ଢେଙ୍କାନାଳ ଅଫିସ/କାମାକ୍ଷାନଗର, (ଡି.ଏନ୍.ଏ.) ୨୪।୪- ସବୁ କ୍ଷେତ୍ରରେ ପୁରୁଷଙ୍କୁ ପଛରେ ଛାଡ଼ିଦେଲେଣି ମହିଳା। ସଶକ୍ତ ନାରୀ ଏବେ ଦେଶ ପ୍ରଗତିର ସାରଥି। ଗଣତନ୍ତ୍ରର ମହାନ୍ ପର୍ବରେ ପ୍ରଥମ ଥର ପରିକଳ୍ପନା କରାଯାଇଥିବା ପିଙ୍କ୍ ବୁଥ୍ରେ ଦେଖିବାକୁ ମିଳିଛି ଏହାର ଝଲକ। ଏଠାରେ ପୋଲିଂ କର୍ମଚାରୀଙ୍କଠାରୁ ଆରମ୍ଭ କରି ପ୍ରଜାଇଡିଂ ଅଫିସର ଯାଏ ସମସ୍ତ ଅଧିକାରୀ ହେଉଛନ୍ତି ମହିଳା। ଏକଦା ଘରର ଚାରିକାନ୍ଥ ମଧ୍ୟରେ ନିଜକୁ ସୀମାବଦ୍ଧ କରି ରଖିଥିବା ମହିଳାଙ୍କ ନିକଟରେ ନିର୍ବାଚନ ଭଳି ଗୁରୁଦାୟିତ୍ୱକୁ ମଧ୍ୟ ଠିକ୍ ଭାବେ ତୁଲାଇପାରିବା କ୍ଷମତା ରହିଛି, ଖାସ୍ ଏହି ବାର୍ତ୍ତା ସମାଜରେ ପ୍ରଚାର କରିବା ପିଙ୍କ୍ ବୁଥ୍ର ଉଦ୍ଦେଶ୍ୟ।
ଢେଙ୍କାନାଳ ମ୍ୟୁନିସିପାଲିଟି ସମେତ ହିନ୍ଦୋଳ, କାମାକ୍ଷାନଗର ଏବଂ ଭୁବନ ଏନ୍ଏସିରେ ୪ଟି ପିଙ୍କ୍ ବୁଥ କରାଯାଇଥିଲା। ଏଠାରେ ଭୋଟରଙ୍କୁ ଥଣ୍ଡା ପିଇବା ପାଣି ସାଙ୍ଗକୁ ଦହି ସରବତ ବଣ୍ଟାଯିବା ବ୍ୟବସ୍ଥା ହୋଇଥିଲା। ଭୋଟରଙ୍କ ପାଇଁ ଚେୟାର ପଡ଼ିଥିଲା। ବୟସ୍କ ଭୋଟର ଏବଂ ମହିଳାଙ୍କୁ ସହାୟତା କରିବାକୁ ସ୍ବତନ୍ତ୍ର କର୍ମଚାରୀ ନିୟୋଜିତ ହୋଇଥିଲେ। ପ୍ରଥମ ଥର ମତଦାନ କରୁଥିବା ଯୁବ ଭୋଟର ମତଦାନ ସାବ୍ୟସ୍ତ କରିବା ସହ ଏପରି ବ୍ୟବସ୍ଥାର ଭରପୂର ମଜା ଉଠାଇଥିଲେ।
କାମାକ୍ଷାନଗର ବିଧାନସଭା ନିର୍ବାଚନମଣ୍ଡଳୀ ଅଧୀନ ସାରଙ୍ଗଧର ହାଇସ୍କୁଲ ପରିସରରେ ୧୮ନଂ. ମତଦାନ କେନ୍ଦ୍ରକୁ ପିଙ୍କ୍ ବୁଥ୍ କରାଯାଇଥିଲା। ଏଠାରେ ମତଦାନରେ ୬ଜଣ ମହିଳା କର୍ମଚାରୀ ନିୟୋଜିତ ହୋଇଥିଲେ।
