ବ୍ରହ୍ମପୁର ଅଫିସ,୯ା୯-ଭାରତୀୟ ବନ ଅଧିନିୟମ ୧୯୨୭ ପ୍ରସ୍ତାବିତ ସଂଶୋଧନକୁ ଆଦିବାସୀ ଭାରତ ମହାସଭା ବିରୋଧ କରିଛି। କେନ୍ଦ୍ର ସରକାରଙ୍କ ଏହି ନିଷ୍ପତ୍ତି ପ୍ରତ୍ୟାହାର କରିବାକୁ ଦାବି ହୋଇଛି ।
ନ ହେଲେ ଏହାର ପ୍ରତିବାଦରେ ସେପ୍ଟେମ୍ବର ୩୦ରେ ଭଞ୍ଜନଗରରେ ଆଦିବାସୀଙ୍କ ବିଶାଳ ସମାବେଶ ହେବ। ସରକାରଙ୍କ ଅନ୍ୟାୟର କଡ଼ା ଜବାବ ଦିଆଯିବ। ମହାସଭା ଜିଲା କମିଟି ପକ୍ଷରୁ ଏହି ସୂଚନା ଦିଆଯାଇଛି ।
ଭାରତ ମହାସଭା ଜାତୀୟ ସଂଯୋଜକ ସୌରା ଯାଦବ ଓ ରାଷ୍ଟ୍ରୀୟ ଅଧ୍ୟକ୍ଷ ଭୋଜଲାଲ ନେତାମ ଗଞ୍ଜାମ ଗସ୍ତରେ ଆସି ରବିବାର ଜିଲା କମିଟି କର୍ମକର୍ତ୍ତା ଏବଂ ବିଭିନ୍ନ ସଂଗଠନର ଆଦିବାସୀ ନେତାଙ୍କ ସହ ବିସ୍ତୃତ ଆଲୋଚନା କରିଥିଲେ। କେତେକ ଆଦିବାସୀ ଅଧ୍ୟୁଷିତ ଗ୍ରାମବାସୀ ଉପସ୍ଥିତ ରହି ଆଲୋଚନାରେ ଭାଗ ନେଇଥିଲେ ।
ଓଡ଼ିଶାରେ ଆଦିବାସୀଙ୍କ ଉପରେ ପୋଲିସର ଦମନଲୀଳା ଚାଲିଥିବା ଏବଂ ଜଙ୍ଗଲ ଜମିରୁ ଉଚ୍ଛେଦ ପାଇଁ ଷଡ଼ଯନ୍ତ୍ର ଅବ୍ୟାହତ ରହିଥିବା ଦୁଇ ଜାତୀୟ ନେତାଙ୍କୁ ଅବଗତ କରାଯାଇଥିଲା। ସେମାନଙ୍କୁ ମୌଳିକ ସୁବିଧା ସରକାର ଓ ପ୍ରଶାସନ ଯୋଗାଉ ନ ଥିବା ଅଭିଯୋଗ କରାଯାଇଥିଲା । କେତେକ କ୍ଷେତ୍ରରେ ମିଥ୍ୟା ମାମଲା ପୋଲିସ ରୁଜୁକରି ଆଦିବାସୀଙ୍କୁ ଗିରଫ ଏବଂ ମହିଳାଙ୍କୁ ଅଶୋଭନୀୟ ଆଚରଣ କରୁଥିବା ରାଷ୍ଟ୍ରୀୟ ନେତାଙ୍କୁ କୁହାଯାଇଥିଲା ।
ଗଞ୍ଜାମ କଳା ପରିଷଦରେ ହୋଇଥିବା ବୈଠକରେ ଭଞ୍ଜନଗର ଉପଖଣ୍ଡରେ ନିରୀହ ଆଦିବାସୀଙ୍କ କାଜୁ ଫସଲ ମାଫିଆମାନେ ଜବରଦସ୍ତ ଲୁଟି ନେଉଥିବା ଏବଂ ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଉ ନ ଥିବା ଦର୍ଶାଇ କ୍ଷୋଭ ପ୍ରକାଶ କରାଯାଇଥିଲା। ଭାଜପା ନେତୃତ୍ୱାଧୀନ କେନ୍ଦ୍ର ସରକାର କର୍ପୋରେଟ ସଂସ୍ଥାକୁ ସୁହାଇବା ପାଇଁ ଖଣି ଖାଦାନ, ଜମି ଓ ଜଙ୍ଗଲ ଜମି ଟେକି ଦେଉଥିବା ଜାତୀୟ ନେତାଦ୍ୱୟ ଅଭିଯୋଗ କରିଥିଲେ। ଫଳରେ ଆଦିବାସୀ ଓ ଅନୁସୂଚିତ ଜାତି ପରିବାରଙ୍କ ସର୍ବନାଶ ହେଉଛି । କେନ୍ଦ୍ର ରାଜ୍ୟ ସରକାରଙ୍କ ଆଦିବାସୀ ମାରଣ ନୀତି ବନ୍ଦ ନ ହେଲେ ବିସ୍ଫୋରକ ପରିସ୍ଥିତି ସୃଷ୍ଟି ହେବାର ଚେତାବନୀ ଦିଆଯାଇଛି । ମହାସଭା ରାଜ୍ୟ ସଂଯୋଜକ ତଥା ଜିଲା ସମ୍ପାଦକ ଟୁନା ମଲିକ, ଜିଲା ସଭାପତି ପୂର୍ଣ୍ଣଚନ୍ଦ୍ର ପ୍ରଧାନ, ଉପସଭାପତି ତ୍ରିନାଥ ମଲିକ ଓ ବିଷ୍ଣୁ ପ୍ରସାଦ ମଲିକ ପ୍ରମୁଖ ବୈଠକରେ ଉପସ୍ଥିତ ଥିଲେ ।
