ଗଞ୍ଜାମ,୧୨ା୧(ଡି.ଏନ୍.ଏ.)- ରମ୍ଭା ଥାନା ଖଣ୍ଡଦେଉଳୀ ଛକଠାରେ ରବିବାର ପୂର୍ବାହ୍ନ ସାଢ଼େ ୧୧ଟାରେ ଟ୍ରାକ୍ଟର ଓ ବୋଲେରୋ ମୁହାଁମୁହିଁ ଧକ୍କା ହେବାରୁ ୧୧ ଜଣ ଆହତ ହୋଇଥିଲେ। ସେମାନଙ୍କ ମଧ୍ୟରୁ ୮ ଜଣ ଗୁରୁତର ଥିବା ଜଣାପଡ଼ିଛି। ଗୁରୁତରମାନେ ହେଲେ ମମତା ମଲିକ, ସୁକାନ୍ତି ରାଶ, ଅରୁଣ ଜେନା, ଅଭୟ ସେଠୀ, ଭାରତୀ ସାହୁ, ମାନସୀ ବେହେରା, ଇନ୍ଦୁମତି ବେହେରା, ଗୌରାଙ୍ଗ ତ୍ରିପାଠୀ ପ୍ରମୁଖ। ସେମାନେ କେନ୍ଦ୍ରାପଡ଼ା ଓ ଯାଜପୁର ଅଞ୍ଚଳର ବୋଲି ଜଣାପଡ଼ିଛି। ମିଳିଥିବା ସୂଚନାନୁଯାୟୀ, ଗୋଟିଏ ବୋଲେରୋ (ନଂ. ଓଡି୦୪ଏନ-୧୨୪୮)ରେ ୧୧ ଜଣ ଶିକ୍ଷୟିତ୍ରୀ ଶିକ୍ଷକ ପୁରୁଷୋତ୍ତମପୁରସ୍ଥିତ ମା’ ତାରାତାରିଣୀଙ୍କ ଦର୍ଶନ ସାରି ଫେରୁଥିବା ବେଳେ ହୁମା ପଟୁ ଯାଉଥିବା ଇଟା ବୋଝେଇ ଟ୍ରାକ୍ଟର (ନଂ.ଓଡି୦୭ଟି-୪୬୬୧) ସହ ଖଣ୍ଡଦେଉଳୀ ଛକରେ ମୁହାଁମୁହିଁ ଧକ୍କା ହୋଇଥିଲା। ଟ୍ରାକ୍ଟର ଡ୍ରାଇଭର ସମେତ ବୋଲେରୋରେ ବସିଥିବା ବ୍ୟକ୍ତିମାନେ ଗୁରୁତର ଆହତ ହୋଇଥିଲେ। ସ୍ଥାନୀୟ ଲୋକେ ଆହତଙ୍କୁ ପ୍ରଥମେ ଖଣ୍ଡଦେଉଳୀ ସ୍ବାସ୍ଥ୍ୟକେନ୍ଦ୍ରରେ ଭର୍ତ୍ତି କରିଥିଲେ। ହୁମ୍ମା ଫାଣ୍ଡି ଅଧିକାରୀ ରାମଚନ୍ଦ୍ର ବେହେରା ପହଞ୍ଚତ୍ ୧୦୮ ଆମ୍ବୁଲାନ୍ସ ଯୋଗେ ଆହତଙ୍କୁ ବ୍ରହ୍ମପୁର ବଡ ମେଡିକାଲକୁ ପଠାଇବା ବ୍ୟବସ୍ଥା କରିଥିଲେ। ଉଭୟ ପଟେ ବହୁ ଗାଡି ଅଟକି ରହିଥିଲା। କ୍ରେନ ସାହାଯ୍ୟରେ ଦୁର୍ଘଟଣାଗ୍ରସ୍ତ ଗାଡ଼ିକୁ ରାସ୍ତା ପାର୍ଶ୍ୱକୁ ନିଆଯିବାପରେ ଉକ୍ତ ରାସ୍ତାରେ ଗାଡି ଚଳାଚଳ ସ୍ବାଭାବିକ ହୋଇଥିଲା।
