ଚେନ୍ନାଇ, ୧୬।୮: ପୂର୍ବତନ ଭାରତୀୟ ଓପ୍ନର ଭି. ବି. ଚନ୍ଦ୍ରଶେଖର ଗୁରୁବାର ସନ୍ଧ୍ୟାରେ ମାଇଲାପୋରସ୍ଥିତ ନିଜ ବାସଭବନରେ ଆତ୍ମହତ୍ୟା କରିଛନ୍ତି। ତାଙ୍କ ମରଶରୀର ଫ୍ୟାନ୍ରେ ଝୁଲନ୍ତା ଅବସ୍ଥାରେ ମିଳିଥିବା ସ୍ଥାନୀୟ ପୋଲିସ ସୂଚନା ଦେଇଛି। ୫୭ ବର୍ଷୀୟ ଚନ୍ଦ୍ରଶେଖର କୌଣସି ସୁଇସାଇଡ୍ ନୋଟ ଛାଡ଼ିନାହାନ୍ତି ବୋଲି ତଦନ୍ତକାରୀ ଅଫିସର ସେନ୍ଥିଲ ମୁରୁଗାନ କହିଛନ୍ତି। ଅପରାହ୍ନ ୪.୪୫ରେ ସେ ପରିବାର ସହ ଚା’ପାନ କରି ନିଜ ରୁମ୍କୁ ଯାଇଥିଲେ। ଏହାପରେ କୌଣସି କାରଣରୁ ପତ୍ନୀ ସୌମ୍ୟା ଚନ୍ଦ୍ରଶେଖରଙ୍କ ରୁମ୍ର କବାଟ ବାଡ଼େଇବା ପରେ କୌଣସି ଉତ୍ତର ମିଳି ନ ଥିଲା। ଏହାପରେ ଝରକା ବାଟେ ଦେଖିବାରୁ ଚନ୍ଦ୍ରଶେଖରଙ୍କ ମରଶରୀର ଫ୍ୟାନ୍ରେ ଝୁଲୁଥିଲା ବୋଲି ତଦନ୍ତକାରୀ ଅଫିସର ମୁରୁଗାନ କହିଛନ୍ତି। ମୃତଦେହ ବ୍ୟବଚ୍ଛେଦ ପାଇଁ ସରକାରୀ ରୟାପେତା ହସ୍ପିଟାଲ ପଠାଯାଇଛି। ତାମିଲନାଡୁ ପ୍ରିମିୟର ଲିଗ୍ରେ ସେ ବୀରାନ୍ସ ଦଳର ମାଲିକ ଥିଲେ। ଏହାସହିତ ସେ ଭିବି ଏକାଡେମୀ ମଧ୍ୟ ଚଳାଉଥିଲେ। ସେ ଦେଶ ପକ୍ଷରୁ ୭ ଦିନିକିଆ ଖେଳିଥିଲେ। ଆକ୍ରମଣାତ୍ମକ ବ୍ୟାଟିଂ କରୁଥିବା ଏହି ବ୍ୟାଟ୍ସମ୍ୟାନ ଏକ ଅର୍ଦ୍ଧଶତକ ସହ ଅନ୍ତର୍ଜାତୀୟ କ୍ୟାରିୟରରେ ମୋଟ ୮୮ ରନ୍ କରିଥିଲେ। ୧୯୮୭-୮୮ ରଣ୍ଜୀ ଚାମ୍ପିୟନ ତାମିଲନାଡୁ ଦଳର ସେ ଗୁରୁତ୍ୱପୂର୍ଣ୍ଣ ସଦସ୍ୟ ଥିଲେ। ସେ ଗୋଆ ପାଇଁ ମଧ୍ୟ ଖେଳିଥିଲେ। କ୍ରିକେଟରୁ ଅବସର ପରେ ସେ ଜାତୀୟ ଚୟନକର୍ତ୍ତା, ତାମିଲନାଡୁ କୋଚ୍ ଓ ଭାଷ୍ୟକାର ଦାୟିତ୍ୱରେ ରହିଥିଲେ। ତାଙ୍କ ମୃତ୍ୟୁ ସମ୍ପର୍କରେ ତାମିଲନାଡୁ ଦଳର ପୂର୍ବତନ ଅଧିନାୟକ ତଥା ଭାରତୀୟ ଦଳ ଖେଳାଳି ଏସ୍. ବଦ୍ରିନାଥ କହିଛନ୍ତି, କିଛିଦିନ ତଳେ ତାଙ୍କୁ ଭେଟିଥିଲି। ସେ ପୂରା ଫିଟ୍ ଥିଲେ, ଆଉ ସବୁକିଛି ଠିକ୍ ଲାଗୁଥିଲା। ସେ ଆଉ ନାହାନ୍ତି ବୋଲି ମୁଁ ବିଶ୍ୱାସ କରିପାରୁନାହିଁ। ତାଙ୍କ ବିୟୋଗରେ ସୁରେଶ ରାଇନା, ପୂର୍ବତନ କ୍ରିକେଟର କ୍ରିଷ୍ଣାମାଚାରୀ ଶ୍ରୀକାନ୍ତ ଓ ଅନିଲ କୁମ୍ବଲେ ପ୍ରମୁଖ ଦୁଃଖ ପ୍ରକାଶ କରିଛନ୍ତି।
