ରାଜରାସ୍ତାକୁ ଓହ୍ଲାଇବେ ଜୁନିୟର ଶିକ୍ଷକ
9:07 pmFebruary 13, 2023 / 09

ଜଳେଶ୍ୱର, ୧୩ା୨(ଡି.ଏନ୍‌.ଏ.): ଗତ ୪ ମାସ ତଳେ ମୁଖ୍ୟମନ୍ତ୍ରୀ ଓଡ଼ିଶା ମାଟିରୁ ଚୁକ୍ତିଭିତ୍ତିକ ଯୁଗ ଶେଷ ହେଲା ବୋଲି ଘୋଷଣା କରିଥିବା ବେଳେ ରାଜ୍ୟର ପ୍ରାଥମିକ ବିଦ୍ୟାଳୟଗୁଡିକରେ କାର୍ଯ୍ୟରତ ପ୍ରାୟ ୧୩ହଜାର କନିଷ୍ଠ ଶିକ୍ଷକ, ଶିକ୍ଷୟିତ୍ରୀ ଚୁକ୍ତିଭିତ୍ତିରେ ଓ ସ୍ବଳ୍ପ ଦରମାରେ ଥିବାରୁ ସେମାନଙ୍କୁ ସରକାରୀ ଘୋଷଣା କରିବାକୁ ଦାବି ହୋଇଛି। ରବିବାର ଜଳେଶ୍ୱର ଶାଖା ପକ୍ଷରୁ ଆୟୋଜିତ ଖବରଦାତା ସମ୍ମିଳନୀରେ ଏହି ଶିକ୍ଷକମାନଙ୍କୁ ଚୁକ୍ତିଭିତ୍ତିକ ପ୍ରଥାରୁ ମୁକ୍ତି କରିବା ଦାବି କରି ପୋଷ୍ଟକାର୍ଡ ଜରିଆରେ ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ ଲୋଡିଛନ୍ତି ା
ଗତ ୧୫ା୧୦ା୨୨ରେ ରାଜ୍ୟ ସରକାର ସବୁ ବିଭାଗର ଚୁକ୍ତି ଭିତ୍ତିକ କର୍ମଚାରୀଙ୍କୁ ନିୟମିତ କରିବା ଘୋଷଣା କରିଥିଲେ। ଅଦ୍ୟାବଧି ମୋଟ ୭୦ହଜାର ଚୁକ୍ତିଭିତ୍ତିକଙ୍କ ମଧ୍ୟରୁ ୧୩୮୦୦ କନିଷ୍ଠ ଶିକ୍ଷକ ସେଥିରେ ସାମିଲ ହୋଇ ନ ଥିବା ଜଳେଶ୍ୱର ବ୍ଲକ ସଭାପତି ଲକ୍ଷ୍ମୀନାରାୟଣ ଦାସ ଓ ସମ୍ପାଦକ ସୌଭାଗ୍ୟ କର ଖବରଦାତା ସମ୍ମିଳନୀରେ ଘୋଷଣା କରିଛନ୍ତି ା ହାଇସ୍କୁଲରେ କାର୍ଯ୍ୟରତ ଶିକ୍ଷକମାନେ ରେଗୁଲାର ହୋଇଥିବା ବେଳେ ପ୍ରାଥମିକ ଶିକ୍ଷକ (ଚୁକ୍ତିଭିତ୍ତିକ)ଙ୍କୁ ରେଗୁଲାର କରାଯାଇ ନ ଥିବାରୁ କ୍ଷୋଭ ପ୍ରକାଶ ପାଇଛି ା ସମଗ୍ର ବାଲେଶ୍ୱର ଜିଲାରେ ୩୨୦ଶିକ୍ଷକ ଏପରି ଥିବା ବେଳେ ଜଳେଶ୍ୱରର ୩୦ ଶିକ୍ଷୟିତ୍ରୀ ଶିକ୍ଷକ ପୋଷ୍ଟକାର୍ଡ ଜରିଆରେ ମୁଖ୍ୟମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଛନ୍ତି। ବିଦ୍ୟାଳୟ ଚାରିକାନ୍ଥ ମଧ୍ୟରେ ବିଭିନ୍ନ ବର୍ଗର ଶିକ୍ଷକ ରହିଥିବା ଓ ସେମାନଙ୍କ ମଧ୍ୟରୁ କେତେକଙ୍କୁ ସ୍ବଳ୍ପ ବେତନ ଦିଆଯାଉଥିବାରୁ ଶିକ୍ଷାଦାନରେ ମାନସିକତାରେ ବ୍ୟାଘାତ ସୃଷ୍ଟି ହେଉଥିବା ସେମାନେ କହିଛନ୍ତି। ଏହି ଖବରଦାତା ସମ୍ମିଳନୀରେ ଶୁଭଶ୍ରୀ ପାତ୍ର, ବ୍ରଜେଶ୍ୱର ପ୍ରମାଣିକ ଓ ରାମକୃଷ୍ଣ ଘୋଷ ପ୍ରମୁଖ କର୍ମକର୍ତ୍ତା ଉପସ୍ଥିତ ଥିଲେ ା