ସବୁ ଦେଶର ସୁରକ୍ଷିତ ସ୍ଥାନ ବା ଭବନ କହିଲେ ବୁଝାଏ ରାଷ୍ଟ୍ରପତି ଭବନ। ଏଠାରେ ସର୍ବଦା କଡା ସୁରକ୍ଷା ବ୍ୟବସ୍ଥା କରାଯାଇଥାଏ। ହେଲେ ଏହଠାରୁ ମଧ୍ୟ ଅଧିକ ସୁରକ୍ଷା ପ୍ରଦାନ କରାଯାଏ ଆମେରିକାରେ ଥିବା ‘ଫୋର୍ଟ ନକ୍ସ’ ବିଲଡିଂକୁ। ସୁରକ୍ଷା ଲାଗି ପ୍ରତିଦିନ ୨୪ ଘଣ୍ଟା ଏହା ଉପରେ ହେଲିକପ୍ଟର ଘୂରି ବୁଲୁଥାଏ। ପ୍ରକୃତରେ ଏହା ହେଉଛି ଆମେରିକା ସେନାର ଏ ପୋଷ୍ଟ। କଣ୍ଟୁକି ରାଜ୍ୟରେ ଅବସ୍ଥିତ ଏହି ଫୋର୍ଟ ଏକ ଲକ୍ଷ ୯ହଜାର ଏକର ପରିମିତ ସ୍ଥାନରେ ଅବସ୍ଥାପିତ। ବିଶ୍ୱର ଏହା ସବୁଠାରୁ ସୁରକ୍ଷିତ ବିଲଡିଂ ବୋଲି କୁହାଯାଏ। ଆମେରିକା ସେନା ଦ୍ୱାରା ୧୯୩୨ରେ ଏହାର ନିର୍ମାଣ କରାଯାଇଥିବା କୁହାଯାଏ। ଏଠାରେ ପକ୍ଷୀଟିଏ ଉଡିବା ବି କଷ୍ଟକର ବ୍ୟାପାର। ଏଠାରେ ଥିବା ଉଚ୍ଚ ଉଚ୍ଚ ପାଚିରୀ ମଜଭୁତ ମୋଟା ଗ୍ରାନାଇଟରେ ନିର୍ମାଣ କରାଯାଇଛି। ଆଉ ଏହାର ସୁରକ୍ଷା ପାଇଁ ପାଖାପାଖି ୩୦ ହଜାର ସେନାଙ୍କୁ ମୁତୟନ କରାଯାଇଛି। ଫୋର୍ଟ ନକ୍ସର ଛାତ ସମ୍ପୂର୍ଣ୍ଣ ଭାବେ ବୋମା ନିରୋଧକ। ଯେ କୌଣସି ଧରଣର ବୋମା ଫୁଟିଲେ ମଧ୍ୟ ଏହାର କୌଣସି କ୍ଷତି କରିପାରିବ ନାହିଁ। ଏହାସହ ଏହାର ଚାରିପଟେ ବିଭିନ୍ନ ପ୍ରକାରର ଆଲାମ୍ ମଧ୍ୟ ଲଗାଯାଇଛି। ଏହାର ସୁରକ୍ଷାରେ ଆପାଚେ ହେଲିକପ୍ଟର ବ୍ୟବହାର କରାଯାଉଛି। ବିନା ଅନୁମତିରେ ଏହା ଭିତରକୁ ତ ଦୂରର କଥା ଏହା ନିକଟକୁ ପହଞ୍ଚିବା ମଧ୍ୟ କଷ୍ଟକର ବ୍ୟାପାର ହୋଇଥାଏ। ଫୋର୍ଟ ନକ୍ସକୁ ଗୋଲ୍ଡ ରିଜର୍ଭ ବୋଲି ମଧ୍ୟ କୁହାଯାଏ। କାରଣ ଏଠାରେ ପାଖାପାଖି ୪୨ ଲକ୍ଷ କିଲୋ ସୁନା ରଖାଯାଇଛି। ଏହାବ୍ୟତିତ ଏଠାରେ ଆମେରିକା ସ୍ବତନ୍ତ୍ରତାର ଅସଲି ଘୋଷଣାପତ୍ର, ଗୁଟେନବର୍ଗର ବାଇବେଲ ଓ ଆମେରିକା ସମ୍ବିଧାନର ଅସଲି କପି ଆଦି ମହତ୍ୱପୂର୍ଣ୍ଣ ଜିନିଷ ଗଚ୍ଛିତ ରହିଛି।
