ଭୁବନେଶ୍ୱର,୧୭।୧(ବ୍ୟୁରୋ):ଗାଡି ନମ୍ବର, ଆଧାର କାର୍ଡ ଓ କାଗଜପତ୍ର ଜାଲିଆତି କରିଥିଲେ। ପରେ ମଦ ବୋଝେଇ ଟ୍ରକ୍ ହାଇଜାକ୍ କରି ରାଜଧାନୀରୁ ନେଇ ଅନୁଗୋଳର ଏକାଧିକ ମଦ ବ୍ୟବସାୟୀଙ୍କୁ ବିକ୍ରି କରିଥିଲେ। ଏହି ଘଟଣାରେ ସମ୍ପୃକ୍ତ ଏକ ଗ୍ୟାଙ୍ଗର ମାଷ୍ଟରମାଇଣ୍ଡ୍ ସମେତ ୩ ଜଣଙ୍କୁ ତମାଣ୍ଡୋ ଥାନା ପୋଲିସ ଗିରଫ କରିଛି। ସେମାନେ ହେଲେ ମାଷ୍ଟରମାଇଣ୍ଡ୍ ଅନୁଗୋଳର ସୋନୁ କୁମାର ଜେନା, ଖୋର୍ଦ୍ଧା ଜିଲା ବୋଲଗଡ଼ର ଭାସ୍କର ଚନ୍ଦ୍ର ସାମନ୍ତରାୟ ଓ ବିଶ୍ୱଜିତ ମହାନ୍ତି। ପୋଲିସ ଅଭିଯୁକ୍ତଙ୍କୁ ଗିରଫ କରିବା ସହ ଟ୍ରକ୍ ଓ ସେଥିରେ ଥିବା ୧୫୦ ମଦ ପେଟି ଜବତ କରିଛି। ଏନେଇ ପୋଲିସ ମାମଲା (ନଂ.୦୮/୨୩) ରୁଜୁ କରି ସୋମବାର ୩ ଅଭିଯୁକ୍ତଙ୍କୁ କୋର୍ଟ ଚାଲାଣ କରିଥିଲା। ଜାମିନ ନାମଞ୍ଜୁର ହେବାରୁ ସେମାନଙ୍କୁ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଛି। ଏଥିସହ ମୁଖ୍ୟ ଅଭିଯୁକ୍ତ ସୋନୁଙ୍କୁ ୭ ଦିନିଆ ରିମାଣ୍ଡରେ ଆଣିବାକୁ କୋର୍ଟରେ ପୋଲିସ ଆବେଦନ କରିଛି। ସୋନୁଙ୍କ ନାମରେ ଅନୁଗୋଳ ଜିଲାରେ ହତ୍ୟା, ଡକାୟତି, ସଂଗଠିତ ଅପରାଧ, ଅପହରଣ ଆଦି ୨୦ରୁ ଅଧିକ ମାମଲା ଥିବା ପୋଲିସ ଜାଣିବାକୁ ପାଇଛି। ଅନ୍ୟପକ୍ଷରେ ଅନ୍ୟତମ ଫେରାର ଅଭିଯୁକ୍ତ ପ୍ରଦୀପ ଓ ଅନ୍ୟମାନଙ୍କୁ ଧରିବାକୁ ଉଦ୍ୟମ ଚଳାଇଛି।
ସୂଚନା ଅନୁଯାୟୀ, ଭଗବାନପୁର ମଉଜାରେ ଷ୍ଟାଇଲ୍ ଓରିଏଣ୍ଟାଲ୍ ବଟଲିଂ ନାମରେ ଏକ ବିଦେଶୀ ମଦ ଉତ୍ପାଦନକାରୀ କମ୍ପାନୀ ରହିଛି। ଏଠାରୁ ବିଭିନ୍ନ ପରିବହନ କମ୍ପାନୀ ମାଧ୍ୟମରେ ଓଡ଼ିଶାରେ ଥିବା ବିଭିନ୍ନ ସରକାରୀ ଡିପୋଗୁଡିକୁ ମଦ ରପ୍ତାନି କରାଯାଏ। ମଦ ପରିବହନ କରିବାକୁ ଟ୍ରକ୍ ଆବଶ୍ୟକ ପଡିବାରୁ କମ୍ପାନୀ ପକ୍ଷରୁ ୱେଲକମ୍ ଏଣ୍ଟରପ୍ରାଇଜେସ୍ ସଂସ୍ଥାକୁ ଯୋଗାଯୋଗ କରାଯାଇଥିଲା। ୱେଲ୍କମ୍ ସଂସ୍ଥାର କର୍ମଚାରୀ ପ୍ରଭାତ ଓ ପବିତ୍ର ୨ଟି ଯାନ ବୁଝିବାକୁ ଖୋର୍ଦ୍ଧାର ସନ୍ତୁ ନାମକ ଜଣେ ଟ୍ରକ୍ ୟୁନିଅନ୍ ସୁପରଭାଇଜରଙ୍କ ସହ ଯୋଗାଯୋଗ କରିଥିଲେ। ଏହା ଜାଣିବା ପରେ ସନ୍ତୁଙ୍କୁ ଅଭିଯୁକ୍ତ ପ୍ରଦୀପ ଫୋନ୍ କରି ନିଜକୁ ଟ୍ରକ ମାଲିକ ପରିଚୟ ଦେଇ ଗାଡ଼ି ଭଡ଼ାରେ ଲଗାଇବାକୁ କହିଥିଲେ। ସନ୍ତୁଙ୍କ କଥାନୁସାରେ ସଂସ୍ଥାର କର୍ମଚାରୀ ପ୍ରଭାତଙ୍କ ସହ ଅଭିଯୁକ୍ତ ପ୍ରଦୀପ ଡକ୍ୟୁମେଣ୍ଟେଶନ ଏବଂ ପରିବହନ ଚାର୍ଜ ଇତ୍ୟାଦି ବିଷୟରେ ଆଲୋଚନା କରିଥିଲେ। ମଦ ଭୁବନେଶ୍ୱରରୁ ସମ୍ବଲପୁର ଡିପୋକୁ ଯିବା ନେଇ କଥା ଫାଇନାଲ ହେବା ପରେ ପ୍ରଦୀପ ଟ୍ରକ୍ ଡ୍ରାଇଭର ବଇରାଗି ଦେହୁରୀଙ୍କ ସହ ପ୍ରଭାତଙ୍କୁ କଥା କରାଇଥିଲେ। ଅଭିଯୁକ୍ତମାନେ ପୂର୍ବ ଯୋଜନାନୁଯାୟୀ ଗତ ଜାନୁୟାରୀ ୫ରେ ଡ୍ରାଇଭର ବାଇରାଗି ଏବଂ ହେଲ୍ପର ଭାସ୍କର ସାମନ୍ତରାୟଙ୍କ ସହ କାରଖାନାରେ ପହଞ୍ଚତ୍ଥିଲେ। ୬ ତାରିଖ ଦିନ ୧୧ଟାରେ ୬୦ଲକ୍ଷ ଟଙ୍କାର ୯୫୦ ପେଟି ମଦ ଭର୍ତ୍ତି ଟ୍ରକ୍ଟି ସମ୍ବଲପୁର ଅଭିମୁଖେ ବାହାରିଥିଲା। କିନ୍ତୁ ଟ୍ରକ୍କୁ ସମ୍ବଲପୁର ପରିବର୍ତ୍ତେ ଅନୁଗୋଳକୁ ନେଇ ଅଭିଯୁକ୍ତ ସୋନୁର ଘରେ ବହୁ ପେଟି ଅନ୍ଲୋଡ୍ କରିଥିଲେ। ଅବଶିଷ୍ଟ ମଦକୁ ବିଭିନ୍ନ ସ୍ଥାନରେ ବିକ୍ରି କରିଥିଲେ। ଟ୍ରକ୍ ଡ୍ରାଇଭର ମୋବାଇଲ୍ ଟ୍ରାକ୍ କରାଯାଉଥିବା ସନ୍ଦେହ କରି ତାଙ୍କୁ ବସ୍ରେ ସମ୍ବଲପୁର ପଠାଇଥିଲେ। ହେଲେ ଡ୍ରାଇଭର ଜଣକ ଉକ୍ତ ବସ୍ରେ ମୋବାଇଲ ଛାଡି ଦେଇ ଚାଲିଯାଇଥିଲେ। ଟ୍ରାନ୍ସପୋର୍ଟ ସଂସ୍ଥା ଡ୍ରାଇଭରଙ୍କ ମୋବାଇଲ ଟ୍ରାକ୍ କରିବାରୁ ତାହା ରାୟପୁର ଦେଖାଇଥିଲା। ଏହାପରେ ସଂସ୍ଥା କର୍ମଚାରୀ ପବିତ୍ର ତମାଣ୍ଡୋ ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ କରି ର଼୍ୟାକେଟକୁ ଧରିବାରେ ସଫଳ ହୋଇଛି।
