ନୟାଗଡ଼ ଅଫିସ/ରଣପୁର (ସ୍ବ.ପ୍ର.),୨୧।୫-ନୟାଗଡ଼ ଜିଲା ରଣପୁର ଥାନା ନରେନ୍ଦ୍ରପୁର ପଞ୍ଚାୟତ ବିନୋଦପଡ଼ା ଗ୍ରାମ ଶ୍ମଶାନରୁ ଜଣେ ମହିଳାଙ୍କ ଅର୍ଦ୍ଧଦଗ୍ଧ ମୃତଦେହକୁ ପୋଲିସ ଉଦ୍ଧାର କରିଛି। ମୃତକ ହେଲେ ଶୁଭ୍ରକେଶୀ ସ୍ବାଇଁ। ଅଭିଯୁକ୍ତଙ୍କୁ ଗିରଫ ଦାବିରେ ରାସ୍ତାରୋକୋ କରାଯାଇଛି।
ଯେ, କଟକ ଜିଲା ବାଙ୍କୀ ଥାନା ପାଟପୁର ଗ୍ରାମର ବାମଦେବ ସ୍ବାଇଁଙ୍କ ଝିଅ ଶୁଭ୍ରକେଶୀ ୬ ବର୍ଷ ତଳେ ବିନୋଦପଡ଼ା ଗ୍ରାମର ମନୋଜ ରାଉତଙ୍କୁ ବିବାହ କରିଥିଲେ। ବିବାହ ପରେ ତାଙ୍କର ଯାଆଁଳା ପୁଅ ଜନ୍ମ ହୋଇଥିଲା। ଏହାର କିଛି ବର୍ଷ ପରେ ସେ ଝିଅ ଜନ୍ମ ଦେଇଥିଲେ। ତେବେ ବାପଘରୁ ଅଧିକ ଯୌତୁକ ଆଣିବା ପାଇଁ ସ୍ବାମୀ ତାଙ୍କ ଉପରେ ଚାପ ପକାଇଥାନ୍ତି। ଏହି ଘଟଣାକୁ କେନ୍ଦ୍ର କରି ସ୍ବାମୀ ସ୍ତ୍ରୀଙ୍କ ମଧ୍ୟରେ ପାଟିତୁଣ୍ଡ ହୋଇଥାଏ। ସୋମବାର ଅପରାହ୍ନରେ ଶୁଭ୍ରକେଶୀଙ୍କ ମୃତଦେହକୁ ଶାଶୁ ଘର ଲୋକ ଶଶ୍ମାନରେ ପୋଡ଼ୁଥିବା ବେଳେ କୌଣସି ସୂତ୍ରରୁ ଖବର ପାଇ ବାପଘର ଲୋକ ସେଠାରେ ପହଞ୍ଚତ୍ ଯାଇଥିଲେ। ସେମାନେ ମୃତଦେହ ଉପରେ ପାଣି ପକାଇ ନିଆଁ ଲିଭାଇ ଦେଇଥିଲେ। ପରେ ରଣପୁର ପୋଲିସକୁ ଖବର ଦେବାରୁ ପୋଲିସ ଘଟଣାସ୍ଥଳରେ ପହଞ୍ଚତ୍ ସେଠାରୁ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର କରିଥିଲା। ଶୁଭ୍ରକେଶୀଙ୍କ ସ୍ବାମୀ ଓ ଶାଶୁଘର ଲୋକ ଫେରାର୍ ଅଛନ୍ତି। ଯୌତୁକ ପାଇଁ ଶୁଭ୍ରକେଶୀଙ୍କୁ ହତ୍ୟା କରାଯାଇଥିବା ତାଙ୍କ ଭାଇ ମନୋରଞ୍ଜନ ସ୍ବାଇଁ ଥାନାରେ ଅଭିଯୋଗ କରିଛନ୍ତି। ଅଭିଯୁକ୍ତମାନଙ୍କୁ ଗିରଫ ଦାବିରେ ସନ୍ଧ୍ୟା ୫ଟାରେ ମହିଳାଙ୍କ ପରିବାର ଓ ଗ୍ରାମବାସୀଙ୍କ ପକ୍ଷରୁ ବିନୋଦପଡ଼ା ଛକଠାରେ ରାସ୍ତାରୋକୋ କରାଯାଇଥିଲା। ଫଳରେ ଜାତୀୟ ରାଜପଥ-୫୭ରେ ଦୀର୍ଘ ସମୟ ଧରି ଯାନବାହନ ଚଳାଚଳ ବାଧାପ୍ରାପ୍ତ ହୋଇଥିଲା।
