ଲକ୍ଷ୍ନୌ, ୨୮।୭: ଶ୍ରାବଣରେ ଆରମ୍ଭ ହୋଇଯାଇଛି କାଉଡି ଯାତ୍ରା। ବିଶେଷ କରି ଉତ୍ତର ପ୍ରଦେଶରେ କାଉଡିଆଙ୍କ ପାଇଁ ସ୍ବତନ୍ତ୍ର ବ୍ୟବସ୍ଥାମାନ କରାଯାଇଛି। ଏମାନଙ୍କ ପାଇଁ ଖୋଲାଯାଇଥିବା ପ୍ରାକୃତିକ ଚିକିତ୍ସା ସେବା ଶିବିରର ଉଦ୍ଘାଟନ କରିବାକୁ ଶାମଲିର ଏସ୍ପି ଅଜୟ କୁମାରଙ୍କୁ ଡକାଯାଇଥିଲା। ସେ ସେଠାରେ ପହଞ୍ଚିବା ପରେ ଶିବିର ମଧ୍ୟରେ ଜଣେ କାଉଡିଆ ଅତ୍ୟନ୍ତ ଥକ୍କା ହୋଇ ଶୋଇ ପଡିଥିବା ଦେଖି ଏସ୍ପି ନିଜ ହାତରେ କାଉଡିଆଙ୍କ ଗୋଡ ଦବାଇ ଦେଇଥିଲେ। ପୋଲିସକର୍ମୀଙ୍କ କାନଭାସ୍ ବିସ୍ତୃତ ଏହାକୁ ସଂକୀର୍ଣ୍ଣ ଦୃଷ୍ଟିରେ ଦେଖିବା ଠିକ୍ ନୁହେଁ ବୋଲି ସେ କହିଥିଲେ। ଯଦି ଜଣେ ସିପାହୀ, ସବ୍ ଇନସପେକ୍ଟର ଓ ଇନସପେକ୍ଟର ଆହତ ଲୋକଙ୍କ ଚିକିତ୍ସା କରି ପାରୁଛନ୍ତି ତେବେ ଏସ୍ପି କାହିଁକି କରିପାରିବେ ନାହିଁ ବୋଲି ସେ କହିଥିଲେ। ମାନବ ସେବା ହିଁ ମାଧବ ସେବା ବୋଲି ସେ କହିଛନ୍ତି। ତେବେ ଏସ୍ପି ଅଜୟ କୁମାରଙ୍କ ଏହି କାମ ଏବେ ସବୁଠି ଆଲୋଚନାର ବିଷୟ ପାଲଟିଥିବା ବେଳେ ସେ ସମୟର ଏକ ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି।
