ବଡି ମୋଡିଫିକେସନ ଆଜିକାଲି ଏକ ଟ୍ରେଣ୍ଡରେ ପରିଣତ ହୋଇଗଲାଣି। ଟାଟୁ, ପିଅର୍ସିଂ ଆଦି ଯୁବପିଢ଼ିଙ୍କ ଲାଗି ଏକ ସାଧାରଣ କଥା କହିଲେ ଚଳେ। ତେବେ ଜର୍ମାନୀର ୨୬ ବର୍ଷୀୟ ଯୁବକ ଜୋଏଲ ମିଗ୍ଲର କିନ୍ତୁ ଆଉ ଦି’ପାଦ ଆଗେଇଯାଇଛନ୍ତି। ନିଜ ମୁହଁରେ ସର୍ବାଧିକ ଫେସ୍ ଟନେଲ କରାଇ ସେ ସ୍ଥାନ ପାଇଛନ୍ତି ଗିନିଜ୍ ଓ୍ବାଲର୍ଡ ରେକର୍ଡରେ। ଜୋଏଲ ନିଜ ମୁହଁ ଯଥା ଗାଲ, ନାକ, ଓଠ ଆଦିରେ କଣା କରି ଫ୍ୟାଶନ୍ର ଏକ ନୂଆ ଟ୍ରେଣ୍ଡ ସୃଷ୍ଟି କରିବାରେ ସକ୍ଷମ ହେବା ସହ ଅନେକ ଲୋକପ୍ରିୟତା ମଧ୍ୟ ହାସଲ କରିଛନ୍ତି। ଜୋଏଲଙ୍କ ଦୁଇ ଗାଲରେ ଥିବା ଗାତର ଗୋଲେଇ ୩୪ ମି.ମି. ଥିବା ବେଳେ ସେ ଏହାକୁ ବଢ଼ାଇ ୪୦ ମି.ମି. କରିବାକୁ ଲକ୍ଷ୍ୟରଖିଛନ୍ତି। ଜର୍ମାନୀର ଏହି ଯୁବ ରେକର୍ଡ ହୋଲ୍ଡର ମାତ୍ର ୧୩ ବର୍ଷ ବୟସରେ ସାଧାରଣ ଇୟର୍ ପିଅର୍ସିଂ କରିଥିଲେ। ଏହାପରେ ପିଅର୍ସିଂ କରିବା ତାଙ୍କ ପାଇଁ ଏକ ନିଶା ପାଲଟିଯାଇଥିଲା। ପରିଣାମ ସ୍ବରୂପ ତାଙ୍କର ଏହି ନିଶା ତାଙ୍କୁ ଓ୍ବାଲର୍ଡ ରେକର୍ଡଧାରୀ କରାଇବାରେ ସକ୍ଷମ ହୋଇପାରିଲା।
