀତଲ୍ଭଣ୍ଡାର ପୁନରୁଧାର ଲାଗି ସେନ୍ତା କିଛି ଯୋଜନା ନଁାଇଁନ ବଲି ସେ କହିଛନ୍।
