ମୁଖ୍ୟରାସ୍ତା ହେଲା ନୋ ପାର୍କିଂ ଜୋନ୍‌
8:17 amJanuary 29, 2020 / 21

ଜୟପୁର,୨୯।୧(ନି.ପ୍ର./ଡି.ଏନ୍‌.ଏ.) – ଦକ୍ଷିଣ ଓଡ଼ିଶାର ପ୍ରମୁଖ ସହର ଜୟପୁର ମୁଖ୍ୟରାସ୍ତାରେ ଟ୍ରାଫିକ ସମସ୍ୟା ଦିନକୁ ଦିନ ବୃଦ୍ଧି ପାଉଥିବାରୁ ଏହାକୁ ନିୟନ୍ତ୍ରଣ ପାଇଁ ପଦକ୍ଷେପ ନେଇଛି ଟାଉନଥାନା ପୋଲିସ। ରଜାନହର ଛକରୁ ତହସିଲ ଅଫିସ ଯାଏ ନୋ ପାର୍କିଂ ଜୋନ୍‌ କରାଯାଇଛି। ଏହି ରାସ୍ତାରେ ୨ ଚକିଆ ଯାନ ପାର୍କିଂ କରିହେବ। କିନ୍ତୁ ଚାରି ଓ ତିନି ଚକିଆ ଗାଡ଼ି ସବୁ ତହସିଲ ଅଫିସରୁ ଜଗତ ଜନନୀ ଛକ ଭିତରେ ପାର୍କିଂ କରାଯିବ। କୌଣସି ଗାଡ଼ିକୁ ଅଧିକ ସମୟ ପାର୍କିଂ କରିବାକୁ ଦିଆଯିବ ନାହିଁ। ସକାଳ ୮ରୁ ଅପରାହ୍ନ ୨ଟା ଓ ଦିନ ୪ରୁ ରାତି ୧୦ଟା ଭିତରେ କମର୍ସିଆଲ ଗାଡ଼ି ମୁଖ୍ୟରାସ୍ତାରେ ପଶିପାରିବେ ନାହିଁ। ପ୍ରତ୍ୟେକ ଦିନ ପୋଲିସ ପାଟ୍ରୋଲିଂ ଗାଡ଼ି ଏହାର ଯାଞ୍ଚ କରିବ ଓ ନିୟମ ଉଲ୍ଲଂଘନ ହେଲେ ଆଇନ ଅନୁଯାୟୀ ଜରିମାନା ଆଦାୟ କରାଯିବ। ସେହିପରି ଏମ୍‌ଜି ରୋଡରେ ମଧ୍ୟ ନୋ ଓ୍ବେ ଘୋଷଣା କରାଯାଇଛି। ସେଠାକୁ ୩ ଓ ୪ ଚକିଆ ଯାନ ପଶିପାରିବ ନାହିଁ। କେବଳ ବାଇକ୍‌ ହିଁ ଚଳପ୍ରଚଳ କରିବ। ସ୍କୁଲ ଛୁଟି ସମୟରେ ରାସ୍ତା ଜାମ ହେବା ସହ ଟ୍ରାଫିକ ସମସ୍ୟା ଦେଖାଯାଉଛି। ଏହା ସହ ଅଟୋବାଲା ଅନାବଶ୍ୟକ ବ୍ଲକେଜ କରୁଛନ୍ତି, ତାହାକୁ ମଧ୍ୟ ରୋକିବ ପୋଲିସ। ଏସବୁ ସମ୍ପର୍କରେ ଡାକବାଜି ଯନ୍ତ୍ର ଦ୍ୱାରା ଲୋକଙ୍କୁ ସଚେତନ କରାଯାଇଛି ବୋଲି ଟାଉନ ଥାନା ଅଧିକାରୀ ବାଲେଶ୍ୱର ଗିଧି ସୂଚନା ଦେଇଛନ୍ତି।