ମାଲୋର୍କା(ସ୍ପେନ), ୧୫।୬: ଏଠାରେ ଅନୁଷ୍ଠିତ ରିଅଲ ମାଲୋର୍କା ବିପକ୍ଷ ଲା ଲିଗା ଫୁଟବଲ ମ୍ୟାଚରେ ନୂଆ ରେକର୍ଡର ଅଧିକାରୀ ହୋଇଛନ୍ତି ବାର୍ସିଲୋନା ସୁପରଷ୍ଟାର ଲିଓନେଲ ମେସି। ଏହି ମ୍ୟାଚରେ ଆର୍ଜେଣ୍ଟିନା ତାରକା ମେସି ଗୋଟିଏ ଗୋଲ ଦେବା ସହିତ ୨ଟି ଗୋଲ ଦେବାରେ ସହାୟତା କରିଥିଲେ। ତାଙ୍କ ସଫଳତା ବଳରେ ବାର୍ସିଲୋନା ୪-୦ ଗୋଲରେ ରିଅଲ ମାଲୋର୍କାକୁ ପରାସ୍ତ କରିଥିଲା। ଖେଳର ଶେଷ ମୁହୂର୍ତ୍ତରେ ଗୋଲ ଦେବା ସହିତ ମେସି କ୍ରମାଗତ ୧୨ଟି ଲା ଲିଗା ସିଜନରେ ୨୦ କିମ୍ବା ତଦୂର୍ଦ୍ଧ୍ୱ ଗୋଲ ଦେବାରେ ପ୍ରଥମ ଖେଳାଳି ହୋଇଛନ୍ତି। ଚଳିତ ସିଜନରେ ସେ ଟପ୍ ସ୍କୋରର ମଧ୍ୟ ହୋଇ ଯାଇଛନ୍ତି। ୨୧ ମ୍ୟାଚରୁ ସେ ୨୦ଟି ଗୋଲ ଦେଇଛନ୍ତି। ଏହା ବ୍ୟତୀତ ଗୋଲ ପାଇଁ ସହଯୋଗ କରିଥିବା ଖେଳାଳିଙ୍କ ତାଲିକାରେ ମଧ୍ୟ ସେ ଶୀର୍ଷରେ ରହିଛନ୍ତି। ଚଳିତ ସିଜନରେ ସେ ୧୨ଟି ଗୋଲ ଦେବାରେ ସହାୟତା କରିଛନ୍ତି। ଏହି ସଫଳତା ପାଇଁ ମେସିଙ୍କୁ ବାର୍ସିଲୋନା କ୍ଲବ ପକ୍ଷରୁ ଅଭିନନ୍ଦନ ଜଣାଯାଇଛି। କରିମ ବେଞ୍ଜିମା ଓ ଲୁଇସ ସୁଆରେଜ ୧୪ ଗୋଲ ଦେବା ସହିତ ୧୧ଟି ଲେଖାଏ ଗୋଲ ଦେବାରେ ସହାୟତା କରି ପରବର୍ତ୍ତୀ ସ୍ଥାନରେ ରହିଛନ୍ତି।
ମ୍ୟାଚର ଦ୍ୱିତୀୟ ମିନିଟରେ ବାର୍ସିଲୋନା ପକ୍ଷରୁ ପ୍ରଥମ ଗୋଲ ଦେଇଥିଲେ ଅର୍ଟୁରୋ ଭିଡାଲ। ଏହାପରେ ମେସିଙ୍କ ସହଯୋଗରେ ମାର୍ଟିନ ବ୍ରାଥ୍ଓ୍ବେଟ ଏବଂ ଜୋର୍ଡି ଆଲ୍ବା ଗୋଲ ଦେବାରୁ ଦଳ ୩-୦ ଗୋଲରେ ଅଗ୍ରଣୀଲାଭ କରିଥିଲା। ଶେଷ ହ୍ବିସିଲ ବାଜିବାର ଅଳ୍ପକିଛି କ୍ଷଣ ପୂର୍ବରୁ ଅର୍ଥାତ୍ ଇଞ୍ଜୁରି ଟାଇମ୍ରେ ମେସି ଗୋଟିଏ ଗୋଲ ଦେଇ ମ୍ୟାଚର ପରିସମାପ୍ତି ଘଟାଇଥିଲେ। ୨୦୧୯-୨୦ ସିଜନରେ ଏହା ତାଙ୍କର ୨୦ତମ ଗୋଲ ଥିଲା। ଜଙ୍ଘରେ ଯନ୍ତ୍ରଣା ଅନୁଭବ କରିଥିଲେ ହେଁ ସେ ପୂରା ୯୦ ମିନିଟ ଖେଳିଥିଲେ। ଆଣ୍ଠୁରେ ଅସ୍ତ୍ରୋପଚାର ଯୋଗୁ ଚଳିତବର୍ଷ ପ୍ରାରମ୍ଭରୁ ଖେଳିପାରି ନ ଥିବା ଲୁଇସ ସୁଆରେଜ ଦ୍ୱିତୀୟାର୍ଦ୍ଧରେ ଦଳରେ ଯୋଗ ଦେଇଥିଲେ। ମେସିଙ୍କ ଗୋଲରେ ଏହି ଉରୁଗୁଏ ଖେଳାଳିଙ୍କ ଅବଦାନ ରହିଥିଲା।
କରୋନା ଭାଇରସ ସଂକ୍ରମଣ ପାଇଁ କଡ଼ା କଟକଣା ସତ୍ତ୍ୱେ ମ୍ୟାଚ ଅବସରରେ ଜଣେ ବ୍ୟକ୍ତି ସୁରକ୍ଷା ବଳୟ ଭାଙ୍ଗି ପଡ଼ିଆ ମଧ୍ୟକୁ ପଶି ମେସିଙ୍କ ସହିତ ଫଟୋ ନେବାପାଇଁ ଚେଷ୍ଟା କରିଥିଲେ। ପରେ ସୁରକ୍ଷାକର୍ମୀମାନେ ତାଙ୍କୁ ଧରି ନେଇଥିଲେ। ବ୍ୟକ୍ତିଜଣକ ଆର୍ଜେଣ୍ଟିନା ଦଳର ଟି-ଶାର୍ଟ ପରିଧାନ କରିଥିଲେ। ଏହା ପଛରେ ମେସିଙ୍କ ନାମ ଲେଖା ହେବା ସହିତ ୧୦ ନମ୍ବର ରହିଥିଲା। ବ୍ୟକ୍ତିଜଣକ କିପରି ଷ୍ଟାଡିୟମକୁ ପ୍ରବେଶ କଲେ ତାର ମଧ୍ୟ ତଦନ୍ତ ହେବ। ତାଙ୍କ ବିରୋଧରେ ଫୌଜଦାରି କାର୍ଯ୍ୟାନୁଷ୍ଠାନ ହେବ ବୋଲି ଲା ଲିଗାର ଆୟୋଜକ ପ୍ରକାଶ କରିଛନ୍ତି। ଅନ୍ୟପକ୍ଷରେ ୨ ମିଟର ଉଚ୍ଚତା ବିଶିଷ୍ଟ ବାଡ଼କୁ ଡେଇଁ ଉକ୍ତ ବ୍ୟକ୍ତି ଷ୍ଟାଡିୟମରେ ପ୍ରବେଶ କରିଥିଲେ। ମେସିଙ୍କୁ ସେ ଆଦର୍ଶ ବୋଲି ମାନନ୍ତି। ମ୍ୟାଚ ହେବବୋଲି ଘୋଷଣା ହେବା ଦିନଠାରୁ ସେ ଯୋଜନା କରିଥିଲେ। ମେସିଙ୍କ ସହ ଏକ ଫଟୋ ଉଠାଇବା ତାଙ୍କର ଉଦ୍ଦେଶ୍ୟ ଥିଲା ବୋଲି ପୋଲିସ ହାତରେ ଧରା ପଡ଼ିଥିଲା ଉକ୍ତ ବ୍ୟକ୍ତି ପ୍ରକାଶ କରିଛନ୍ତି।
