ପାଟନା, ୧୦।୭: ଆଇସିସି ବିଶ୍ୱକପରେ ଭାରତ ଏବଂ ନ୍ୟୁଜିଲାଣ୍ଡ ମଧ୍ୟରେ ସେମିଫାଇନାଲ ଖେଳାଯାଉଛି। ଭାରତର ବିଜୟ କାମନା କରି ଦେଶର ବିଭିନ୍ନ ସ୍ଥାନରେ ଯଜ୍ଞ, ପୂଜାର୍ଚ୍ଚନା କରାଯାଉଥିଲାବେଳେ ବିହାରର ଜେଡିୟୁ ନେତା ଅଜୟ ଆଲୋକ ଭାରତୀୟ ଦଳକୁ ଶୁଭକାମନା ଦେବା ଚକ୍କରରେ ଫଶିଯାଇଛନ୍ତି। ସେ ଟିମ୍ ଇଣ୍ଡିଆର ଏକ ଫେକ୍ ଫଟୋ ନିଜ ଟୁଇଟରରେ ପୋଷ୍ଟ କରିଛନ୍ତି। ଉକ୍ତ ଫଟୋରେ ଭାରତୀୟ ଦଳର କୋଚ ରବି ଶାସ୍ତ୍ରୀ ଏବଂ ବିରାଟ କୋହଲିଙ୍କ ଗୋଡ ତଳେ ଦୁଇଟି ମଦ ବୋତଲ ରଖାଯାଇଛି। ଏହି ଫଟୋ ପୋଷ୍ଟ କରି ସେ ଲେଖିଛନ୍ତି, ଭଲ ହେଲା ଏହି ଫଟୋଟି ବିହାରରେ ନିଆଯାଇନାହିଁ, ନଚେତ୍ ବିଶ୍ୱକପର ମଜା ଜେଲରେ ଉଠାଇବାକୁ ପଡିଥାନ୍ତା। ଏଥିସହ ସେ ଭାରତୀୟ ଦଳକୁ ଶୁଭକାମନା ଦେଇଥିଲେ। ଅଜୟ ଏହି ଫେକ୍ ଫଟୋ ଛାଡିବା ପରେ ସୋସିଆଲ ମିଡିଆରେ ଟ୍ରୋଲ ହୋଇଛନ୍ତି।
