ନୂଆଦିଲ୍ଲୀ,୩୧।୩(ପି.ଟି.): କୋଭିଡ-୧୯ର ଆତଙ୍କ ସତ୍ତ୍ୱେ ଆସନ୍ତା ନଭେମ୍ବରରରେ ୧୭ ବର୍ଷରୁ କମ୍ ଫିଫା ବିଶ୍ୱକପ୍ ଆୟୋଜନ କରିବାକୁ ଅଲ୍ ଇଣ୍ଡିଆ ଫୁଟବଲ ଆସୋସିଏଶନ (ଏଆଇଏଫ୍ଏଫ୍) ବେଶ୍ ଆଶାବାଦୀ ଅଛି। ସାରା ଦେଶ ତଥା ବିଶ୍ୱକପ୍ରେ ସବୁ ବଡ଼ବଡ଼ କ୍ରୀଡ଼ା ଇଭେଣ୍ଟ ବାତିଲ କିମ୍ବା ସ୍ଥଗିତ ରହୁଥିବା ବେଳେ ଏଆଇଏଫ୍ଏଫ୍ କିନ୍ତୁ ବିଶ୍ୱକପ୍ ଆୟୋଜନ ନେଇ ସକାରାତ୍ମକ ମନୋଭାବ ପୋଷଣ କରିଛି। ବିଶ୍ୱକପ୍ ଆୟୋଜନ ହେବାକୁ ଆହୁରି ୭ ମାସ ବାକି ରହିଥିବା ବେଳେ ସେତେବେଳକୁ ପରିସ୍ଥିତିରେ ଯଥେଷ୍ଟ ଉନ୍ନତି ଘଟିଥିବ ବୋଲି ଆଶା କରାଯାଉଛି। ତେବେ ସବୁକିଛି ବିଶ୍ୱ ଫୁଟବଲର ସର୍ବୋଚ୍ଚ ପ୍ରଶାସନିକ ସଂସ୍ଥା ଫିଫା ଉପରେ ସବୁ କିଛି ନିର୍ଭର କରୁଛି ବୋଲି ଏଆଇଏଫ୍ଏଫ୍ ସମ୍ପାଦକ କୁଶଲ ଦାସ କହିଛନ୍ତି। ପରିସ୍ଥିତି ଉପରେ ଫିଫା କଡ଼ା ନଜର ରଖିଛି। ଟୁର୍ନାମେଣ୍ଟ ଆରମ୍ଭ ହେବାକୁ ଆହୁରି ବହୁତ ସମୟ ବାକି ଅଛି। ଏବେ ଆମେ ଅପେକ୍ଷା କରିବା ସହ ସ୍ଥିତି ଉପରେ ନଜର ରଖିବା କାର୍ଯ୍ୟ କରିବୁ ବୋଲି ସେ କହିଛନ୍ତି।
୧୭ ବର୍ଷରୁ କମ୍ ମହିଳା ବିଶ୍ୱକପ୍ ଭାରତରେ ନଭେମ୍ବର ୨ରୁ ଆରମ୍ଭ ହୋଇ ୨୧ ତାରିଖରେ ଶେଷ ହେବାର କାର୍ଯ୍ୟକ୍ରମ ରହିଛି। ବିଶ୍ୱକପ୍ର ମ୍ୟାଚ୍ଗୁଡିକ ନବୀ ମୁମ୍ବାଇ, କୋଲକାତା, ଅହମ୍ମଦାବାଦ, ଭୁବନେଶ୍ୱର ଓ ଗୁଆହାଟୀରେ ଆୟୋଜନ ହେବ। ଅବଶ୍ୟ ଟୁର୍ନାମେଣ୍ଟ ପାଇଁ ୟୁରୋପୀୟ ଓ ଆଫ୍ରିକୀୟ କ୍ୱାଲିଫାୟର ଏପର୍ଯ୍ୟନ୍ତ ଆରମ୍ଭ ହୋଇନାହିଁ। କିପରି କ୍ୱାଲିଫାଇଙ୍ଗ୍ ଟୁର୍ନାମେଣ୍ଟଗୁଡିକ ଆରମ୍ଭ ହେବ ଫିଫା ଏ ନେଇ ସବୁ କନଫେଡେରେଶନର ପ୍ରତିନିଧିଙ୍କ ସହ ଯୋଗାଯୋଗ ରକ୍ଷାକରିବା ସହ କାର୍ଯ୍ୟ କରିବା ଜାରି ରଖିଛି।
ଉଲ୍ଲେଖଥାଉ କି, କୋଭିଡ-୧୯ ସଂକ୍ରମଣ ପାଇଁ ବଶ୍ୱର ସର୍ବଶ୍ରେଷ୍ଠ କ୍ରୀଡ଼ା ମହାକୁମ୍ଭ ଅଲିମ୍ପିକ୍ସ ଓ ୟୁରୋ ୨୦୨୦ ଫୁଟବଲ ଟୁର୍ନାମେଣ୍ଟକୁ ଘୁଞ୍ଚାଇ ଦିଆଯାଇଛି। ଗତ ସପ୍ତାହରେ ଭାରତରେ କିପରି ଏହି ଭାଇରସ୍ ସଂକ୍ରମଣ ହେଉଛି ଓ ଏହାର ପ୍ରଭାବ ଉପରେ ଫିଫା ନଜର ରଖିଛି ବୋଲି କହିଥିଲା। ଭାରତରେ ଏହି ଭାଇରସ୍କୁ କିପରି ନିୟନ୍ତ୍ରଣ କରାଯାଉଛି ସେ ନେଇ ମଧ୍ୟ ଫିଫା ଅନୁଧ୍ୟାନ କରୁଛି। ଯଦି ସେଭଳି ପରିସ୍ଥିତି ଉପୁଜେ ତେବେ ଫିଫା ସମସ୍ୟାର ସମାଧାନ ପାଇଁ ବିଭିନ୍ନ ବିକଳ୍ପ ଉପରେ ବିଚାର କରିବ। ବିଶ୍ୱକପ୍ରେ ମୋଟ ୧୬ଟି ଦେଶ ଅଂଶଗ୍ରହଣ କରିବେ। ଏଥିରେ ଏପର୍ଯ୍ୟନ୍ତ କେବଳ ୩ଟି ଦେଶ ସ୍ଥାନ ପକ୍କା କରିପାରିଛନ୍ତି। ଆୟୋଜକ ଦେଶ ହିସାବରେ ଭାରତ ବିଶ୍ୱକପ୍ ଖେଳିବାକୁ ଯୋଗ୍ୟତା ହାସଲ କରିଛି। ସେହିପରି ଏସିଆନ କ୍ୱାଲିଫାୟର୍ସ ଚାମ୍ପିୟନ ହିସାବରେ ଉତ୍ତର କୋରିଆ ଓ ରନର୍ସଅପ୍ ଭାବେ ଜାପାନ ଯୋଗ୍ୟତା ଅର୍ଜନ କରିଛନ୍ତି।
