ନୟାଗଡ଼ ଅଫିସ, ୩ା୨(ଲୋକନାଥ ମିଶ୍ର): ପରିବର୍ତ୍ତିତ ପ୍ଲାନକୁ ଅନୁମୋଦନ ନ କରି ନୟାଗଡ଼ ଜିଲା ମୁଖ୍ୟ ଚିକିତ୍ସାଳୟରେ ଜରାବ୍ୟାଧି ଚିକିତ୍ସା କେନ୍ଦ୍ର ନିର୍ମାଣ କରାଯାଇଥିବା ଅଭିଯୋଗ ହୋଇଛି। ୪୦ଲକ୍ଷ ଟଙ୍କାର ଏହି ଘୋଟାଲା ଉପରେ ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ମୁଖ୍ୟମନ୍ତ୍ରୀଙ୍କ ନିକଟରେ ଅଭିଯୋଗ ହୋଇଛି। ଏପରିସ୍ଥଳେ ପ୍ଲାନ ଆପ୍ରୁଭ ନ ହୋଇ ନିର୍ମାଣ ହୋଇଥିବାରୁ ଅଧିକ ଅନୁଦାନ ଯୋଗାଇବାକୁ ସରକାର ମନା କରିଛନ୍ତି। ଫଳରେ ଜରାବ୍ୟାଧି ଚିକିତ୍ସାକେନ୍ଦ୍ର ଅପୂର୍ଣ୍ଣାଙ୍ଗ ହୋଇ ପଡିରହିଛି।
ସାରା ରାଜ୍ୟରେ ଜିଲା ମୁଖ୍ୟ ଚିକିତ୍ସାଳୟ ପରିସରରେ ଏକା ପ୍ରକାରର ଜରାବ୍ୟାଧି ଚିକିତ୍ସା କେନ୍ଦ୍ର ନିର୍ମାଣ କରାଯିବା ପାଇଁ ସରକାର ନିର୍ଦ୍ଦେଶ ଦେଇଥିଲେ। ଏଥିପାଇଁ ସରକାର ୨୦୧୭-୧୮ ଆର୍ଥିକବର୍ଷରେ ନୟାଗଡ଼ ଜିଲା ପାଇଁ ୪୦ ଲକ୍ଷ ଟଙ୍କା ଅନୁଦାନ ଯୋଗାଇ ଦେଇଥିଲେ। ତେବେ ନିର୍ମାଣ ସମୟରେ ହଠାତ୍ ପ୍ଲାନ ବଦଳାଗଲା। ଏଥିପାଇଁ ଉଚ୍ଚ କର୍ତ୍ତୃପକ୍ଷଙ୍କ ଅନୁମତି ନିଆଯାଇ ନ ଥିବା ଜଣାପଡିଛି।
ଦୋଷ ଲୁଚାଇବାକୁ ୩୪ କୋଟିର ଢାଲ
ଜରାବ୍ୟାଧି ଚିକିତ୍ସାକେନ୍ଦ୍ରର ଅନିୟମିତତାକୁ ଲୁଚାଇବାକୁ ୩୪ କୋଟି ଟଙ୍କାର ଅନୁଦାନକୁ ବିନିଯୋଗ କରିବାକୁ ଆରମ୍ଭ ହୋଇଛି ପ୍ରଚେଷ୍ଟା। ଯେଉଁ ସ୍ଥାନରେ ଜରାବ୍ୟାଧି ଚିକିତ୍ସାକେନ୍ଦ୍ର ନିର୍ମାଣ କରାଯାଇଛି ଫ୍ଲାଏ ଓଭର କରି ତା’ ଉପରେ ୧୦୦ ଶଯ୍ୟା ବିଶିଷ୍ଟ ବହୁତଳ କୋଠା ନିର୍ମାଣ କରିବାକୁ ପ୍ଲାନ ପ୍ରସ୍ତୁତ ହୋଇଥିବା ସ୍ବାସ୍ଥ୍ୟ ବିଭାଗର ଜଣେ କର୍ମଚାରୀ ନାମ ଗୋପନ ରଖି ପ୍ରକାଶ କରିଛନ୍ତି। ସରକାର ମୋ ସରକାର ଯୋଜନାରେ ୧୦୦ ଶଯ୍ୟା ବିଶିଷ୍ଟ ବହୁତଳ କୋଠା ନିର୍ମାଣ କରିବାକୁ ଅନୁଦାନ ଯୋଗାଇ ଦେଇଛନ୍ତି। ଯଦି ଏହା ନିର୍ମାଣ ହୁଏ ତେବେ ଏଠାକୁ ଯିବାକୁ ରାସ୍ତା ରହିବ ନାହିଁ । ରୋଗୀ ହଟହଟା ହେବେ। ପୁଣି କୋଟି କୋଟି ଟଙ୍କା ପାଣିରେ ପଡିବ। ଉକ୍ତ ସ୍ଥାନରେ ମାତୃ ଓ ଶିଶୁ ହସ୍ପିଟାଲ ନିର୍ମାଣ ପାଇଁ ଉଦ୍ୟମ ହେଉଥିବାବେଳେ ପ୍ରତିବାଦ ହୋଇଥିଲା । ଅନ୍ୟପକ୍ଷେ ପୁରୁଣା ସର୍ଜରି କାର୍ଯ୍ୟାଳୟକୁ ଭାଙ୍ଗି ସେଠାରେ ୧୦୦ ଶଯ୍ୟା ବିଶିଷ୍ଟ ବହୁତଳ କୋଠା ନିର୍ମାଣ କରିବାକୁ ଦାବି ହେଉଛି। ସ୍ବାସ୍ଥ୍ୟସେବା ଉନ୍ନତି ପାଇଁ ସରକାର କୋଟି କୋଟି ଟଙ୍କା ଅନୁଦାନ ଯୋଗାଉଥିଲେ ମଧ୍ୟ ଏହାର ସଦ୍ବିନିଯୋଗ ହେଉ ନ ଥିବାରୁ ଏବେ ପ୍ରତିବାଦ ଆରମ୍ଭ ହୋଇଛି।
କାନ୍ଥ ଓ ରାସ୍ତାରେ ମଇଳା ଖଣ୍ଡ
ସରକାର ସ୍ବାସ୍ଥ୍ୟସେବାକୁ ଲୋକାଭିମୁଖୀ କରିବାକୁ ଗୁରୁତ୍ୱ ଦେଉଛନ୍ତି। ହେଲେ ପରିଚାଳନାଗତ ତ୍ରୁଟି କାରଣରୁ ଏଠାରେ ରୋଗୀ ରୋଗ କିଣୁଛନ୍ତି। ମେଡିସିନ ୱାର୍ଡ କାନ୍ଥ ଓ ଡ୍ରେନରେ ପାଇଖାନାରୁ ମଇଳା ଆସି ଜମା ହୋଇ ଦୁର୍ଗନ୍ଧ ବାହାରୁଛି। ଏହି ସମସ୍ୟା ପ୍ରାୟ ୧ବର୍ଷରୁ ଊର୍ଦ୍ଧ୍ୱ ହୋଇଥିଲେ ହେଁ ଏହାର ସମାଧାନ କରାଯାଉ ନ ଥିବାରୁ ଅସନ୍ତୋଷ ପ୍ରକାଶ ପାଇଛି । ଉକ୍ତ ମଇଳା ସେଫ୍ଟିଟ୍ୟାଙ୍କରେ ଯିବାକୁ ବ୍ୟବସ୍ଥା କରାଯିବା ଦରକାର । କିନ୍ତୁ ଏହାକରା ନ ଯିବାରୁ ୭ରୁ ୮ ଫୁଟ ଦୂରରେ ଥିବା ଭୂତଳ ଜଳଭଣ୍ଡାରର ଜଳ ଉପରେ ଏହାର ପ୍ରଭାବ ପଡୁଛି । ଏହି ଜଳକୁ ଜିଲା ମୁଖ୍ୟ ଚିକିତ୍ସାଳୟର ରୋଗୀଙ୍କୁ ଯୋଗାଣ ହେଉଛି।
ମେଡିସିନ୍ ୱାର୍ଡର କାନ୍ଥ ଓ ଡ୍ରେନରେ ମଇଳା ଖଣ୍ଡ ପଡିବା ସମ୍ପର୍କରେ ସିଡିଏମଓ ଶ୍ୱେତ ମହାପାତ୍ର କୁହନ୍ତି, ସଫେଇ କର୍ମଚାରୀଙ୍କୁ କହି ଏହା ତୁରନ୍ତ ସଫା କରାଯିବ। ତେବେ ଏହାର ସ୍ଥାୟୀ ସମାଧାନ ପାଇଁ ଜିଲାପାଳଙ୍କ ସହ ଆଲୋଚନା ହୋଇଛି। ଅନ୍ୟପକ୍ଷେ ପରିବର୍ତ୍ତିତ ପ୍ଲାନକୁ ଅନୁମୋଦନ ନ କରି ଜରାବ୍ୟାଧି ଚିକିତ୍ସା କେନ୍ଦ୍ର ନିର୍ମାଣ କରାଯାଇଥିବାରୁ ସରକାରୀ ଅନୁଦାନ ମିଳିଲା ନାହିଁ। ତେବେ ଏହା ମୋ ସମୟରେ ହୋଇ ନାହିଁ। ଏପରିସ୍ଥଳେ ଜରାବ୍ୟାଧି ଚିକିତ୍ସା କେନ୍ଦ୍ର ଉପରେ ଫ୍ଲାଏ ଓଭର କରି ତା ଉପରେ ୧୦୦ ଶଯ୍ୟା ବିଶିଷ୍ଟ ବହୁତଳ କୋଠା ନିର୍ମାଣ କରିବାକୁ ପ୍ଲାନ ଆପ୍ରୁଭ ହୋଇ ସାରିଛି। ତୁରନ୍ତ ଏହି କାର୍ଯ୍ୟ ଆରମ୍ଭ ହେବ।
