କିଙ୍ଗଷ୍ଟନ, ୮ା୬ (ପି.ଟି.)-ଓ୍ବେଷ୍ଟଇଣ୍ଡିଜର ସ୍ବଳ୍ପ ବୟସ୍କ ପେସ୍ ବୋଲର ଓଶାନେ ଥୋମାସ୍ ଉଚ୍ଚ ଅଭିଳାଷ ରଖିଛନ୍ତି। ସେ ଜଣେ ମହାନ କ୍ରିକେଟର ହେବାକୁ ଚାହାଁନ୍ତି। ଇଂଲଣ୍ଡ ଟୁର୍ ପାଇଁ ଘୋଷଣା କରାଯାଇଥିବା ୨୫ ଜଣିଆ ଓ୍ବେଷ୍ଟଇଣ୍ଡିଜ କ୍ରିକେଟ ଦଳରେ ଜଣେ ରିଜର୍ଭ ଖେଳାଳି ଭାବେ ତାଙ୍କୁ ନିଆଯାଇଛି। ୨୦୧୮ରେ ନଜରକୁ ଆସିବାପରଠାରୁ ୨୩ବର୍ଷୀୟ ଥୋମାସ ଓ୍ବେଷ୍ଟଇଣ୍ଡିଜ ତରଫରୁ ହ୍ବାଇଟ୍ ବଲ୍ କ୍ରିକେଟ ଖେଳି ଆସୁଛନ୍ତି। ଏପର୍ଯ୍ୟନ୍ତ ସେ ଟେଷ୍ଟ ମ୍ୟାଚ ଖେଳିବା ସୁଯୋଗ ପାଇ ନାହାନ୍ତି। ସେ ଇତିମଧ୍ୟରେ ୨୦ ଅନ୍ତର୍ଜାତୀୟ ଦିନିକିଆ ଓ ୧୨ ଅନ୍ତର୍ଜାତୀୟ ଟି୨୦ ମ୍ୟାଚ ଖେଳି ସାରିଛନ୍ତି। ଇଂଲଣ୍ଡରେ ତାଙ୍କୁ ଟେଷ୍ଟ ପଦାର୍ପଣର ସୁଯୋଗ ମିଳିବ ବୋଲି ସେ ଆଶା ରଖିଛନ୍ତି। ଥୋମାସ୍ କହିଛନ୍ତି, ମୁଁ ଜଣେ ଆଭରେଜ କ୍ରିକେଟର ହେବାକୁ ଚାହେନା ବରଂ ତିନୋଟି ଫର୍ମାଟରେ ଭଲ ପ୍ରଦର୍ଶନ କରି ଭବିଷ୍ୟତରେ ମହାନ କ୍ରିକେଟର ହେବାକୁ ମୋର ଇଚ୍ଛା। ଥୋମାସ୍ ଗତ ବର୍ଷ ଇଂଲଣ୍ଡ ବିପକ୍ଷ ଘରୋଇ ସିରିଜ ପାଇଁ ଟେଷ୍ଟ ଦଳରେ ସ୍ଥାନ ପାଇଥିଲେ। ମାତ୍ର ଏହି ଯୁବ ଖେଳାଳିଙ୍କୁ ସୁଯୋଗ ମିଳି ନ ଥିଲା। ଓ୍ବେଷ୍ଟଇଣ୍ଡିଜ ୨-୧ରେ ସରିଜ ବିଜୟୀ ହୋଇଥିଲା। ଆସନ୍ତା ସପ୍ତାହରେ ଇଂଲଣ୍ଡ ଟୁର ପାଇଁ ଓ୍ବେଷ୍ଟଇଣ୍ଡିଜ ୧୪ ଜଣିଆ ଦଳ ଘୋଷଣା କରିଥିବାବେଳେ ୧୧ଜଣିଆ ରିଜର୍ଭ ଖେଳାଳି ତାଲିକା ପ୍ରକାଶ କରିଛନ୍ତି। କରୋନାଭାଇରସ୍ ସଂକ୍ରମଣ ରିସ୍କ ଥିବାରୁ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଜୈବ-ସୁରକ୍ଷିତ ପରିବେଶ ସହ ରୁଦ୍ଧଦ୍ୱାରରେ ଖେଳାଯିବା ଲାଗି ପ୍ରସ୍ତାବ ରହିଛି।
