ନୂଆଦିଲ୍ଲୀ,୨୬।୯: ୨୦୨୭ ଦିନିକିଆ ବିଶ୍ୱକପକୁ ନଜରରେ ରଖି ଭାରତୀୟ କ୍ରିକେଟ ଦଳ ପାଇଁ ଆଗାମୀ ପ୍ରତ୍ୟେକ ସିରିଜ ଗୁରୁତ୍ୱପୂର୍ଣ୍ଣ ହେବ। ଭାରତ ଓ ୱେଷ୍ଟଇଣ୍ଡିଜ ମଧ୍ୟରେ ୩ ମ୍ୟାଚ ବିଶିଷ୍ଟ ଦିନିକିଆ ସିରିଜ ସେପ୍ଟେମ୍ବର ୨୭ରୁ ଆରମ୍ଭ ହେବ। ଏହା ପୂର୍ବରୁ ଟିମ ଇଣ୍ଡିଆର ବୋଲିଂ କୋଚ ମୋର୍ନେ ମୋର୍କେଲ କହିଛନ୍ତି ଯେ ବିଶ୍ୱକପ ପାଇଁ ପ୍ରସ୍ତୁତି ଆରମ୍ଭ ହୋଇସାରିଛି। ଏଥିପାଇଁ ବୋଲରମାନଙ୍କୁ ଅଧିକରୁ ଅଧିକ ଗେମ ଟାଇମ ଦେବା ଅତ୍ୟନ୍ତ ଜରୁରୀ ବୋଲି ସେ କହିଛନ୍ତି।
୩ ମ୍ୟାଚ ବିଶିଷ୍ଟ ସିରିଜର ପ୍ରଥମ ମ୍ୟାଚ ରବିବାର ଥିରୁଭାନନ୍ତପୁରମରେ ଖେଳାଯିବ। ୱେଷ୍ଟଇଣ୍ଡିଜ ବିପକ୍ଷ ସିରିଜ ପାଇଁ ଭାରତୀୟ ଦଳର ଦ୍ରୁତ ବୋଲିଂ ବିଭାଗରେ ପ୍ରସିଦ୍ଧ କୃଷ୍ଣା, ମହମ୍ମଦ ସିରାଜ, ଗୁରନୂର ବ୍ରାଡାର ଓ ଆକିବ ନବୀଙ୍କୁ ସାମିଲ କରାଯାଇଛି।
ପ୍ରେସ କନଫରେନ୍ସରେ ମୋର୍କେଲ କହିଛନ୍ତି , ବୋଲରମାନଙ୍କୁ ନିୟମିତ ଖେଳିବାର ସୁଯୋଗ ଦେବା ଅତ୍ୟନ୍ତ ଜରୁରୀ। ବିଭିନ୍ନ ପରିସ୍ଥିତିରେ ବୋଲରମାନେ କିପରି ପ୍ରଦର୍ଶନ କରୁଛନ୍ତି, ତାହା ବୁଝିବା ପାଇଁ ଗେମ ଟାଇମ ଆବଶ୍ୟକ ବୋଲି ସେ କହିଛନ୍ତି।
ମୋର୍କେଲଙ୍କ କହିବା ଅନୁଯାୟୀ, ଗତ ବର୍ଷ ମଧ୍ୟ ଦଳ ପରିଚାଳନା ବୋଲରମାନଙ୍କୁ ଅଧିକ ମ୍ୟାଚ ଖେଳାଇ ବିଭିନ୍ନ ପରିସ୍ଥିତିରେ ସେମାନଙ୍କ ପ୍ରଦର୍ଶନ ପରଖିବାକୁ ଚେଷ୍ଟା କରିଥିଲା। ୱେଷ୍ଟଇଣ୍ଡିଜ ବିପକ୍ଷ ସିରିଜରେ ମଧ୍ୟ ଏହି ପ୍ରକ୍ରିୟା ଜାରି ରହିବ। ଏହା ସହ ନ୍ୟୁଜିଲାଣ୍ଡ ବିପକ୍ଷ ଆଗାମୀ ସିରିଜ ଉପରେ ମଧ୍ୟ ଦଳର ନଜର ରହିଛି।
୨୦୨୭ ବିଶ୍ୱକପକୁ ଦୃଷ୍ଟିରେ ରଖି ଗତ ଏକ ବର୍ଷ ଧରି ଟିମ ମ୍ୟାନେଜମେଣ୍ଟ ଅନେକ ନୂଆ ଖେଳାଳିଙ୍କୁ ସୁଯୋଗ ଦେଇ ସେମାନଙ୍କୁ ପରଖି ଆସୁଛି। ବୋଲରମାନଙ୍କୁ ଆନ୍ତର୍ଜାତୀୟ ସ୍ତରରେ ଆବଶ୍ୟକ ଅଭିଜ୍ଞତା ଦେବା ଏହି ପ୍ରସ୍ତୁତିର ଏକ ଅଂଶ ବୋଲି ମୋର୍କେଲ ସଙ୍କେତ ଦେଇଛନ୍ତି।
