ଦିଗପହଣ୍ଡି,୧୫ା୧୧(ଡି.ଏନ.ଏ.)- ଜଣେ ବିବାହିତାଙ୍କ ସହ ଫେସବୁକ୍ରେ ବନ୍ଧୁତା କରିବା ଜଣେ ଯୁବକଙ୍କୁ ମହଙ୍ଗା ପଡ଼ିଛି। ଉକ୍ତ ମହିଳାଙ୍କୁ ବଳାତ୍କାର କରିବା ଅଭିଯୋଗରେ ଦିଗପହଣ୍ଡି ପୋଲିସ ଗୁରୁବାର ସମ୍ପୃକ୍ତ ଯୁବକ ତଥା ରାୟଗଡ଼ା ଜିଲା ଆମ୍ବାଦୋଳାର ପ୍ରଫୁଲ୍ଲ କୁମାର ସାହୁ ଓରଫ ବୁଲୁଙ୍କୁ ଗିରଫ କରି ବ୍ରହ୍ମପୁରସ୍ଥିତ ଜିଲା ଦୌରାଜଜଙ୍କ କୋର୍ଟକୁ ଚାଲାଣ କରିଛି। ଏ ନେଇ ଥାନାରେ ନଂ. ୨୨୩/୧୯ମାମଲା ରୁଜୁ ହୋଇଛି। ଜାମିନ ନାମଞ୍ଜୁର ହେବାରୁ ଅଭିଯୁକ୍ତଙ୍କୁ ବ୍ରହ୍ମପୁର ଜେଲକୁ ପଠାଇ ଦିଆଯାଇଛି। ଆଇଆଇସି ବସନ୍ତ କୁମାର ସେଠୀଙ୍କ ସୂଚନାନୁସାରେ ଦିଗପହଣ୍ଡି ଥାନା ଅଞ୍ଚଳର ମହିଳା ଜଣକ ଗତ ୨୦୧୮ ରେ ବୁଲୁଙ୍କୁ ଫେସବୁକରେ ଫ୍ରେଣ୍ଡ ରିକୁଏଷ୍ଟ ପଠାଇଥିଲେ। ୨ ଦିନ ପରେ ଉଭୟଙ୍କ ମଧ୍ୟରେ ବନ୍ଧୁତା ବଢିଥିଲା। ଉଭୟେ ଫୋନ ନମ୍ବର ଆଦାନପ୍ରଦାନ କରିଥିଲେ। ପରେ ବୁଲୁ ବ୍ରହ୍ମପୁର ଆସି ବିଜିପୁର ସନ୍ତୋଷୀ ମା’ ମନ୍ଦିର ନିକଟରେ ମହିଳାଙ୍କୁ ସାକ୍ଷାତ କରିଥିଲେ। ଉଭୟେ ଅନେକଥର ପୁରୀ, ଗୋପାଳପୁର ବୁଲି ଯାଇଥିଲେ। ବି ଟେକ ଡିଗ୍ରୀ ସାରିବା ପରେ ବୁଲୁ ବ୍ୟବସାୟ କରୁଥିଲେ। ମହିଳାଙ୍କ ସହ ଅନୈତିକ ସମ୍ପର୍କ ନିବିଡ଼ ହେବା ପରେ ତାଙ୍କ ଘରକୁ ବହୁବାର ଯା’ଆସ କରୁଥିଲେ। ମହିଳାଙ୍କ ଅନୁରୋଧ ରକ୍ଷାକରି ତାଙ୍କ ସ୍ବାମୀଙ୍କ ବ୍ୟାଙ୍କ ଆକାଉଣ୍ଟକୁ ଅନେକ ଥର ପେଟିଏମରେ ଟଙ୍କା ପଠାଇଥିଲେ। ମହିଳା ଜଣକ ବୁଲୁଙ୍କୁ ବିବାହ ପ୍ରସ୍ତାବ ଦେବାରୁ ସେ ପ୍ରତ୍ୟାଖ୍ୟାନ କରିଥିଲେ। ମହିଳା ଏ ନେଇ ଗତ ୨ ତାରିଖରେ ଦିଗପହଣ୍ଡି ଥାନାରେ ଏତଲା ଦେଇଥିଲେ। ଗତ ନଭେମ୍ବର ୩ ତାରିଖଠାରୁ ୨୦୧୯ ସେପ୍ଟେମ୍ବର ୧୫ ତାରିଖ ମଧ୍ୟରେ ଅନେକ ଥର ଅଭିଯୁକ୍ତ ତାଙ୍କୁ ବଳାତ୍କାର କରିଥିବା ଏତଲା ଦେଇଥିଲେ। ଏହାକୁ ଭିତ୍ତିକରି ଅଭିଯୁକ୍ତଙ୍କ ବିରୋଧରେ ପୋଲିସ ମକଦ୍ଦମା ରୁଜୁୁ କରିଥିଲା। କୌଶଳକ୍ରମେ ତାଙ୍କୁ ଦିଗପହଣ୍ଡି ଡକାଇ ଆଣି ବ୍ରହ୍ମପୁର ବଡ ଡାକ୍ତରଖାନାରେ ଡାକ୍ତରୀ ମାଇନା କରାଇବା ସହ ଗୁରୁବାର ଗିରଫ କରିଥିଲା। ପୀଡ଼ିତା ମହିଳାଙ୍କ ନିକଟରୁ ମୋବାଇଲ ଫୋନ ଜବତ କରାଯାଇଥିବା ତଦନ୍ତକାରୀ ପୋଲିସ ଅଧିକାରୀ ମାଧବ ଚନ୍ଦ୍ର ଟାକରୀ କହିଛନ୍ତି।
