ଝରିଗାଁ,୨।୬(ସ୍ବ.ପ୍ର)- ନବରଙ୍ଗପୁର ଜିଲାରେ ମାତୃ ଏବଂ ଶିଶୁ ମୃତ୍ୟୁହାରକୁ ରୋକିବା ପାଇଁ ଜିଲାପାଳଙ୍କ ଅଧ୍ୟକ୍ଷତାରେ ଶନିବାର ସଚେତନତା କାର୍ଯ୍ୟକ୍ରମର ଶୁଭାରମ୍ଭ ହୋଇଛି। ଏହି କାର୍ଯ୍ୟକ୍ରମର ଦିନକ ପରେ ନବରଙ୍ଗପୁର ଜିଲା ଝରିଗାଁ ବ୍ଲକ ସଦର ମହକୁମା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ରବିବାର ଏକ ନବଜାତକଙ୍କ ମୃତ୍ୟୁ ଘଟିଛି। ମାତୃ ଓ ଶିଶୁ ମୃତ୍ୟୁହାର ରୋକିବା ସଚେତନତା କାର୍ଯ୍ୟକ୍ରମ ଉପରେ ପ୍ରଶ୍ନବାଚୀ ସୃଷ୍ଟି କରିଛି।
ଝରିଗାଁ ବ୍ଲକ ବାଣୁଆଗୁଡା ଗ୍ରାମର ଦିବାକର ପନକାଙ୍କ ସ୍ତ୍ରୀ ସୁଶିଳା ମାଳି(୧୯)ଶୁକ୍ରବାର ରାତିରେ ପ୍ରସବ ଜନିତ ଯନ୍ତ୍ରଣା ଅନୁଭବ କରିଥିଲେ। ସେହି ସମୟରେ କାଳବୈଶାଖୀ ପ୍ରଭାବରେ ବର୍ଷା ପବନ ହେବା ସହ ମୋବାଇଲ ଯୋଗାଯୋଗ ଠପ୍ ରହିଥିଲା। କାଳବୈଶାଖୀ ଥମିବା ପରେ ପରିବାର ଲୋକେ ରାତି ପ୍ରାୟ ୧୨ଟାରେ ଏକ ଅଟୋ ସହାୟତାରେ ଝରିଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ସୁଶିଳାଙ୍କୁ ଆଣିଥିଲେ। ଶନିବାର ଭୋର ୪ଟା ୪୫ରେ ସେ ଏକ ଶିଶୁପୁତ୍ରକୁ ଜନ୍ମ ଦେଇଥିଲେ। ଜନ୍ମ ବେଳକୁ ଶିଶୁର ଓଜନ ୨କେଜି ୬ଶହ ଗ୍ରାମ ରହିଥିଲା। ଶିଶୁର ସ୍ବାସ୍ଥ୍ୟବସ୍ଥା ଭଲ ରହିଥିଲା। ଜନ୍ମର ଦିନକ ପରେ ରବିବାର ସକାଳ ୬ଟା୨୦ ମିନିଟରେ ନବଜାତ ଶିଶୁର ଡାକ୍ତରଖାନାରେ ମୃତ୍ୟୁ ହୋଇଥିଲା। କ୍ଷୀର ପିଇବା ସମୟରେ ଶ୍ୱାସରୁଦ୍ଧ ହୋଇ ଶିଶୁର ମୃତ୍ୟୁ ହୋଇଥିବା ନେଇ ଡାକ୍ତର ଅଜିତ କୁମାର ଦାଶ କହିଛନ୍ତି।
ସୂଚନାଯୋଗ୍ୟ ଯେ, ଝରିଗାଁ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ସ୍ତ୍ରୀ ଏବଂ ଶିଶୁ ବିଶେଷଜ୍ଞ ନାହାନ୍ତି । ସରକାର ଗର୍ଭବତୀଙ୍କୁ ମେଡିକାଲରେ ପ୍ରସୂତୀ କରାଇବା ନେଇ ବିଭିନ୍ନ ପଦକ୍ଷେପ ନେଉଥିବା ବେଳେ ଝରିଗାଁ ଭଳି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ସ୍ବତନ୍ତ୍ର ନବଜାତ ଶିଶୁ ସୁରକ୍ଷା ପ୍ରକୋଷ୍ଠ ନଥିବା ସହ ବିଶେଷଜ୍ଞ, ଡାକ୍ତର ଅଭାବ ରହିଛି। ଫଳରେ ମାତୃ ଏବଂ ଶିଶୁ ମୃତ୍ୟୁ ହାର ରୋକିବା କଷ୍ଟକର ହୋଇପଡୁଛି। ସମସ୍ୟା ସମ୍ପର୍କରେ ସ୍ବାସ୍ଥ୍ୟ ବିଭାଗ ନିକଟରେ ଅଭିଯୋଗ ରହିଥିଲେ ମଧ୍ୟ ସେଥିପ୍ରତି କେହି ଦୃଷ୍ଟି ଦେଉ ନାହାନ୍ତି।
