ଗଣ୍ଡତୁରୁମ, ୨୯।୧ (ଡି.ଏନ୍.ଏ.)- କ୍ୟାନ୍ସର ଗୁଟେ ଅମାନ୍ତିଆ ରୋଗ୍। ଇ ରୋଗ୍ ଏହେଦେ ସାରା ଦେଶ୍ରେ ଚିନ୍ତାର କାରନ୍ ପାଲଟିଥିଲାବେଲେ ବରଗଡ଼ ଜିଲା ଇ ତାଲିକାଥି ୨ ନମ୍ବରରେ ରହିଛେ। ଅନେକ୍ ରୁଗୀ ଇ ଅମାନ୍ତିଆ ରୋଗ୍ରେ ଯୁଝି ଯୁଝି ହାରିଯାଉଛନ୍। ବରଗଡ଼ ଜିଲାର ଏନ୍ତା ଝନେ ରୁଗୀ ଇ ଅମାନ୍ତିଆ ରୋଗ୍ରେ ପଡ଼ିଥିଲେ। ସେ ଆଗରୁ ତରକି ଚିକିଛା କରେ ଇ ରୋଗ୍ରୁ ବରତି ଯାଇଛନ୍। ହେଲେ ସେଦିନ୍ଠାନୁ ସେ ନିଜର କଉଲିକ୍ ବୁରତି ହରେଇଛନ୍। ଏନ୍ତାଥି ଫିମାସ ଉଷୋକଷା ଖରଚ୍ ତୁଲାଲାବେଲେ ତାହାକୁ ଭିଡ଼ ପଡ଼ିଯାଉଛେ ବଲି କହିଛନ୍।
ସୂଚନା ଅନ୍ସାରେ ବରଗଡ଼ ଜିଲା ଭେଡ଼େନ ବ୍ଲକ ମହୁଲପାଲି ପଁଚେତ୍ ଟିହିକିପାଲି ଗଁାର ରଙ୍କମଣି ମେହେର(୭୪)। ପରିବାର କହେଲେ ମାଏକିନା ସୁମିତ୍ରା(୭୦), ଦୁଇ ପୁଓ ଆର ୩ ଝି’କୁ ନେଇ ତାକର ସଁସାର। ରଙ୍କମଣିକଁର ବାପ୍ଅଜା ଅମଲୁ ପାଖାପାଖି ଦେଢ଼ ଏକର ଚାଷ୍ଜମି ରହିଛେ। ସେନ୍ତା ଜାତିରେ ଭୁଲିଆ ହେଇଥିବାର ଲାଗି ସେ କପ୍ଟା ବୁନାବୁନି କାମ୍କରି କୁଟୁମ ପୁଷୁଥିଲେ। ହେଲେ ସେ ଅନେକ୍ ବଛର ହେଲା ମଧୁମେହ ରୋଗ୍ରେ ପୀଡ଼ିତ ଅଛନ୍। ଗଲା ୨୦୧୮ ସାଲେ ଚାଷ୍ଜମିରେ କାମ୍ କଲାବେଲେ ତାକର ଭୁଜନି ହାତର ପାପ୍ଲିରେ ଗୁଟେ କଁଟା ଗଡ଼ିଯାଇଥିଲା। ହେଲେ ଘରକେ ଫିରଲା ଉତାରୁ ଦେଖ୍ଲେ ଯେ ହାତ୍ଟା ବେଂଗ୍ ଲେଖଁ ଫୁଲି ଯାଇଛେ। ଘରର ଲୋକ୍ ତାହାକୁ ଗଣ୍ଡତୁରୁମ ଡାକ୍ତରଖାନାକେ ନେଇ ଚିକିଛା କରାଲେ। ହେଲେ ତାର ଆରଦିନ ପାପ୍ଲିର ରଂଗ ଧଲା ହେଇ ବହୁତ୍ ଦରଜ୍ ହେଇଥିଲା। ଇ ସବୁ ଦେଖି ପରିବାର ଲୋକ୍ ଧାରଉଧାର କରି ବୁର୍ଲା ବଡ଼ ଡାକ୍ତରଖାନା ନେଇଥିଲେ। ସେଠାନେ ଦିନାକେତେ ରଖି ଚିକିଛା କରାଲେ, ହେଲେ କିଛି ଲାଭ୍ ନାଇଁହେଲା। ଏନ୍ତାଥି ପରିବାର ଲୋକ୍ ଜମିବାଡ଼ି, ଗହନାଗଁାଠି ବଁଧକ୍ ପକେଇ ବୁର୍ଲାର ଗୁଟେ ନର୍ସିଂହୋମରେ ତାହାକୁ ଚିକିଛା ଲାଗି ଭରତି କଲେ। ସେଠାନେ ପରୀକ୍ଷା ନିରୀକ୍ଷା ଉତାରୁ ରଙ୍କମଣି କ୍ୟାନ୍ସରରେ ପୀଡ଼ିତ ଥିବାର ଜନାପଡ଼ିଥିଲା। ହେଲେ ଚିକିଛା ଲାଗି ଅଧ୍କା ଟଁକା ପଏସା ଖରଚ୍ ହେବା ଜାନି ପରିବାର ଲୋକ୍ ରଙ୍କମଣିକୁଁ ଫେନ୍ଘାଏ ବୁର୍ଲା ବଡ଼ ଡାକ୍ତରଖାନାରେ ଭରତି କରିଥିଲେ। ସେଠାନେ ଗଲା ଜୁଲାଇ ୨୦ ତାରିଖ ଡାକ୍ତର ତାକର ଅପରେଶନ କରି ପାପ୍ଲିର ଅଧା କାଟି ଦେଇଥିଲେ। ସେଦିନ୍ଠାନୁ ରଙ୍କମଣି ଫିଦିନ୍ ଉଷୋକଷା ଖାଏବାର ସଂଗେ ଖାଏଦ୍ ପାଏନ୍ ଉପରେ ବି ଦୁରୁଷ୍ଟି ଦେଉଛନ୍। ଏହେଦେ ସେ ଗୁଟେପରକାର ଠିକ୍ ଅଛନ୍। ହେଲେ ତାକର ଅଧା ପାପ୍ଲି କଟିଯିବାର ଲାଗି ଲୁଗାବୁନି ନାଇଁ ପାରବାର। ସରକାରୀ ସାହାଯ୍ କହେଲେ ମାସିକ୍ ମିଲୁଥିବାର ସରକାରୀ ଚାଉଲ ଆର ୫ଶହ ଟଁକା ଭତା ନ ସାହାଭରସା। ଇଆଡ଼େ କୁଟୁମର ଚିନ୍ତା ସେଆଡ଼େ ଉଷୋକଷା ଖରଚ୍ ତୁଲାଲା ବେଲେ ବହୁତ୍ ଭିଡ଼ ହେଇଯାଉଛେ ବଲି ରଙ୍କମଣି କହିଛନ୍। ସେ ଗଣମାଧ୍ୟମ ଜରିଆରେ ସରକାରୀ ସାହାଯ୍ ଲାଗି ଜିଲା ପରଶାସନକେ ଗୁହାରି କରିଛନ୍।
