ଭୁବନେଶ୍ୱର,୩ା୨(ବ୍ୟୁରୋ): ରାସ୍ତା ଉପରେ ଗାଡି ପାର୍କିଂ କରାଯାଉଥିବାରୁ କଳ୍ପନାରୁ ରାଜମହଲ ଛକ ପର୍ଯ୍ୟନ୍ତ ଟ୍ରାଫିକ ସମସ୍ୟା ଦେଖା ଦେଉଥିଲା। ବାପୁଜୀନଗରକୁ ଯିବା ରାସ୍ତାରେ ଗାଡ଼ି ଚାଳକମାନେ ମନ ଇଚ୍ଛା ପ୍ରବେଶ ଏବଂ ପ୍ରସ୍ଥାନ କରୁଥିଲେ। ଯାହା ଫଳରେ ଟ୍ରାଫିକ ସମସ୍ୟା ଉକତ୍ଟ ରୂପ ନେଉଥିଲା। ବାପୁଜୀନଗର ଭିତରକୁ ପ୍ରବେଶ ପାଇଁ ପୋଲିସ ପକ୍ଷରୁ ଓ୍ବାନ୍ ଓ୍ବେ ଘୋଷଣା କରାଯାଇଛି। ଏପରିକି କେଉଁ ସ୍ଥାନରେ ଯାତ୍ରୀ ପ୍ରବେଶ କରିବେ ଏବଂ ପ୍ରସ୍ଥାନ କରିବେ, ସେନେଇ ନିର୍ଦ୍ଦେଶନାମା ଜାରି ହୋଇଛି। ତଥାପି ଗାଡ଼ି ଚାଳକଙ୍କ ଦ୍ୱନ୍ଦ୍ୱ ବଢ଼ିବାରେ ଲାଗିଛି। କୌଣସି ଗଳିରେ ସାଇନ୍ ବୋର୍ଡ ଲାଗି ନ ଥିବାରୁ ଅଡ଼ୁଆ ଦେଖାଦେଇଛି। ଫଳସ୍ବରୂପ ରବିବାର ଏକାଧିକ ଯାତ୍ରୀ ପୂର୍ବଭଳି ନିଜ ମନ ଇଚ୍ଛା ପ୍ରବେଶ ଓ ପ୍ରସ୍ଥାନ କରିଥିଲେ। ଏପରିକି ପାର୍କିଂ ପାଇଁ ସ୍ଥାନ ଚିହ୍ନଟ ହୋଇଥିଲେ ମଧ୍ୟ କେହି ଜାଣିପାରୁନାହାନ୍ତି। ମନ ଇଚ୍ଛା ପାର୍କିଂ କରୁଛନ୍ତି। ଅନ୍ୟପଟେ ପୋଲିସ ହଠାତ୍ ଆଉ ଜରିମାନା କାଟିବ ନାହିଁ ବୋଲି ଜଣାପଡ଼ିଛି। ଲୋକଙ୍କୁ ସଚେତନ କରାଯିବା ସହ ଦୁଇ ସପ୍ତାହ ସମୟ ଦିଆଯିବ। ବିଏମ୍ସି ପକ୍ଷରୁ ପ୍ରବେଶ ଏବଂ ପ୍ରସ୍ଥାନ ସୂଚନା ସମ୍ପର୍କିତ ସାଇନ୍ବୋର୍ଡ଼ ଲଗାଯିବ। ଦୁଇ ସପ୍ତାହ ପରେ ଲୋକେ ନ ସୁଧୁରିଲେ ଜରିମାନା କଟାଯିବ ବୋଲି ଟ୍ରାଫିକ ଡିସିପି ସାଗରିକା ନାଥ ଗଣମାଧ୍ୟମଙ୍କୁ ସୂଚନା ଦେଇଛନ୍ତି। ସେ ଆହୁରି କହିଛନ୍ତି ଯେ, ଗାଡ଼ିଗୁଡ଼ିକ ରାଜମହଲ-ଶିଶୁଭବନ ରାସ୍ତାରୁ ସବ୍ମେନ୍ରୋଡ଼୍-୧ ଦେଇ ବାପୁଜୀନଗର ଭିତରକୁ ପ୍ରବେଶ କରିବ। କିନ୍ତୁ କୌଣସି ଗାଡ଼ି ଏହି ରାସ୍ତା ଦେଇ ରାଜମହଲ-ଶିଶୁଭବନ ରାସ୍ତାକୁ ବାହାରିପାରିବ ନାହିଁ। ସବ୍ମେନ୍ରୋଡ଼-୨ ଦେଇ ସମସ୍ତ ଯାନବାହନ ରାଜମହଲ-ଶିଶୁଭବନ ରାସ୍ତାକୁ ବାହାରିବେ। ସେହିପରି ସବ୍ମେନ୍ରୋଡ଼୍-୧ରୁ ଗାଡିଗୁଡ଼ିକ ଲେନ୍ ନଂ-୧୨ ଦେଇ ପ୍ରବେଶ କରିପାରିବେ। ଲେନ୍ ନଂ-୧୧ରୁ ସବ୍ମେନ୍ରୋଡ଼୍ ନମ୍ବର-୨ ଦେଇ ଯାନବାହନଗୁଡ଼ିକ ରାଜମହଲ-ଶିଶୁଭବନ ରାସ୍ତାକୁ ବାହାରିପାରିବେ। ସବ୍ ମେନ୍ରୋଡ଼୍-୧ ଲେନ୍ ନଂ-୧୨, ସବ୍ ମେନ୍ରୋଡ଼୍ ନମ୍ବର-୨ ଲେନ୍ ନଂ-୧୧କୁ ଏକପାଖିଆ(ଓ୍ବାନ୍ ଓ୍ବେ) ରାସ୍ତା ରୂପେ ଘୋଷଣା କରାଯାଇଛି। ଏହି ରାସ୍ତାଗୁଡ଼ିକର ଉଭୟ ପାର୍ଶ୍ୱରୁ ଯାନବାହନଗୁଡ଼ିକ ଯାତାୟାତ କରିପାରିବେ ନାହିଁ। ବାପୁଜୀନଗର ମାର୍କେଟ ସବ୍ମେନ୍ରୋଡ଼୍-୧ ଓ ୨ର ଉଭୟ ପାର୍ଶ୍ୱରେ ପାର୍କିଂ ପାଇଁ ବ୍ୟବସ୍ଥା କରାଯାଇଛି।
