ଭୁବନେଶ୍ୱର,୪।୧୦(ବ୍ୟୁରୋ):ବ୍ୟାଙ୍କ ଅଫ୍ ମହାରାଷ୍ଟ୍ରର କଟକ ଓ ଭୁବନେଶ୍ୱର ଶାଖାରେ ହୋଇଥିବା ଠକେଇ ମାମଲାର ଅର୍ଥ କାରବାର ସଂକ୍ରାନ୍ତରେ ତଦନ୍ତ କରି ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) କାର୍ଯ୍ୟାନୁଷ୍ଠାନ ନେଇଛି। ଅଭିଯୁକ୍ତ ତଥା ଉକ୍ତ ବ୍ୟାଙ୍କର ପୂର୍ବତନ ହେଡ୍ କ୍ୟାଶିୟର ବେଦବ୍ୟାସ ବାରିକ ଓ ତାଙ୍କ ସ୍ତ୍ରୀ ଶର୍ମିଳା ପଣ୍ଡାଙ୍କ ୧ କୋଟି ୫ ଲକ୍ଷ ୬୮ ହଜାର ୩୮୧ ଟଙ୍କାର ସ୍ଥାବର ଅସ୍ଥାବର ସମ୍ପତ୍ତିକୁ ଇଡି ଆଟାଚ୍ କରିଛି। ଏନେଇ ଇଡି ପକ୍ଷରୁ ସୋମବାର ପ୍ରେସ୍ ବିଜ୍ଞପ୍ତିରେ ସୂଚନା ଦିଆଯାଇଛି। ଏହି ସମ୍ପତ୍ତିରେ ବେଦବ୍ୟାସଙ୍କ ୮ଟି ବ୍ୟାଙ୍କରେ ଥିବା ଟଙ୍କା, ଭୁବନେଶ୍ୱର ଓ କଟକରେ ଥିବା ୪ଟି ପ୍ଲଟ୍ ଏବଂ ଗୋଟିଏ ଫ୍ଲାଟ୍ ରହିଛି। ଠକେଇ ଟଙ୍କାରୁ ଏସବୁ ସମ୍ପତ୍ତି କରାଯାଇଥିବା ପ୍ରମାଣ ମିଳିବା ପରେ ପ୍ରିଭେନ୍ଶନ୍ ଅଫ୍ ମନି ଲଣ୍ଡରିଂ ଆକ୍ଟ (ପିଏମ୍ଏଲ୍ଏ) ୨୦୦୨ ଅନୁଯାୟୀ ଏହି ପଦକ୍ଷେପ ନିଆଯାଇଛି। ଏନେଇ ଅଧିକ ତଦନ୍ତ କରାଯାଉଥିବା ଇଡି ପକ୍ଷରୁ ସୂଚନା ଦିଆଯାଇଛି।
ଇଡିର ସୂଚନା ଅନୁୟାୟୀ, ଅଭିଯୁକ୍ତ ବେଦବ୍ୟାସଙ୍କ ଘର ଭୁବନେଶ୍ୱର ଚନ୍ଦ୍ରଶେଖରପୁର ଥାନା ଅନ୍ତର୍ଗତ ମୈତ୍ରୀ ବିହାରରେ। ସେ ବ୍ୟାଙ୍କ ଅଫ୍ ମହାରାଷ୍ଟ୍ରର କଟକ ଓ ଭୁବନେଶ୍ୱର ଶାଖାର ମୁଖ୍ୟ କ୍ୟାଶିୟର ଥିଲେ। ୨୦୦୮ରୁ ୨୦୧୨ ମଧ୍ୟରେ ସେ ତାଙ୍କ ପଦବୀକୁ ଅପବ୍ୟବହାର କରି ଦିଲ୍ଲୀ ବାସିନ୍ଦା ବିଜୟ କେତନ ବାରିକଙ୍କ ସ୍ତ୍ରୀ ସୁକାନ୍ତି ବାରିକଙ୍କଠାରୁ ସୁଧମୂଳ ସହ ୪ କୋଟି ୭୮ ଲକ୍ଷ ଠକେଇ କରିଥିଲେ। ସୁକାନ୍ତି କଟକ ଶାଖାରେ ଆର୍ଡି ଆକାଉଣ୍ଟ ଖୋଲି ୨୦୦୮ ଡିସେମ୍ବରରୁ ୨୦ ମାସ ପର୍ଯ୍ୟନ୍ତ ପ୍ରତି ମାସ ୪୦ ହଜାର ଟଙ୍କା ଲେଖାଏ ଡିପୋଜିଟ୍ କରିଥିଲେ। ତେବେ ବେଦବ୍ୟାସ ୬ରୁ ୨୦ଟି କିସ୍ତି ଟଙ୍କାକୁ ଠକି ନେଇଥିଲେ। ସେହିପରି ଭୁବନେଶ୍ୱର ଶାଖାରେ ସୁକାନ୍ତି ମୋଟ ୨.୮୯ କୋଟି ଟଙ୍କା ନିବେଶ କରିଥିଲେ ମଧ୍ୟ ବେଦବ୍ୟାସ ସୁକାନ୍ତିଙ୍କୁ ୧୬ ଏଫ୍ଡିଆର୍ଏସ୍ର ଜାଲ୍ ରସିଦ ଦେଇଥିଲେ। ଠକେଇ ସଂକ୍ରାନ୍ତରେ ଜଣାପଡ଼ିବା ପରେ ସୁକାନ୍ତି ଏନେଇ ସିବିଆଇ ନିକଟରେ ଅଭିଯୋଗ କରିଥିଲେ। ସିବିଆଇ ୨୦୧୯ ଏପ୍ରିଲ ୯ରେ ମାମଲା ରୁଜୁ କରି ତଦନ୍ତ କରିବା ସହ ବେଦବ୍ୟାସଙ୍କୁ ଗିରଫ କରିଥିଲା। ତେବେ ସିବିଆଇର ମାମଲା ଆଧାରରେ ଇଡି ଏହି ବେଆଇନ ଅର୍ଥ କାରବାର ସଂକ୍ରାନ୍ତରେ ତଦନ୍ତ ଆରମ୍ଭ କରିଥିଲା।
